ढुलमुले नीति लिएर कांग्रेसले अवसर गुमाउनु हुँदैन : वरिष्ठ नेता पौडेल

चैत १, २०७७ आइतबार २०:१६:४४ | प्रताप बानियाँ

म्याग्दी – नेपाली कांग्रेसका वरिष्ठ नेता रामचन्द्र पौडेलले ढुलमुले नीति लिएर कांग्रेसले आफूले पाएको अवसर गुमाउन नहुने बताउनुभएको छ । कांग्रेस म्याग्दीका पूर्वसभापति डा. भूपेन्द्रबहादुर खड्काको छैटौँ दिनको पुण्यतिथिमा आयोजित श्रद्धाञ्जली सभामा स्व. खड्काको तस्बिरमा माल्यार्पण गर्दै उहाँले यस्तो बताउनुभएको हो ।

वरिष्ठ नेता पौडेलले भन्नुभयो, ‘वर्तमान सरकारका प्रधानमन्त्री केपी ओलीले संविधानमै नभएको व्यवस्थाविरुद्ध संसद् विघटन गरेपछि प्रदेश १ र वाग्मती प्रदेशमा सरकारको विरुद्धमा अविश्वासको प्रस्ताव दर्ता भएको थियो । त्यही अवसरमा कांग्रेसले अविश्वासको पक्षमा मतदान गरी दुवै प्रदेशमा सरकार गिराउने र केन्द्रको सरकारलाई पनि गिराउने अवसर थियो तर त्यो अवसर गुम्यो, हामीले गुमायौँ । त्यसैले फेरि पनि अर्को अवसर आएको छ, त्यो पनि गुम्ला भन्ने मलाई डर छ’, उहाँले भन्नुभयो ।

पार्टीले अवसर गुमाउनु हुन्न भन्दै वरिष्ठ नेता पौडेलले भन्नुभयो, ‘कांग्रेसले लकपक–लकपक गरेर केपी ओलीसँग के लिनुदिनु छ, केही छ भने भन्नुपर्‍याे तर केपी ओलीसँग त हाम्रो कसरी मिल्छ ? त्यसैले किन संशयमा बस्ने ? किन ढुलमुल नीति लिने ? त्यसकारण पार्टीले ढुलमुल नीति लिने बेला छैन । हामी स्पष्ट भएर अगाडि बढ्यौँ भने नेपाली नागरिककाे विश्वास हामीमाथि हुन्छ ।’

वरिष्ठ नेता पौडेलले पार्टीमा के भइरहेको छ विचार गर्दै राख्नुस् भन्दै नेतृत्व भनेको के हो ? नेतृत्वले हामीलाई कसरी लैजान्छ ? कुन तरिकाले हामीलाई सुरक्षित अवतरण गराउँछ ? भन्ने विषयमा कार्यकर्ताले सजग भएर हेरिराख्नुपर्ने बताउनुभयो । उहाँले भन्नुभयो, ‘नेताले कार्यकर्ताको मूल्याङ्कन मात्रै होइन, कार्यकर्ताले पनि नेताको मूल्याङ्कन गर्ने हैसियत राख्नुपर्छ । नेताहरू के गरिरहेका छन् ? कार्यकर्ताले मूल्याङ्कन गर्नुपर्छ अनि मात्रै पार्टी लोकतान्त्रिक हुन्छ । यो पार्टीलाई लोकतान्त्रिकीकरण गर्ने हो, यो सोसाइटीलाई लोकतान्त्रिकीकरण गर्ने हो । पुरानो अधिनायकवादी संस्कार र संस्कृतिमा हुर्काउने होइन, सामन्ती संस्कृतिमा अब बस्न मिल्दैन । सामन्ती संस्कृतिबाट अघि बढ्ने हो ।’

सैद्धान्तिक बहसमा कम्युनिस्टलाई तानेर बहसमा ल्याउन सके र नागरिककाे माझमा नङ्ग्याउन सक्नुपर्ने बताउँदै वरिष्ठ नेता पौडेलले आउँदो चुनावमा कांग्रेस विजयी हुने बताउनुभयो । उहाँले प्रधानमन्त्री ओलीले आफू अल्पमतमा परेपछि संसद् विघटन गरेको प्रसङ्गमा असंवैधानिक कदमलाई संवैधानिक बनाउन संसद् पुनर्स्थापना भएको बताउनुभयो ।

वरिष्ठ नेता पौडेलले पार्टीको बारेमा आफूले सही र विवेक प्रयोग गरेर गर्ने कुरामा अन्य नेताले बिगारेर वक्तव्यबाजी गर्ने गरेको आरोपसमेत लगाउनुभयो । पार्टीले सत्ताका लागि मरिहत्ते गर्ने होइन, व्यवस्थाका लागि कांग्रेस लड्छ र त्यसैगरी नै कांग्रेस लड्दै जानुपर्ने उहाँको भनाइ थियो ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

प्रताप बानियाँ

म्याग्दीमा बसेर पत्रकारिता गर्ने प्रताप बानियाँ उज्यालोका जिल्ला सम्वाददाता हुनुहुन्छ । उहाँले मुस्ताङका खबर पनि सम्प्रेषण गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्