यूएईमा पासपोर्ट नवीकरणका लागि निःशुल्क घुम्ती सेवा सुरु

 चैत ८, २०७७ आइतबार १७:५२:४२ | उमाकान्त पाण्डे

यूएई – संयुक्त अरब एमिरेट्स यूएईमा एमआरपी पासपोर्ट  नवीकरणका लागि घुम्ती सेवा सुरु गरिएको छ । स्थानीय कानुन अनुसार यूएईमा दर्ता भएको नेपाली संस्था नेपाल एसोसिएशन(एनए)ले यूएईका विभिन्न राज्यहरुमा घुम्ती सेवा सुरु गरेको हो ।

नेपाल एसोसिएसनले यहाँको कम्युनिटी डेभलपमेण्ट अथोरिटीसँग अनुमति लिएर यूएईमा रहेको नेपाली दूतावाससँगको समन्वयमा अघिल्लो साताबाट साप्ताहिक रूपमा राहदानी नवीकरणका फारम संकलन गरिरहेको छ ।

पहिलो चरणमा बनाएका एमआरपीको म्याद सकिन लागेपछि पासपोर्ट नवीकरण गर्नेको दूतावासमा भीड बढेको थियो । भीड बढेसँगै दूतावासका आधा दर्जन स्थानीय कर्मचारीमा एकै पटक कोरोना सङ्क्रमण भएको थियो । 

कर्मचारीमा कोरोना सङ्क्रमणको जोखिम बढेपछि दूतावासले प्रत्यक्ष फारम भर्ने काम बन्द गरेर अनलाइन फारम भर्ने,  कुरियर गरेर दूतावासमा पठाएको फारम पनि मान्य हुने भनेको थियो । त्यसपछि भने दूतावास भएको ठाउँ आबुधाबीभन्दा टाढा रहेका नेपालीले सहज महसुस गरे ।

तर फारम भर्ने निश्चित मापदण्ड भएकाले आम श्रमिकले सजिलै फारम भरेर दूतावाससम्म पुर्‍याउन सकेनन् । त्यसैले यहाँ कार्यरत धेरै नेपालीले समयमै राहदानी नवीकरण गर्न नसक्ने भएपछि नेपाल एसोसिएसनले घुम्ती सेवा सुरु गर्न तत्परता देखाएको हो ।

एसोसिएसनले ११ मार्चमा दुबईमा रहेको आफ्नै केन्द्रीय कार्यालयमा २५ जनाको पासपोर्ट नवीकरणका लागि फारम भर्ने र संकलन गर्ने काम गरेको थियो । त्यस्तै गएको शुक्रबार पनि दुबईमा रहेको एनएको कार्यालयमा १ सय १० जना नेपालीको फारम भर्ने र नवीकरणका लागि फारम दूतावाससम्म पुर्‍याएको थियो ।

कोरोनाका कारण दुबईबाट आबुधाबी जान झन्झटिलो हुने भएकाले एसोसिएसनले कुरियर कम्पनीसँग सम्झौता गरेर फारम दूतावाससम्म पुर्‍याउने गरेको एसोसिएशनका अध्यक्ष रमेश श्रेष्ठले बताउनुभयो ।

घुम्ती सेवामार्फत फारम भर्ने, प्रिन्ट गर्ने, एमआरपी फोटो खिच्ने र कागजात मिलाएर दूतावाससम्म पठाउने गरिन्छ ।

एसोसिएसनले यूएईको फूजेरा राज्यमा २६ मार्चमा, अजमानमा २ अप्रिलमा, रसअल खेमामा ९ अप्रिलमा, अलऐनमा १६ अप्रिल , सारजाह २३ अप्रिलमा घुम्ती सेवा राखिएको जनाएको छ । घुम्ति सेवामार्फत पासपोर्ट नवीकरणका लागि नागरिकताको कपी र सक्कल राहदानीसहित एमआरपी फोटोका लागि बिना कुनै मेकअप गरगहना नलगाई उपस्थित हुन अनुरोध गरेको छ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ। 

1 Comments

  • Dipesh

    March 22, 2021, 2 p.m.

    सार्जाहको कुन ठाउँमा होला यो शिविर अनि समय पनि जानकारी गराउनु भए धेरै सजिलो हुने थियो ।

तपाईको प्रतिक्रिया

समाचार

लोकप्रिय

१

एनपीएलको उद्घाटन खेलकाे सबै टिकट बिक्री, ३३ लाख रुपैयाँभन्दा धेरै आम्दानी

२

युक्रेनद्वारा रुसमाथि अमेरिकी क्षेप्यास्त्र आक्रमण

३

खाँडाचक्र नगरपालिकाका निमित्त प्रमुख प्रशासकीय अधिकृत जिम्मेवारीबाट हटाइए

४

चितवन राइनोजका समर्थकलाई निःशुल्क बस र खाजाको व्यवस्था

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

सीप नसिकी विदेश जाँदा पछुतो भयो, अब त बिना सीप जान्न भो

विदेशको काम, सीप भए हुन्छ सुरक्षा र राम्रो दाम

मेरो कथा मेरो भोगाई