पूर्वाधार विकासको पर्खाइमा छ सुन्दरताको खानी ‘सोलेडाँडा’ (फोटोफिचर)

 फागुन १८, २०७५ शनिबार १६:३४:९ | प्रताप बानियाँ

म्याग्दी – सिरसिर बतास चलिरहने ठाउँ । पहाडको उच्च र सम्म परेको भू–भाग । वरिपरी घना वनजङ्गलले घेरिएको । चराचुरुङ्गीको चिरबिर–चिरबिर आवाज सुन्न पाइने । पर्यटकीय हिसाबले सम्भावना बोकेको ठाउँ ओझेलमा परेको छ । पर्यटकीयस्थल भए पनि ओखरबोटको सोलेडाँडा ओझेलमा पर्न गएको हो । 

प्रशस्तै मात्रामा पर्यटकीय सम्भावना भएर पनि ओखरबोटको सोलेडाँडा पूर्वाधार विकासको पर्खाइमा रहेको छ । पहाडको उच्च भागमा अवस्थित म्याग्दी जिल्ला र छिमेकी बागलुङ जिल्लाको सिमानामा पर्ने पर्यटकीयस्थल सोलेडाँडाले वर्षौंदेखि विकासका पूर्वाधारहरुलाई पर्खिरहेको छ । 

पश्चिम म्याग्दीको मालिका गाउँपालिका–४, ओखरबोटमा पर्ने पर्यटकीयस्थल सोलेडाँडा पर्याप्त सम्भावना हुँदाहुँदै पनि पूर्वाधार विकास नहुँदा ओझेलमा पर्दै जान थालेको हो । 

सोलेडाँडासम्म सडकको पहुँच पुगे पनि अन्य पूर्वाधारहरुको विकास नहुँदा पर्यटकीय क्षेत्र सोलेडाँडाले अभाव झेल्दै आइरहेको छ । 

म्याग्दीको रुम, ओखरबोट र बागलुङको पश्चिमी तमान, लाम्मेला क्षेत्रमा फैलिएको सोलेडाँडामा सडक विस्तारसँगै आन्तरिक पर्यटकको गन्तव्य बने पनि आवश्यक पूर्वाधारको अभावमा समस्या भएको छ । सोलेडाँडामा सडक विस्तार भए पनि विकासका अन्य पूर्वाधारहरु बन्न सकेका छैनन् । 

ओखरबोट गाउँको शिरमा पर्ने सोलेडाँडा बागलुङको तमानखोला गाउँपालिकासँग जोडिएको छ । सोलेडाँडामा पछिल्लोपटक आन्तरिक पर्यटकको चहलपहल बढेको ओखरबोटका स्थानीय नन्दबहादुर घर्तीमगरले बताउँदै यसको विकासका लागि दुवै जिल्लाका सरोकारवालाले ध्यान दिनुपर्ने माग गर्नुभयो । 

म्याग्दी सदरमुकाम बेनीबाट यातायातमार्फत एकै दिनमा सोलेडाँडा पुग्न सकिन्छ । 

म्याग्दीका चर्चित लोकगायक खड्ग गर्बुजाले ‘हेर्दाहेर्दै कान्छीले सोलेडाँडा काट्यो मायालाई....... भन्ने बोलको गीत गाएर चिनाएको भए पनि पर्यटकीयस्थल सोलेडाँडामा अझै आवश्यक पूर्वाधारहरु बनेका छैनन् । 

सोलेडाँडा घुम्न आउने पर्यटकहरुको सङ्ख्या बढ्दै गए पनि त्यहाँ बस्नका लागि उचित ठाउँ नहुँदा समस्या हुने गरेको छ । 

