परदेशमा रमेन मन : घरदेश फर्केर व्यावसायिक बंगुर पालन

चैत १४, २०७७ शनिबार १३:४५:८ | श्यामशितल परियार

लमजुङ – जीवन धान्नकै लागि कामकाे सिलसिलामा नेपालबाट भारत जानेकाे लहर लामाे हुन्छ । आजभन्दा २ दशक अघि त्यही लहरमा मिसिनुभएकाे थियाे सुन्दरबजार नगरपालिका–९, भोटेओडारका योगबहादुर थापा मगर पनि ।

भारतमा उहाँले मजदुरीका साथै गार्मेन्ट उद्योगमा पनि रोजगारी गर्नुभयो । दुःख गरेअनुसारको कमाइ पनि राम्रै थियो । तर ‘परदेशमा मात्रै कति बस्नु, अब परदेशमा होइन घरदेशकै माटोमा केही उद्यम गर्नुपर्छ’ भन्ने लाग्यो, उहाँलाई । त्यसपछि उहाँ २०६९ सालमा भारत छोडी घर आउनुभयाे, गाउँघरमै केही गर्ने सपना बाेकेर ।

स्वदेशमै उद्यम

‘भारतमा लामो समय नोकरी गरियो । कमाइ राम्रै थियाे’ उहाँले भन्नुभयो, ‘अबको समय गाउँघरकै माटोमा पसिना बगाउनुपर्छ । उद्यम गर्नुपर्छ भनेर भारत छोडेर घर फर्किएँ ।’

स्वदेश फर्किएर उहाँले ‘मगर फ्रेस हाउस’ चलाउनुभयो । फ्रेस हाउससँगै उत्पादनका क्षेत्रमा पनि लाग्नुपर्छ भनेर बंगुर पालन गर्ने योजना बनाउनुभयो र बंगुर पालन व्यवसाय सुरु गर्नुभयो । परिवारको सरसल्लाहमा उहाँले २०७७ साल कात्तिकबाट व्यवसायिक बंगुर पालन व्यवसाय सुरु गर्नुभएको हो ।

याेगबहादुरले सुन्दरबजार नगरपालिका–९, पैह्रेमा झण्डै २ रोपनी जग्गा भाडामा लिएर व्यावसायिक बंगुर पालन सुरु गर्नुभएको हो । सुरुमा उहाँले बंगुरका २ पाठा र ३ पाठीबाट यस बंगुर पालन व्यवसाय सुरु गर्नुभएको हो ।

बंगुरको मासुको माग र मूल्य राम्रो रहेकाले आफुले बंगुर पालन गरेको उहाँले बताउनुभयो ।

‘सुरुमा ६० हजारको लगानीमा यो व्यवसाय सुरु गरेको हुँ,’ याेगबहादुरले भन्नुभयो, 'अहिले फर्ममा ६ लाख बढी लगानी भइसकेको छ ।'

अहिले उहाँको बंगुर पालन व्यवसाय थप विस्तार भएको छ । अहिले उहाँले सञ्चालन गरेको ‘सुनिल पशुपन्क्षी फर्म’मा साना-ठूला गरी ३५ बंगुर पालिएका छन् । उहाँले ३ वटा सुधारिएको बंगुर फर्ममा बंगुर पाल्दै आउनुभएको छ ।

साँझ–बिहान उहाँको समय बंगुर फर्ममै बित्ने गर्छ । फर्म सञ्चालनमा परिवारको पनि उत्तिकै साथ–सहयोग मिलेकाे छ ।

‘बंगुरकै रेखदेख, दानापानी, सरसफाइमा समय बित्छ । परिवारको पनि उत्तिकै सहयोग छ,’ उहाँले बंगुरकाे हर सुमसुम्याउँदै भन्नुभयो, 'परदेशमा भन्दा घरदेशको आफ्नै उद्यममा राम्राे नि ।'

यसाे भनिरहँदा ६१ वर्षीय याेगबहादुर अलि भावुक देखिनुभयाे ।

वार्षिक १० लाख आम्दानी हुने

उत्पादन लिन सुरु भएसँगै वार्षिक ८ देखी १० लाख हाराहारीमा आम्दानी हुने उहाँले बताउनुभयो ।

‘सुरुवातका चरणमा छौँ । अब उत्पादन हुँदैछ । उत्पादन बिक्रीबाट राम्रो आम्दानी हुनेमा ढुक्क छु,’ बंगुरलाई दाना हाल्दै उहाँले भन्नुभयो, ‘एक सय हाराहारीमा बंगुर पाल्ने सोच छ, वार्षिक ८/१० लाख रुपैयाँ आम्दानी गर्ने लक्ष छ ।’

उत्पादन आफ्नै फ्रेस हाउसबाट बिक्री गर्ने उहाँकाे साेच छ । उत्पादन स्थानीय बजारमा सजिलै बिक्री हुन्छ ।

बिस्तारै बंगुरपालनलाई व्यवस्थित र विस्तार गर्दै लैजाने उहाँको सोच छ । यसकाे लागि याेगबहादुरले मासु उत्पादनका साथै बंगुरको पाठापाठी उत्पादनमा जोड दिनुभएकाे छ । पाठापाठी उत्पादन गरी बिक्री गर्न सके राम्रो आम्दानी हुने उहाँ बताउनुहुन्छ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)