बर्दिया निकुञ्जबाट तीन थान भरुवा बन्दुकसहित महिला पक्राउ, चार सिकारीको खोजी हुँदै

मंसिर २४, २०७५ सोमबार १६:७:५१ | भावुक योगी

बर्दिया – बर्दिया राष्ट्रिय निकुञ्ज सुरक्षार्थ खटिएको नेपाली सेनाले निकुञ्जको उत्तरी क्षेत्रबाट तीन थान भरुवा बन्दुक र विभिन्न बन्दोबस्तीका सामाग्रीसहित एकजना महिलालाई पक्राउ गरेको छ ।

निकुञ्जको उत्तरी क्षेत्रमा पर्ने खयरभट्टी पोष्टबाट निकुञ्ज सुरक्षार्थ खटिएको शिव दल गणको नेपाली सेनाको टोलीले स्वीप अपरेसन गस्ती गर्दै गएका बेला निकुञ्जको उत्तरी क्षेत्रमा पर्ने पाताचुली इलाकाको खोँचमा लुकाई राखेको अवस्थामा तीन थान भरुवा बन्दुकसहित एकजना महिलालाई पक्राउ गरेको हो ।

निकुञ्जको उत्तरी क्षेत्र तेलपानी नजिकको पाताचुली इलाकाबाट सेनाले सुर्खेत शुकरमाला कि ५० वर्षीया नन्दकली खत्रीलाई तीन वटा भरुवा बन्दुक र विभिन्न बन्दोबस्तीका सामाग्रीसहित पक्राउ गरेको बर्दिया निकुञ्ज सुरक्षार्थ खटिएको शिव दल गण ठाकुरद्वाराका गणपति प्रमुख सेनानी चन्द्रप्रसाद चापागाईँले जानकारी दिनुभयो ।

निकुञ्ज सुरक्षार्थ खटिएको नेपाली सेनाको टोलीले तीन नाल भरुवा बन्दुकसहित १५ थान फलामको गोली, केप १ थान, बारुद ३ सय ग्राम, गन्धक बारुद १ पाकेट, ४ किलो वन्यजन्तुको सुकुटी, २ किलो बाेसाेलगायत सिकार खेल्न प्रयोग गरिने थुप्रै बन्दोबस्तीका सामाग्रीहरु पनि बरामद गरेको छ ।

अनुसन्धानका क्रममा पक्राउ परेकी महिलाले चार जना शिकारी रहेको बताएपछि उनीहरुको पनि खोजी भइरहेको निकुञ्ज सुरक्षार्थ वी दल गणका गणपति चापागाईँले बताउनुभयो । महिलाले दिएको बयानका आधारमा सिकारीहरु पनि पक्राउ गर्ने उहाँले बताउनुभयो ।

घटनाका सम्बन्धमा अनुसन्धान भइरहेको उहाँले बताउनुभयो । पक्राउ परेकी महिलाले शिकारीलाई खाना पकाएर खुवाउनेलगायत शिकारीलाई विभिन्न सहयोग गर्दै आएको बताएकी छन् । निकुञ्जको कोर एरियामा शिकारी बसेको गोप्य सूचनाको आधारमा दुई दिनदेखि स्वीप अपरेसन गर्ने क्रममा ती महिलालाई हतियारसहित पक्राउ गरिएको सुरक्षा संयन्त्रले जानकारी दिएको छ ।

पछिल्लो समय बर्दिया निकुञ्जमा सेनाले गस्ती अपरेसन तीव्र पारेको छ । केही दिनअघि नेपाली सेनाको सहयोगमा निकुञ्ज प्रशासनले मध्यवर्ती क्षेत्रमा चिरानी गरी लुकाई राखेको ३ सय २३ क्युफिट सालका चिरान काठ समेत बरामद थियो ।

निकुञ्जले सवारी गस्ती गर्न नसक्ने स्थानहरुमा छिटो पुग्नका लागि नेपाली सेनालाई २० वटा साइकल समेत उपलब्ध गराएको छ । निकुञ्ज सुरक्षार्थ खटिएको नेपाली सेनाले निकुञ्जमा हुने अवैध गतिविधि रोक्न पैदल गस्तीसँगै मोटरसाइकल, साइकल, हात्ती र सवारी गस्तीलाई प्राथमिकता दिएको छ ।

अन्तिम अपडेट: मंसिर १०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

भावुक योगी

बर्दियाका उज्यालो सहकर्मी भावुक योगी बर्दियाको रेडियो टाइगरमा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्