युएईमा कामदारका गुनासो : नेपालीबाटै ठगिनेदेखि सम्बन्धविच्छेदसम्म

वैशाख २६, २०७५ बुधबार १२:३२:५० | उज्यालो सहकर्मी

उमाकान्त पाण्डे/उज्यालो ।

वैशाख २३ – युएईमा रहेको नेपाली दूतावास सचेतना अभियान लिएर नेपाली कार्यरत कम्पनीका मजदुर क्याम्पसम्म पुगेको छ । सचेतना कार्यक्रम लिएर मजदुर क्याम्पमा पुग्ने प्रतिनिधिसँग धेरै कामदारले एउटै समस्याबारे गुनासो गरेका छन् ।

दूतावासले अहिलेसम्म आबुधाबीमा मात्रै दुई ठूला कम्पनीका मजदुर क्याम्पमा कार्यक्रम गरेको थियो । कार्यक्रममा सहभागी धेरैले वैदेशिक रोजगारीका कारण आफूले भोगेका समस्या खुलेर सुनाएका थिए । उनीहरुले युएईमा नेपालीबाट नै आफूहरु ठगिएको बताएका थिए ।

काम लगाइदिने भन्दै भिजिट भिसामा ल्याएर अलपत्र पार्ने, कम्पनीका मागपत्र देखाउदै ठगी गर्ने र मोटो रकम लिएर अलपत्र पार्ने गरेको कामदारले गुनासो गरे । मजदुर क्याम्प भइरहेको कार्यक्रममा भिजिट भिसामा ल्याएर अलपत्र पारेको, अरु काम भनेर महिलालाई घरेलु काममा प्रयोग गरेको, समयमा तलब सुविधा नपाएको गुनासो राखेको श्रम सहचारी मोतीराम भुषालले उज्यालोलाई जानकारी दिनुभयो ।

यिनै समस्याका कारण कामदार शारीरिक तथा मानसिक हिंसाको सिकार हुनु परेको भुसालको भनाइ छ । नेपाली कामदारसँग प्रत्यक्ष भेटेर गुनासो सुन्ने कामलाई दूतावासले निरन्तरता दिने पनि कार्यवाहक राजदूत सागरप्रसाद फुँयालले बताउनुभयो ।

‘सबै कम्पनी उस्तै छैनन्, हामीहरु सुरक्षित त छौं तर समान ज्याला भने पाएका छैनौं,’ आबुधाबी नेशनल होटलमा कार्यरत उर्लाबारीकी रमिला श्रेष्ठले गुनासो गर्नुभयो । ‘उही काम गर्ने अरु देशका साथीको तलब धेरै छ हाम्रो थोरै किन,’ श्रेष्ठले सवाल गर्नुभयो ।

यस्तै सवाललाई सम्बोधन गर्न नेपालले युएईसँग श्रम सम्झौता गर्ने तयारी गरिरहेकोबारे दूतावासका प्रतिनिधिले आफूलाई भनेको श्रेष्ठले बताउनुभयो ।

कामदारको भिसा सकिएपछि पनि कम्पनीले भिसा अवधि नथपी अवैधानिक बनाएको, बिभिन्न कम्पनीको डिमाण्ड देखाएर नेपालीले नेपालीलाई ठगेको, कम्पनीमा उचित खाना तथा बासको व्यवस्था नभएको, कम्पनी छोडेर कागजातविहीन हैसियतमा काम गर्नुपरेको जस्ता गुनासो दूतावासमा आउने गरेकाले यस सम्बन्धमा थप सचेतना कार्यक्रम आवश्यक भएको दूतावासले जनाएको छ ।

परदेशको कमाइले पारिवारमा सुखसँगै सम्बन्धमा विचलन देखिने पछिल्ला घटनाले समेत सरोकारवाला चिन्तित छन् । परदेश बसाइले घरायसी झगडा बढाउने मात्रै नभएर सम्बन्धविच्छेदसम्मको अवस्था आएका छन् । सम्बन्धविच्छेदको समस्या लिएर दूतावास आउनेको संख्या पछिल्लो समयमा बढेको छ । त्यस्ता समस्या कम्पनीका मजदुर क्याम्पमा पुग्दासमेत पाएको श्रम काउन्सिलर भेषबहादुर कार्कीले बताउनुभयो ।

मजदुर क्याम्पमा गरिने सचेतना कार्यक्रम अबुधाबीमा गएको मार्च २० र २७ तारिखमा भएको थियो । कार्यक्रममा एक सय भन्दा धेरै कामदारले सहभागीता जनाएका थिए । कार्यक्रममा दूतावासले युएईका विभिन्न जेलमा रहेका नेपालीको अवस्था, कामदार सचेतना सम्बन्धी जानकारी, युएईमा रहदाँ अपनाउनु पर्ने कानूनी प्रक्रिया लगायकाबारेमा छलफल गरेको द्वितीय सचिव कृष्ण अर्यालले जानकारी दिनुभयो । कार्यक्रममा कम्पनीका व्यवस्थापकले पनि सहभागिता जनाएका थिए ।

कतिपय कामदारले लिखित रुपमा गुनासो राखेका छन् । ती गुनासो सरकारमा पु¥याउने दूतावासले जनाएको छ । परराष्ट्र, श्रम, पर्यटन, तथा अन्य सम्बन्धित मन्त्रालय अन्तरगतबाट अनुमति पाएका कार्यक्रम नेपाली कामदार रहेका मुख्य चार मजदुर क्याम्पमा गर्ने योजना अनुरुप दूतावासले सचेतना अभियान थालेको हो । थप कार्यकमका लागि सम्बन्धित कम्पनीसँग समन्वय गर्न दूतावासकी द्वितीय सचिव बिष्णु अधिकारीलाई जिम्मेवारी दिइएको छ ।

अन्तिम अपडेट: मंसिर ५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्