पर्यटकीयस्थल सोलेडाँडा पुग्ने स्वदेशी र विदेशी पर्यटकहरुका लागि पूर्वाधारको आवश्यकता परेको छ । जिल्ला बाहिरबाट सडकमार्ग भएर आउने पर्यटकहरुका लागि सोलेडाँडामा व्यवस्थित खानेपानी, शौचालय, टेन्ट लगायतका आवश्यक पूर्वाधारहरुको विकास गर्नुपर्ने आवश्यकता देखिएको छ । 

यसैगरी खान र बस्नका लागि होटल, लज र रेष्टुरेन्ट समेत निर्माण गर्नुपर्नेछ । पिकनिक स्थलका लागि पनि यो ठाउँ उपयुक्त रहेको छ । 

म्याग्दीको पश्चिमी भेगसहित बागलुङको निर्वाचन क्षेत्र नं ३ अन्तर्गत पर्ने तमान, खुङ्खानी, बुङ्गादोभान र खुङ्गालगायत क्षेत्रका बासिन्दाले आफ्नो जिल्लाको सदरमुकाम बागलुङ पुग्न सोलेडाँडाको बाटो प्रयोग गर्दै आइरहेका छन् ।

बागलुङको पश्चिमी क्षेत्र ढोरपाटन, बुर्तिबाङ र तमानखोलाका स्थानीयवासी बागलुङ जानका लागि सोलेडाँडा भएर जाने गरेका छन् । उनीहरु बागलुङ जानका लागि सोलेडाँडाको बाटो छोटो हुने भएकाले म्याग्दी भएर जाने गर्दछन् । 

ढोरपाटन जाने विदेशी पर्यटकहरु पनि म्याग्दीको पश्चिमी क्षेत्र हुँदै सोलेडाँडा भएर ढोरपाटन र रुकुम जाने गरेका छन् । समुन्द्री सतहदेखि करिब तीन हजार मिटरको उचाइमा रहेको सोलेडाँडा सडक सञ्जालसँग जोडिएपछि बागलुङको विकट क्षेत्रका बासिन्दाले समेत तीन दिन लगाएर सदरमुकाम जानुपर्ने बाध्यता अन्त्य भएको छ । 

सोलेडाँडा सुन्दरताको खानी

पर्यटकीय क्षेत्र ओखरबोटको सोलेडाँडा सुन्दरताको खानीका रुपमा चिनिन्छ । सोलेडाँडाबाट आसपासका जङ्गलमा ढकमक्क फुलेका विभिन्न प्रजातिका लालीगुराँस, प्राकृतिक सुन्दरताको साथै धौलागिरि, गूर्जा, चुरेन, अन्नपूर्ण, निलगिरी, माछापुच्छे«लगायत आधा दर्जन हिमशृङ्खलाहरु देख्न सकिन्छ । 

सोलेडाँडामा चैत, वैशाखमा राताम्मे लालीगुराँस र पुस, माघमा सेताम्मे हिमालहरु देख्न पाइन्छ । यसैगरी लालीगुराँसको फुल समातेर हिमाललाई पृष्ठभूमिमा पारेर सेल्फी खिचेर रमाउन सकिन्छ । सोलेडाँडामा पुग्ने आन्तरिक पर्यटकहरु नजिकै रहेको गाँडाखसुङ तालमा पनि पुग्ने गरेका छन् । 

जडिबुटी र वन्यजन्तु पाइने

सोलेडाँडामा सुन्दरतासँगै पर्याप्त मात्रामा जडिबुटीहरु पाइन्छन् भने विभिन्न वन्यजन्तुहरु समेत भेटिन्छन् ।

यस क्षेत्रको वनजङ्गलमा सतुवा, निरमसी, तीतेलगायत महत्वपूर्ण जडिबुटीहरु पाइन्छ । त्यस्तै भुङ, खस्रुङ, गुराँस र गोब्रेसल्लाका रुखहरु सोलेडाँडाको वनजङ्गमा रहेका छन् । 

