जनप्रतिनिधिको दबाबमा सीडीओको सरुवा: स्थानीयले बाजागाजासहित बिदाइ गरे

भदौ १५, २०७६ आइतबार १७:३२:५४ | डीबी बिष्ट

बझाङ – प्रमुख जिल्ला अधिकारी सुरेश सुनारको स्थानीय बासिन्दाले फूलमाला, बाजागाजासहित बजार परिक्रमा गराइ भव्यरुपमा बिदाइ गरेका छन् ।

जिल्ला प्रशासन कार्यालय बझाङबाट मोरङ जिल्लामा सरुवा भएर जानुभएका प्रमुख जिल्ला अधिकारी सुनारलाई सर्वसाधरणले बाजागाजासहित सदरमुकाम चैनपुर परिक्रमा गराउँदै बिदाइ गरेका हुन् । बझाङ जिल्लाको हकमा प्रमुख जिल्ला अधिकारीलाई बाजागाजासहित फूलमालाले बिदाइ गरिएको यो पहिलो घटना हो ।

गएको फागुन महिनामा बझाङ पुग्नुभएका सुनारले राजनीतिक प्रभावभन्दा पनि नागरिकको हकहितमा काम गरेको कारण आफूहरुले सुनारलाई फूलमालासहित बिदाइ गरेको सदरमुकाम चैनपुरका दिवसचन्द स्नेहीले बताउनु भयो ।

उहाँले भन्नुभयो, ‘यसभन्दा अघि धेरै प्रमुख जिल्ला अधिकारीहरु आए पनि उहाँहरुले भन्दा सुनारले गरेका हरेक कामहरु बेग्लै छन् । नागरिकता दिनु मात्रै ठूलो कुरा होइन, सुनारले जिल्लाको लागि गरेका धेरै राम्रो अन्य कामहरु पनि छन् । जथाभावी काटिने सडकलाई समेत उहाँले रोक्नुभएको छ । यो नै बझाङ जिल्लाका स्थानीयहरुका लागी खुशीको कुरा हो ।’

साईपाल गाँउपालिकाका अध्यक्ष राजेन्द्र धामीले सीडीओ सुनारले गाउँगाउँमा पुगेर बुढापाकाहरुलाई नागरिकता वितरण गरेको बताउनु भयो ।

फागुन महिनामा बझाङ पुगेका प्रमख जिल्ला अधिकारी सुरेश सुनार नेपालभरिकै कान्छा सीडीओ पनि हुनुहुन्छ ।

सिडीओको सरुवाको कारण बन्यो सडक

प्रमुख जिल्ला अधिकारी सुनारको सरुवाको मुख्य कारक भने सडक हाे । बझाङका प्रमुख जिल्ला अधिकारी सुरेश सुनारले डोजर नियमनको लागि अग्रसरता लिएपछि यहाँका जनप्रतिनिधि रुष्ट भएका थिए । सिडिओप्रति रुष्ट भएका जनप्रतिनिधिहरु उहाँको सरुवाको माग गर्दै डेलिगेशनसहित दिनहुँजसो गृह मन्त्रालय धाउन थालेपछि उहाँको सरुवा भएको बताइएकाे छ ।

विसं २०७५ फागुन १७ गते बझाङको प्रमुख जिल्ला अधिकारीे भएर आउनु भएका सुनारले विसं २०७६ जेठबाट डोजर नियमनको प्रयास गर्नुभएको थियो । बिना कुनै सर्भे र डिजाइन जथाभावी डोजर सञ्चालन गरी बनाइएका सडकका कारण जिल्लाका थुप्रै गाउँ जोखिममा परेको, धेरै मानिसको जीउ–धनको जोखिम बढेको र महिनैपिच्छे सडक दुर्घटना हुन थालेपछि सीडीओ सुनारको नेतृत्वमा जिल्ला प्रशासन कार्यालयले डोजर नियन्त्रणको प्रयास थालेको थियो ।

यसरी हचुवाका भरमा सडक निर्माण गर्ने कामलाई तत्काल रोक्न कार्यालयले पत्रकार गरेको थियो । तर बेवास्ता गर्दै चलाइएका डोजर नियन्त्रणमा लिन थालेपछि जनप्रतिनिधिहरु झस्किएका थिए ।

नेपाल सरकारले विसं २०७५ फागुन १ गतेबाट लागू हुनेगरी एक करोड रुपैयाँभन्दा कमका आयोजनामा डोजर प्रयोग नगर्न दिएको निर्देशन समेत अवज्ञा गरिएको गुनासो आएपछि प्रशासनले कारबाही गर्ने भनेर पत्राचार गरेको थियो । त्यसपछि जनप्रतिनिधि र प्रशासनबीच द्वन्द्व बढेको थियो ।

सीडीओको सरुवा माग गर्दै मन्त्रालय धाउने जनप्रतिनिधिहरुले भने आफूहरुसँग समन्वय नै नगरी काम गर्ने गरेको, नागरिकता दिनसमेत अप्ठ्यारो पार्ने गरेकोजस्ता आरोप सुनारमाथि लगाएका थिए ।

तर सर्वसाधारणले भने सुनारको खुलेरै प्रशंसा गरेका छन् । सांसद आशाकुमारी विकले पनि सुनारले बझाङमा बस्दा राम्रो काम गरेको बताउनु भयो । बिना सर्वेक्षण डोजर चलाएर जिल्ला ध्वस्त पारेको कुरा आफूले पटक–पटक संसदमा उठाएको र सीडीओले गरेको प्रयास प्रशंसनीय भएको उहाँले भन्नुभयो ।

यस्तै नेपाल कम्युनिष्ट पार्टीका जिल्लास्तरीय नेता नरेन्द्रबहादुर खड्काले पनि पछिल्लो समय सीडीओ सुनारले राम्रो काम गरेको र राम्रो काम गर्नेलाई सरुवा गर्नु दुर्भाग्यपूर्ण भएको बताउनु भयो । अब आउने सीडीओले पनि यही क्रमलाई निरन्तरता दिनुपर्ने उहाँको भनाइ छ ।

यता प्रमुख जिल्ला अधिकारी सुनारले पनि बझाङबाट धेरै कुराको पाठ सिकेको र आगामी दिनमा अझ राम्रो काम गर्ने बताउनु भयो ।

बझाङमा आफूहरुले चाहेको जस्तो काम नगर्दा सीडीओलाई जनप्रतिनिधिहरु मिलेर सरुवा गराउने अभ्यास छ । सर्वसाधारणले पनि सीडीओको सरुवालाई लिएर सामाजिक सञ्जालमा जनप्रतिनिधिहरुको चर्को आलोचना छन् ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

डीबी बिष्ट

डीबी बिष्ट बझाङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्