जनकपुर विमानस्थलमा राजपा सांसद साहद्वारा तोडफोड, व्यवस्थापक र सांसदबीच कुटाकुट

असोज २७, २०७६ सोमबार १७:२८:१५ | शैलेन्द्र महतो

धनुषा - राष्ट्रिय जनता पार्टी नेपालका एक जना सांसदले जनकपुर विमानस्थलमा तोडफोड गरेका छन् ।

उडान ढिलो भएको भन्दै सर्लाहीको निर्वाचन क्षेत्र नम्बर १ बाट निर्वाचित हुनुभएका प्रतिनिधि सभा सांसद प्रमोदकुमार साहले सोमबार जनकपुर विमानस्थलमा तोडफोड गर्नुभएको ह‍ो ।

बुद्ध एअरको विमानमा एक जना मिर्गाैलाका बिरामीलाई समयमै काठमाण्डौ पुग्नुपर्ने भए पनि बिहान ११:४० बजे आइपुग्नुपर्ने विमान दिउँसो साढे एक बजेसम्म नआएको भन्दै सांसद साहले तोडफोड गरेको स्थानीय प्रत्यक्षदर्शीले बताएका छन् । त्यसक्रममा सांसद साह र बुद्ध एअरका व्यवस्थापक प्रमुख विजयकुमार सिंहबीच कुटाकुट समेत भएको थियो ।

आफू आक्रोशमा आएर बुद्ध एअरको काउण्टरमा सामान्य तोडफोड गरेको सांसद साहले स्वीकार्नुभएको छ । विमानस्थलमा कर्मचारीको लापर्वाहीका कारण समय समयमा यस्ता घटनाहरु हुँदै आए पनि विमानस्थल प्रशासनले कुनै ध्यान नदिएको उहाँको गुनासो छ ।

जनकपुरधाम उपमहानगरपालिका ४ का ६५ वर्षीय सौखीलाल चौधरीलाई काठमाण्डौ पठाउनका लागि आफूले विमानस्थलका व्यवस्थापकहरुलाई पटक-पटक फोन गर्दा पनि कुनै चासो नदेखाएपछि बुद्ध एअरको काउण्टरमा तोडफोड गरेको सांसद साहले बताउनुभयो ।

यता बिरामी चौधरीले आफू बिहान ११ बजे नै आए पनि दिउँसो २ बजेसम्म पनि विमानस्थलका कर्मचारीहरुले कुनै वास्ता नगरेको र सांसद साहले आफ्नो अवस्था हेरेर आवेगमा आएको बताउनुभयो ।

बुद्ध एअरका व्यवस्थापक प्रमुख विजयकुमार सिंहले काठमाण्डौको प्राविधिक कारणले विमान ढिलाइ भएको र त्यसबारेमा यात्रुहरुलाई जानकारी गराउँदा पनि सांसद साहले काउण्टर तोडफोड र कर्मचारीसँग दुर्व्यवहार गरेको आरोप लगाउनुभयो ।

सांसद साहले तोडफोड गरेपछि केहीबेर विमानस्थलको अवस्था तनावग्रस्त बनेको थियो । बुद्ध एअरको त्यही उडानमा काठमाण्डौ जान लाग्नुभएका सांसद साहलाई बुद्ध एअरका कर्मचारी र व्यवस्थापक प्रमुख सिंहले विमान चढ्नबाट रोकेका थिए । त्यही क्रममा सांसद साह र व्यवस्थापक प्रमुखबीच हातपातसमेत भएको थियो ।

त्यसपछि धनुषा प्रमुख जिल्ला अधिकारी प्रदीपराज कँडेलकाे पहलमा सांसद साह विमानमा बसेर काठमाण्डौ जान सफल हुनुभयो ।

अन्तिम अपडेट: मंसिर ७, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शैलेन्द्र महतो

शैलेन्द्र महतो उज्यालोका धनुषा सहकर्मी हनुहुन्थ्यो।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्