उच्च रक्तश्रावका कारण सुत्केरी महिलाको मृत्यु

माघ २१, २०७५ सोमबार १८:४३:६ | डीबी बिष्ट

बझाङ – खप्तड छान्ना गाउँपालिकाको दुर्गम बस्ती बडाकोट घर भएकी ४० वर्षीया उजली देवी थापाको सुत्केरी भैसकेपछि उच्च रक्तश्रावका कारण मृत्यु भएको छ ।

आइतबार राति घरमा खाना खाइसकेपछि सुत्केरी व्यथा लागेकी थापालाई पाटादेवल स्वास्थ्य चौकीको प्रसूति केन्द्रमा लैजाँदै गर्दा बीच बाटोमै सुत्केरी हुनुभएको थियो । सुत्केरी भइसकेपछि अब घरमै लगौँ भनेर आफन्तहरुले थापालाई घरमा ल्याए ।

सुत्केरी हुँदा अत्यधिक रक्तश्राव भएका कारण मध्यरातमा उहाँको मृत्यु भएको मृतकका आफन्त मुकेश थापाले बताउनुभयो । वडाकोटबाट पाटादेबल स्वास्थ्य चौकीको प्रसूति केन्द्रमा जान ३ तीन घण्टाकोे पैदल बाटो हिँड्नुपर्छ । गाउँमा पनि दक्ष स्वास्थ्यक्रर्मी नहुँदा उपचार हुन नसकेपछि उहाँको मृत्यु भएको हो । छोरीको अवस्था भने सकुशल रहेको बताइएको छ ।

मृतकका श्रीमान रोजगारीका लागि भारत जानुभएको छ भने घरमा उहाँका दुई छोरा र एक छोरी छन् । जेठो छोराबाट नाति समेत पाइसक्नुभएकी थापाको उमेर ढल्केसँगै कमजोरी बढेकाले मृत्यु भएको बताइएको छ ।

छोरा छोरीको रहर पूरा भइसकेको र अनिच्छामा गर्भ रहेकाले आफूलाई अप्ठ्यारो महसुस भएको भन्दै थापाले बताउने गरेको उहाँका आफन्तहरुको भनाइ छ ।

उहाँले अगाडिका बच्चाहरु पनि घरमै जन्माउनुभएको थियो । गाउँबाट स्वास्थ्यचौकी पनि टाढा रहेको र जिल्ला अस्पताल झनै टाढा रहेकाले छोरा बुहारीले तथा आफन्तले पनि ठिक भैहाल्छ होला भन्ने सोचेका थिए । तर उच्च रक्तश्रावका कारण थापाको मृत्यु हुन पुग्यो ।

गाउँमा स्वास्थ्य चौकी छैन । स्वास्थ्य चौकी टाढा भएकाले समान्य स्वास्थ्य समस्या हुँदा समेत यहाँका स्थानीयहरुले निकै समस्या झेल्दै आएका छन् ।

झण्डै तीनसय परिवार रहेको बयाना, बडाकोट गाउँमा प्रसूति केन्द्रका लागि महिलाहरुले बारम्बार पहल गरे पनि हालसम्म यहाँ प्रसूति केन्द्र स्थापना हुन सकेको छैन ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्