विदेशमा अप्ठ्यारोमा परेका नेपालीको उद्धार गर्न ध्यानाकर्षण

वैशाख २६, २०७७ शुक्रबार २०:१७:३८ | रासस

काठमाण्डाै – विभिन्न राजनीतिक दलका नेताले कोरोनाका कारण विदेशमा अप्ठ्यारोमा परेका नेपालीलाई आवश्यक व्यवस्थापन गरी तत्काल उद्धार गर्नुपर्नेमा जोड दिनुभएको छ ।

प्रतिनिधिसभाको आजको बैठकमा समाजवादी पार्टीका नेता एवं पूर्वप्रधानमन्त्री डा बाबुराम भट्टराईले कोरोनाका कारण विदेशमा लाखौँको सङ्ख्यामा रहेका नेपालीले ठूलो सङ्ख्यामा रोजगारी गुमाएर स्वदेश फर्कने निश्चित भएको उल्लेख गर्दै ती नेपाली नागरिकका बारेमा बेलैमा गम्भीर भएर सोच्नुपर्ने बेला भएको बताउनुभयो । कोरोनाका कारण देशभित्रै पनि दैनिक ज्यालादारी गर्ने र निम्न आर्थिक भएका मजदुरको समस्या पनि गम्भिर भएको उल्लेख गर्दै त्यसतर्फ सरकारको उचित ध्यान जान नसकेको टिप्पणी गर्नुभयो ।

नेता डा भट्टराईले कोरोना परिक्षणको सङ्ख्या नगन्य मात्र गरिएको बताउँदै परीक्षणको दायरा बढाउनुपर्नेमा पनि ध्यानाकर्षण गराउनुभयो । कोरोनाको सङ्कटमा सरकारले अध्यादेश किन ल्याउनुपर्‍यो भनी प्रश्न गर्दै उहाँले प्रमुख प्रतिपक्षी दलको सहभागीता हुने गरी गरिएको संबैधानिक व्यवस्था भत्काउन नहुने धारणा व्यक्त गर्नुभयो ।

साथै उहाँले लकडाउनका बेला सांसदलाई रातारात किन काठमाडौँ ल्याउनुपर्‍यो भन्ने विषयमा सामान्य मानिसले पनि बुझ्ने बताउँदै सो बारेमा प्रहरीले जाहेरी लिन्न भन्नु दुुःखद् भएको उल्लेख गर्नुभयो ।

नेता भट्टराईले लकडाउनका कारण शैक्षिक गतिविधि बन्द रहेको अवस्थामा विद्यार्थीको भविष्यका बारेमा समेत सरकारको ध्यानाकर्षण गराउनुभयो । उहाँले महामारीका बेला अग्रभागमा रही काम गर्ने स्वास्थ्यकर्मी, सुरक्षाकर्मीलगायतप्रति सम्मान गर्नुभयो ।

जनताको जीवनरक्षामा केन्द्रित हुन माग

राष्ट्रिय जनता पार्टी नेपालका नेता राजेन्द्र महतोले कोरोना भाइरसको सङ्क्रमणका कारण अप्ठ्यारोमा परेका नेपाली नागरिकको जीवनरक्षामा केन्द्रित हुन सरकारलाई आग्रह गर्नुभयो ।

उहाँले कोरोनाका कारण ज्यान गुमााउनेप्रति श्रद्धाञ्जलि अर्पण र सङ्क्रमितको शीघ्र स्वास्थ्यलाभको कामना गर्दै अग्रपङ्क्तिमा रहेर खटेका स्वास्थ्यकर्मी, सुरक्षाकर्मीलगायतप्रति सम्मान व्यक्त गर्नुभयो ।

कोरोनाको परीक्षण तीव्र बनाउनुपर्ने र स्वास्थ्यकर्मीलाई आावश्यक सामग्री उपलब्ध गराउनुपर्ने नेता महतोको माग थियो । विदेशमा अप्ठ्यारोमा परेका नेपालीलाई उद्धार गर्न सरकारसँग आग्रह गर्दै उहाँले जनतालाई राहत र जनताको उपचारमा सरकारलाई केन्द्रित हुन ध्यानाकर्षण गराउनुभयो ।

संसद्को प्रथम अधिवेशनको समयमा आफूहरुले स्थिर र बलियो सरकार गठन भएकामा सुशासन र समृद्धि होला संविधान पनि पूर्ण होला, सबैका अधिकार सुरक्षित होलान भनी खुशी हुँदै सरकारलाई समर्थन गरेको बताउँदै आजको दिनसम्म आइपुग्दा अपेक्षा गरेका जनताले के पाए भनी प्रश्न गर्नुभयो ।

राष्ट्रिय जनमोर्चाका सांसद दुर्गा पौडेलले भारतका विभिन्न स्थानमा अप्ठ्यारोमा परेका नेपालीका तत्काल उद्धार गरी व्यवस्थापन गर्न माग गर्नुभयो । साथै रोजगारी गुमाएका लाखौँ नेपालीको दीर्घकालीन समस्या समाधानका लागि समय मै श्रमसँग जोड्नु जरुरी रहेको उल्लेख गर्नुभयो । स्वास्थ्य सामग्रीमा देखिएको अनियमितताका दोषीलाई कारवाही गर्न उहाँले माग गर्नुभयो ।

नेपाल मजदूर किसान पार्टीका सांसद प्रेम सुवालले कोरोनाका कारण उत्पन्न सङ्कटका बेला राहतसमेतमा पक्षपात भएको गुणस्तरहीन खाद्यान्न वितरण भएको बताउँदै कोरानाको रोकथाम र यसको प्रभावबाट उत्पन्न समस्या समाधानका लागि सरकार केन्द्रित हुनुपर्ने धारणा व्यक्त गर्नभयो । साथै उहाँले कोराना परीक्षण गर्ने आरडिटी विधि भरपर्दो नभएको भन्दै बन्द गर्न मागसमेत गर्नुभयो ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)