गुराँसको दारबाट बनेका ठेकामा राखेको दही र मोही खानका लागि एकदमै मीठो मानिन्छ । यो क्षेत्रमा रतुवा, मृग, बाघ, स्याल, चिर कालीज जस्ता बन्यजन्तु जनावर र पशुपंक्षीहरुको बासस्थान रहेको स्थानीयवासी बताउँछन् । 

हिउँमा रमाउन पाइने

पर्यटकीयस्थल सोलेडाँडामा पुस माघको महिनामा हिउँ परिरहने हुँदा त्यहाँ पुगेर हिउँ खेल्न पाइन्छ । हिउँसँग रमाएर आनन्द लिँदै मोबाइलमा सेल्फी खिचेर रमाउन सकिने सोलेको डाँडाबाट वरिपरीको दृश्यहरु निकै आकर्षक र मनमोहक देखिन्छ ।

यसपटक हिमाली क्षेत्रमा तीनचार पटकसम्म परेको हिउँ अझै पग्लिसकेको छैन । सोलेडाँडा पुग्ने सडकको दायाँबाया हिउँले ढपक्कै ढाकेको छ । सम्म परेको सोलेडाँडाको पाखामा रहेको हिउँको सिरकमाथि बसेर फोटो र भिडियो खिच्न सकिन्छ । 

दुई दिनको पैदलयात्रा सडक विस्तारसँगै चार घन्टामा सीमित भएपछि पश्चिम म्याग्दीका दरबाङ, देविस्थान, निस्कोट, रुमका विद्यालयबाट शिक्षक, विद्यार्थीहरु शैक्षिक भ्रमण तथा वनभोजका लागि सोलेडाँडा पुग्ने गरेका छन् । 

पर्यटकीय गन्तव्य बनाउनुपर्ने माग 

ओखरबोट र तमानखोला गाउँका स्थानीयबासिन्दाले पर्यटकीयस्थल सोलेडाँडालाई पर्यटकीय गन्तव्य बनाउनुपर्ने माग गरेका छन् । स्वर्गद्वारी पुग्न सजिलो र छोटो दूरीको मार्गका रुपमा समेत चिनिने सोलेडाँडालाई उनीहरुले पर्यटकीय गन्तव्य रुपमा विकास गर्नुपर्ने माग गरेका हुन् । 

होमस्टे, भ्यूटावरलगायत पर्यटकलाई आकर्षित गर्ने खालका पूर्वाधार बनाउन दुवै जिल्लाबाट लगानीको आवश्यकता रहेको तमानखोला गाउँपालिका–१, बागलुङका लालबहादुर रोकाको भनाइ छ । 

सोलेडाँडा पुग्ने सडक विस्तारका साथै मर्मतसम्भार गर्ने गरिएको बताउँदै मालिका गाउँपालिकाका उपाध्यक्ष खरमाया बिटालुले गुरुयोजना बनाएर पर्यटकीय क्षेत्रको विकास र पर्यटन प्रवद्र्धन गरिने बताउनुभयो । 
 

अन्तिम अपडेट: मंसिर १४, २०८१

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ । 

तपाईको प्रतिक्रिया

समाचार

लोकप्रिय

१

नेपालमा आयाेजना हुने काभा पुरुष भलिबल क्लब च्याम्पियनशिपमा ५ वटा टाेली

२

रामेछापमा जीप दुर्घटना हुँदा गोकुलगङ्गा–४ का वडा अध्यक्षसहित ५ जनाको ज्यान गयाे

३

एनपीएलको विजेताले एक करोड ११ लाख रुपैयाँ पुरस्कार पाउने

४

फिफा वरीयतामा नेपालको एक स्थान सुधार

विचार

उज्यालो टी भी

वैदेशिक रोजगारीमा जादा सुरक्षित हुने तरिका

मनोपरामर्शले बदलेको जीवन कथा

विदेशबाट श्रीमान् फर्काउने साहस बटुलेका वित्तीय कक्षा सहभागीका कथा

मेरो कथा मेरो भोगाई