ब्लडमनी जुटाउन देश विदेशका नेपालीले खड्गबहादुरलाई सघाउँदै

युएईकाे जेलबाट चाँडै छुट्ने अाश

भदौ २८, २०७५ बिहीबार १०:५७:४५ | उमाकान्त पाण्डे

युएई – ब्लडमनीको मुद्दा खेपिरहेका तेह्रथुमको फेदाप २ ओयाक्जुङका खड्गबहादुर जोगीको उद्धारका लागि अभियान सुरु गरिएको छ । तेह्रथुम घर भई इजरायलमा रहेका देव बाँस्कोटाको पहलमा देश विदेशमा रहेका नेपालीले जोगी बचाऊ अभियान सुरु गरेका हुन् ।

बाँस्कोटाका अनुसार विभिन्न संघसंस्था र व्यक्तिबाट १७ लाख रुपैयाँको प्रतिवद्धता आइसकेको छ । तेह्रथुम जिल्लाका २ नगरपालिका तथा ३ गाउँपालिकाबाट ११ लाख रुपैँया, अमेरिकामा बस्दै आएका तेह्रथुमका हेम थापाबाट दुई लाख रुपैयाँ सहयोग मिलेको छ ।

यस्तै तिनजुरे मिडिया ग्रुपले मासिक एक पीडित सहयोग अभियानको २४ औं सहयोग स्वरुप एक लाख ५० हजार रुपैयाँ र प्रेम राई बचाऊ अभियानबाट अढाई लाख रुपैयाँको प्रतिवद्धता आएको छ ।

नेपालमा दुर्गाप्रसाद गिरीको संयोजकत्वमा तीन सदस्यीय खड्ग बचाऊ अभियान मूल समिति बनाएर अभियान सुरु गरिएको हो । समितिको सचिवमा खगेन्द्र बहादुर जोगी र कोषाध्यक्षमा कुमार गिरी हुनुहुन्छ ।

नेपाल बैंक लिमिटेडमा तीनै जनाको नाममा संयुक्त खाता खोलिएको र विभिन्न ठाँउबाट रकम जम्मा भइरहेको सचिव जोगीले जानकारी दिनुभयो । ब्लडमनीका लागि सहयोग गर्न चाहनेले नेपाल बैंक लिमिटेडको खाता नम्बर ०५४००१०६५७०३२९०००००१ जम्मा गर्न सक्नेछन् ।

विभिन्न देशमा अभियान

नेपालमा खड्गबहादुरको गृह जिल्लाको सिफारिसमा विभिन्न संस्था तथा व्यक्तिबाट सहयोग संकलन भइरहेको छ । यस्तै युएई, दक्षिण कोरिया, डेनमार्क, अमेरिका, कतार, मलेसिया लगायतका ठाँउमा रहेका प्रवासी नेपाली, सम्बन्धित जिल्ला समाज र गैरआवासीय नेपाली संघ (एनआरएन)को सहकार्यमा सहयोग अभियान चलिरहेको बाँस्कोटाले बताउनुभयो ।

यता युएईमा खड्गबहादुर बचाउ अभियानका लागि पहल सुरु भएको छ । सामाजिक सञ्जाल मार्फत सबैलाई जानकारी गराइरहेको र केही दिनमै अभियानलाई अघि बढाउने तयारी भइरहेको युएईमा कार्यरत तेह्रथुमका पिएस लिम्बूले बताउनु भयो ।

युएईमा यसअघि ब्लडमनीकै मुद्दामा आर्थिक अभावका कारण स्वदेश फर्कन नपाएका चितवनका टोपबहादुर विकलाई एनआरएन युएई र विभिन्न संघसंस्थाले आर्थिक सहयोग जुटाएर नेपाल फर्काएका थिए ।

खड्गबहादुरलाई मृत्युदण्ड हुन्न : नेपाली दूतावास

फिलिपिनी नागरिकको हत्या अभियोगमा खड्गबहादुरलाई ५ वर्षको जेल सजाय तोकिएको हो । जोगीलाई यहाँको अदालतले दुई लाख दिर्हाम जरिवाना तोकेको छ । अदालतको फैसला अनुसारको रकम बुझाएपछि मात्रै नेपाल फर्काउन कानुनी प्रक्रिया सुरु गरिने नेपाली दूतावास आबुधाबीले जनाएको छ ।

‘ब्लडमनी तिर्न नसके मृत्युदण्ड हुन्छ भनेर भ्रम फैलाउँदा परिवारमा थप तनाव थपिएको छ,’ दूतवासले यसबारे प्रष्ट पार्दै भनेको छ, ‘२०१४ मे देखी अबुधाबीको अल वात्वा जेलमा कैद भुक्तान गरिरहनुभएका खड्गबहादुर २०१९ मार्च २७ सम्म जेल बस्नुपर्ने अदालतको फैसला छ । त्यस समयभीत्रमा ब्लडमनी बुझाएमा उहाँ जेलमुक्त हुन पाउनुहुन्छ । रकम बुझाउन नसकेमा थप जेल सजाय भएपनि मृत्युदण्ड भने हुन्न ।’

कार्यवाहक राजदूत सागरप्रसाद फुयाँलका अनुसार अदालतले तोकेको रकम संकलन भएपछि उहाँलाई जेलबाट छुटाएर नेपाल फर्काउन सकिन्छ । तर अदालतको फैसला अनुसारको मितिसम्म भने उहाँले जेल बस्नु पर्ने छ ।

दूतावासले उहाँको मुद्दाका बारेमा सरकारलाई जानकारी गराएको छ । विदेशमा यस्ता प्रकृतिका मुद्दा खेपिरहेका नेपालीलाई सरकारले आर्थिक सहयोग गर्ने कानुनी व्यवस्था नभएकाले जोगीको मुद्दा किनारा लाग्न नसकेको श्रम सहचारी मोतिराम भुसालले बताउनुभयो ।

याे पनि पढ्नुहाेस्

६२ लाख तिर्न नसकेर युएईको जेलमा खड्कबहादुर, सहयोगका लागि परिवारको अपिल

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

उमाकान्त पाण्डे

उज्यालाे सहकर्मी उमाकान्त पाण्डे युएईमा बसेर पत्रकारिता गर्नुहुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्