वाउ ! क्या राम्राे हिमालपारीको स्याउबारी (तस्बिरमा)

साउन १५, २०७५ मंगलबार ९:१:२४ | श्यामशितल परियार

लमजुङ – दुई साताअघि तार्कुघाटकी प्रतिभा रानाभाट पहिलोपटक मनाङ पुग्नुभयो । मनाङको प्राकृतिक सौन्दर्यले उहाँलाई लोभ्याउनुसम्म लोभ्यायो । हिमालपारीको जिल्ला मनाङ पुगेको भोलिपल्टै उहाँ ङिस्याङ गाउँपालिका–१, भ्राताङमा रहेको स्याउ फार्ममा पुग्नुभयो ।

फल्दै गरेका राताम्य भएका स्याउ फार्ममा उभिएर प्रतिभाले ‘सेल्फी’ समेत लिनुभयो । एसियाकै सबैभन्दा ठूलो स्याउबारी (भ्राताङ स्याउबारी) ‘क्याप्सन’ लेखेरै उहाँले आफ्नो फोटो फेसबुकमा राख्नुभयो ।

उहाँका फेसबुकमा रहेका साथीभाई, आफन्तले ‘क्या राम्रो स्याउबारी’ भन्दै कमेन्ट गरे । कतिपय साथीले ‘स्याउ कोसेली ल्याउनु है’ भन्दै प्रतिभालाई फेसबुकको कमेन्ट बक्समै आग्रह पनि गरे ।

‘दक्षिण एसियाकै सबैभन्दा ठूलो स्याउ फार्ममा पुग्दा त म त छक्कै परेँ । साह्रै राम्रो लाग्यो । रमाइलो लाग्यो,’ प्रतिभाले मुस्कुराउँदै भन्नुभयो, ‘फेसबुकमा राखेको स्याउ फार्मको तस्बिरले पनि धेरैको मन खिचेछ ।’

उहाँमात्र होइन । अहिले मनाङ पुग्ने आन्तरिक होस् या बाह्य पर्यटक धेरैको चाह हुन्छ, भ्राताङको स्याउबारीसम्म पुग्ने, घुम्ने, रम्ने र तस्बिर खिच्ने ।

मनाङका सञ्चारकर्मी नेगम परियारलाई पनि भ्राताङको स्याउबारी निकै रमाइलो लाग्छ । छोरा र श्रीमतिको साथमा मनाङमै बसी पत्रकारिता गरिरहेका परियार समय मिलाएर स्याउबारी घुम्न गइरहनुहुन्छ ।

‘स्याउबारी असाध्यै रमाइलो छ । यहाँ आउने धेरै पर्यटक स्याउबारी घुम्न जान लालयित बन्छन् । विदाको समयमा त झन् यहाँ अवलोकन गर्न आउनेको घुईँचो नै लाग्छ,’ उहाँले भन्नुभयो ।

सबैको रोजाईँ बनेको भ्राताङको स्याउ फार्मका सञ्चालक प्रतिनिधिसभा सदस्य पोल्देन छोपाङ गुरुङ हुनुहुन्छ । गुरुङले सञ्चालन गरेको ‘एग्रो मनाङ कृषि फार्म’ ले भ्राताङमा स्याउ उत्पादन गर्दै आएको छ ।

२५ करोडको लगानी : ७ सय ३५ रोपनी जग्गामा स्याउखेती

गुरुङका छोरा एवम् फार्मका निर्देशक सम्राज गुरुङका अनुसार फार्मबाट गएको वर्ष मात्रै ३ सय टन स्याउ उत्पादन भएको थियो । यसवर्ष फार्मबाट ५ सय टन स्याउ उत्पादन हुनसक्ने उहाँको अनुमान छ ।

उहाँका अनुसार ७ सय ३५ रोपनी जग्गामा स्याउ खेती गरिएको छ । माथिल्लो मनाङ, टंकी मनाङ, खाङ्सार, टावल, पिसाङ र भ्राकाको संगोलमा रहेको ७ सय ३५ रोपनी जग्गा भाडामा लिई यहाँ स्याउ खेती गरिएको हो ।

‘एग्रो मनाङ कृषि फार्म’का निर्देशक सम्राजका अनुसार फार्ममा ३ थरीका स्याउ लगाइएको छ । फार्ममा सर्भिया र इटालीबाट गाला, गोल्डेन र फुजी जातका विरुवा ल्याएर स्याउ खेती गरिएको हो । फार्ममा २५ करोड बढि लगानी भैसकेको छ ।

५० जनालाई रोजगार

अहिले झन पिसाङमै स्याउको जुस उद्योग र कोल्ड स्टोर स्थापना गरिएसँगै यहाँ आउने मान्छेको संख्या बढ्न थालेको छ ।

स्याहार राम्रो हुन सके एउटै बोटबाट ४० देखि ५० केजीसम्म स्याउ उत्पादन हुने फार्मका सुपरभाइजर राजु तामाङले बताउनुभयो । फार्मममा ५० जनाले रोजगार पाएका छन् । यहाँबाट उत्पादित स्याउ देशका मुख्य शहर काठमाडौं, पोखरा चितवनसम्म पुग्छन् ।

गएको बुधबार गण्डकी प्रदेशका मुख्यमन्त्री पृथ्वीसुब्बा गुरुङलगायतको एक टोलीले भ्राताङमा रहेको स्याउ फार्मको निरीक्षण समेत गरेको छ । हिमाली भेगमा स्याउ खेती गर्न चाहनेका लागि सरकारले विशेष सहयोग गर्ने मुख्यमन्त्री गुरुङले बताउनुभयो ।

तस्बिर सौजन्य : राजन गुरुङ

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्