कोरोनाको कारण यसवर्ष बेँसी झर्न पाएनन् मुस्ताङबासी

मंसिर १२, २०७७ शुक्रबार १७:४५:४३ | प्रताप बानियाँ

म्याग्दी – हिमालपारीको जिल्ला मुस्ताङका स्थानीयवासिन्दाहरु यसवर्ष चिसो छल्नका लागि बेँसीतर्फ झर्न सकेका छैनन् । विश्वभर महामारीका रुपमा फैलिरहेको कोरोना भाइरस (कोडिभ–१९)को संक्रमणको जोखिमका कारणले गर्दा उनीहरु बढ्दो चिसोमा पनि यसपटक भने मुस्ताङमै बस्नुपर्ने बाध्यता सिर्जना भएको हो ।

विगतका वर्षहरुमा कात्तिक महिनाको सुरुआतसँगै जाडो छल्न मुस्ताङीहरु न्यानो क्षेत्रतर्फ लाग्ने गरेका थिए । तर यसवर्ष भने मंसिरको दोस्रो हप्ता बितिसक्दा पनि कोरोनाको डरले उनीहरु आफ्नो क्षेत्रबाट बाहिर निस्कन पाएका छैनन् । उपल्लो मुस्ताङको अधिकांश क्षेत्रहरु पुरै खाली हुने र तल्लो भेगमा पनि न्यून मात्रामा स्थानीयहरु बस्ने गरेको विगतलाई यसवर्ष कोरोनाले पुरै रोकिदिएको छ ।

कात्तिकदेखि बेंसी झरेर मुस्ताङीहरु फागुन, चैतमा पुनः मुस्ताङ फर्किन्थे । यसपटक कोरोना भाइरसको संक्रमणको जोखिमले स्थानीय आफ्नो थातथलो नछाड्ने मनस्थितिमा पुगेका छन् । विगतका वर्षहरुमा यो समयसम्म आइपुग्दा उपल्लो मुस्ताङमा १० प्रतिशतको हाराहारी मात्रै स्थानीय हुने गरेका थिए । तीमध्ये पनि वृद्धवृद्धा, भेडा गोठाला र घर कुरुवा मात्रै रहन्थे । लामो समयसम्म कोरोना संक्रमणको हिसाबले हेर्ने हो भने गण्डकी प्रदेशमा मुस्ताङ ‘ग्रीन जोन’मा रहेको थियो । तर पछिल्लो तथ्याङ्कअनुसार मुस्ताङमा पनि कोरोना भाइरसका संक्रमित बढेका छन् ।

पोखरा तथा काठमाण्डौमा घर हुनेहरुबाहेक अन्य स्थानीयबासी बेंसी नझरेको मुस्ताङका प्रमुख जिल्ला अधिकारी हिरादेवी पौडेलले जानकारी दिनुभयो । मुस्ताङको तापक्रम दिनहुँ घट्दो क्रममा रहेको छ भने अहिले जोमसोममा माइनस ६ र उपल्लो मुस्ताङमा माइनस १० डिग्री सेल्सियसमा तापक्रम झरेको जिल्ला प्रशासन कार्यालय मुस्ताङले जनाएको छ ।

मुस्ताङमा गएको असोज अन्तिम हप्तादेखि नै चिसो बढ्न सुरु भएको थियो । यसैगरी उपल्लो मुस्ताङको विभिन्न विद्यालयका विद्यार्थीहरुलाई घुम्ती विद्यालयमार्फत पोखरा लगेर पढाउने गरिएको भए पनि यसवर्ष कोरोना भाइरसकै कारण उनीहरु पोखरा जान सकेनन् ।

उपल्लो र मध्य मुस्ताङका स्थानीय प्राचीन समयदेखि नै गधा, घोडा र खच्चड धपाउँदै बालबच्चासहित हिउँदमा बेंसीका जिल्लाहरु म्याग्दी, पर्वत, कास्की, तनहुँ र चितवन हुँदै भारतसम्म पुग्ने गर्दथे । विभिन्न बस्तीमा पुगेर घुम्ती व्यापार गर्ने र भारतमा पुगेरै थोक व्यापारसम्म गर्ने मुस्ताङीहरु फागुन तथा चैत महिनापछि मात्रै तीनै गधा, घोडा र खच्चडमा खाद्यान्न बोकाएर घर फर्किन्थे । यसवर्ष भने कोरोना भाइरस संक्रमणको जोखिमले बाहिर जान सक्ने अवस्था छैन ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्