व्यवसायीको आन्दोलनले वैदेशिक रोजगारीमा जानेको संख्या घट्यो, एअर अरेबियाको उडान कटौती

जेठ २१, २०७६ मंगलबार १५:४१:१९ | उज्यालो सहकर्मी

काठमाण्डौ – वैदेशिक रोजगार व्यवसायीले विदेश जाने कामदारको टिकट काट्न रोकेसँगै विमानस्थलमा यात्रुको संख्या घटेको छ । व्यवसायीले शुक्रबारदेखि टिकट काट्न बन्द गरेसँगै खाडी देश जाने यात्रुको संख्या घटेको हो ।

अहिले झण्डै ३० प्रतिशत यात्रु घटेको त्रिभुवन अन्तर्राष्ट्रिय विमानस्थलका महाप्रबन्धक राजकुमार क्षेत्रीले बताउनुभयो । यात्रुको संख्यासँगै दैनिक तीन उडान भर्दै आएको एअर अरेबियाले एउटा उडान घटाएर दुई वटा मात्रै उडान भरेको पनि उहाँले जानकारी दिनुभयो ।

फ्लाई दुबई, कतार एयरवेज, नेपाल एयरलाइन्स लगायत खाडी देशमा उड्ने विमानमा पनि यात्रुको संख्या घटेको छ । सरकारसँग राखेको पाँच बुँदे माग पूरा नभएको भन्दै व्यवसायीले शुक्रबारदेखि कामदारलाई विदेश पठाउन रोकेका छन् ।

सात दिनसम्म वैदेशिक रोजगारीमा जाने कामदारको टिकट नकाट्ने उनीहरुले घोषणा गरिसकेका छन् । उनीहरुको यो आन्दोलनका कारण बुधबारसम्म विमानस्थलमा यात्रुको संख्या घट्ने भएको छ ।

गएको जेठ ३ गते बसेको नेपाल वैदेशिक रोजगार व्यवसायी संघको विशेष भेलाले सरकारलाई १५ दिनको अल्टिमेटम दिंदै माग सम्बोधन नभए जेठ १७ गतेदेखि २३ गतेसम्म विदेश जाने कामदारको टिकट नकाट्ने निर्णय गरेको थियो ।

२३ गते बिहीबारदेखि भने पहिलेजस्तै नियमित रुपमा टिकट काटेर कामदार पठाउने संघका अध्यक्ष रोहन गुरुङले बताउनुभयो । तर सरकारले आफूहरुको मागबारे अहिलेसम्म कुनै प्रतिक्रिया नदिएको र माग सम्बोधन नगरेमा फेरि नयाँ कदम चाल्ने उहाँको भनाई छ ।

संघले वैदेशिक रोजगार ऐनमा व्यवस्था गरिएको धरौटीको ब्याज व्यवसायीले पाउनुपर्ने, मर्जर हुने संस्थालाई उपयुक्त सुविधा दिनुपर्ने, मलेसियासँग भएको समझदारी अनुसार श्रम, रोजगार तथा सामाजिक सुरक्षा मन्त्रालयमा सूचीकृत स्वास्थ्य संस्थाबाट स्वास्थ्य परीक्षण गरेर कामदारलाई मलेसिया पठाउने प्रक्रिया सुरु गर्नुपर्ने माग गरेको छ ।

यस्तै अहिले दूतावासहरुबाट भइरहेको मागपत्र प्रमाणीकरणलाई सहज बनाउन रोजगारदाता कम्पनीलाई यूजरनेम र पासवर्ड दिएर अनलाइन प्रणालीबाट मागपत्र प्रमाणीकरण गर्न दिन, व्यवसायीले कामदार पठाए बापत पाउनुपर्ने सेवा शुल्क दक्षिण एसियाली देशअनुसार हुनुपर्ने माग पनि संघले गरेको छ ।

अन्तिम अपडेट: मंसिर ९, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्