सुगतरत्न कंसाकार भन्छन्, 'राजीनामा दिन्न, ८ महिना आरामले बस्ने हो'

असोज १, २०७५ सोमबार ८:७:४५ | अर्जुन पोख्रेल

काठमाडाैं - नेपाल वायुसेवा निगमका महाप्रबन्धक सुगतरत्न कंसाकारले आफूले राजीनामा नदिने बताउनुभएको छ ।

मन्त्रीपरिषदको आइतबारको बैठकले निगमको कार्यकारी अध्यक्षमा झापाका मदन खरेललाई नियुक्त गरेपछि कंसाकारलाई नैतिक संकट परेको छ । खरेल कार्यकारी अध्यक्ष भएर आएपछि अब कंसाकारले उनको माताहतमा रहेर प्रशासनिक काम मात्र गर्नुपर्नेछ ।

तर कंसाकारले भने आफूले राजीनामा नदिने बरु अबका ८ महिना निगममा आरामले जागिर खाने बताउनुभएको छ । "मैले राजीनामा किन दिनु ? , म त राजिनामाको विरोधी मान्छे हो, अब काम गर्ने अर्का हाकिम आउँछन्, बाँकी ८ महिना म त आरामले जागिर खाने हो" महाप्रबन्धक कंसाकारले उज्यालो अनलाइनसँग भन्नुभयो, "मेरा कर्मचारीको साथ छ, मैले केही मान्छेसँग सल्लाह पनि गरें, अहिले राजीनामा दिँदा नराम्रो संदेश पनि जान्छ, त्यसैले तत्काल राजीनामा दिन्न ।"

आफूले निगममा सुधारको काम गर्दा केही व्यक्तिलाई नपचेको पनि उहाँले बताउनुभयो । उहाँले ट्विटमार्फत सरकारले कार्यकारी पदमा २ जना मान्छे राखेर अफ्ठेरो पारेको पनि बताउनुभएको छ ।

कंसाकारलाई २४ अर्ब रुपैयाँमा वाइडबडी जहाज किन्दा अनियमितता गरेको र निगमको बजार विस्तार गर्न नसकेको आरोप लाग्दै आएको छ । २०७० सालमा महाप्रबन्धक भएका मदन खरेलले त्यही साल राजीनामा दिनुभएको थियो ।

उहाँलाई गएको शुक्रबार सरकारले निगमको सञ्चालक समिति सदस्यमा नियुक्त गरेको थियो । आइतबारको मन्त्रीपरिषद बैठकले भने खरेललाई कार्यकारी अध्यक्षमा नियुक्त गर्ने निर्णय गरेको छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।