यूएईसँगको श्रम सम्झौताको मस्यौदामा आज छलफल हुँदै

माघ १६, २०७५ बुधबार ८:१४:१७ | उमाकान्त पाण्डे

यूएईसँगको श्रम सम्झौताको मस्यौदामा छलफल गर्न प्राविधिक टोली मंगलबार यूएई आइपुगेको छ । सरकारले श्रम सम्झौता (एमओयूको) मस्यौदा टुंगो लगाउन पठाएको प्राविधिक टोलीले बुधाबार यूएईको श्रम तथा मानव संसाधन मन्त्रालयमा छलफल गर्दैछ ।

ओमानसँगको छलफलपछि प्राविधिक टोली मंगलवार यूएई आइपुगेको र बुधबार यहाँ छलफल सुरु गर्ने नेपाली दूतावास यूएईले जनाएको छ। छलफलमा सहभागी प्राविधिक टोलीले आफ्ना कामदारको सुरक्षा, सेवा सुविधा, र शून्य लागतलगायतका विषयमा कुरा राख्दैछ । छलफल बिहीबारसम्म चल्नेछ ।

यूएईले झण्डै डेढ महिना पहिले सम्झौताको खाका नेपाललाई पठाएको थियो । यो मस्यौदामा धेरै सकारात्मक विषय भए पनि मस्यौदामा समावेश नभएका वा थप प्रष्ट हुनुपर्ने विषयमा समेत टोलीले आफ्नो धारणा राख्ने छ । छलफलका आधारमा सम्झौताको अन्तिम खाका तय हुनेछ ।

प्रस्तावमा सहमति भएका विषयलाई दुवै पक्षले मन्त्रीस्तरमा जानकारी गराउने र मन्त्रीस्तरको छलफलपछि मात्र सम्झौतामा हस्ताक्षर गरिने कार्यबाहक राजदूत सागरप्रसाद फुयाँलले उज्यालोलाई जानकारी दिनुभयो ।

सरकारले श्रम सम्झौताको मस्यौदा टुंगो लगाउन श्रम रोजगार तथा सामाजिक सुरक्षा मन्त्रालयका सहसचिव तथा वैदेशिक रोजगार महाशाखा प्रमुख डाक्टर रामप्रसाद घिमिरेको नेतृत्वमा पाँच सदस्यीय टोली पठाएको छ ।

यूएईसँग सन् २००७ मा गरिएको श्रम सम्झौता नवीकरण गर्न लागिएको हो । मलेसिया, यूएई, ओमान, कतार तथा खाडी देशसँग श्रम सम्झौता गर्ने र त्यसलाई थप प्रभावकारी बनाउन श्रम रोजगार तथा सामाजिक सुरक्षा मन्त्री गोकर्ण बिष्टको प्रस्तावमा सरकारले कार्यदल बनाएर काम गरिरहेको छ ।

यूएईमा अहिले झण्डै साढे दुई लाख नेपाली कामदार विभिन्न क्षेत्रमा कार्यरत रहेको तथ्यांक छ ।

अन्तिम अपडेट: मंसिर १०, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्