यी हुन् ६ वटा महानगरका मुख्य दलका प्रतिस्पर्धी

वैशाख १२, २०७९ सोमबार १८:५:२५ | उज्यालो सहकर्मी

काठमाण्डाै – आउँदो वैशाख ३० गते हुने पालिका चुनावका लागि हिजो आइतवार र आज साेमवार मनोनयन दर्ता भएको छ । हिजो धेरैजसो साना दल तथा स्वतन्त्र उम्मेदवारहरूले मनोनयन दर्ता गराएकाले निर्वाचन अधिकृतको कार्यालयमा कम चाप रहेकोमा आज दिनभर भिडभाड रहेको छ । मनोनयन दर्ता गराउने समय सकिएको र विवरण तयार पार्ने काम भइरहेको निर्वाचन आयोगले जनाएको छ ।

काठमाण्डौ महानगरपालिकामा पाँच दलीय गठबन्धनको तर्फबाट मेयर पदमा नेपाली कांग्रेसकी नेतृ सृजना सिंह र उपमेयरमा नेकपा एकीकृत समाजवादीका रामेश्वर श्रेष्ठले मनोनयन दर्ता गराउनुभएको छ । यस्तै काठमाण्डौमा नेकपा एमालेको तर्फबाट मेयरमा केशव स्थापित र उपमेयरमा सुनिता डङ्गोलले उम्मेदवारी दर्ता गराउनुभएको छ । राप्रपाको तर्फबाट कलाकार मदनदास श्रेष्ठले उम्मेदवारी दिनुभएको छ ।

ललितपुर महानगरपालिकामा पाँच दलीय गठबन्धनको तर्फबाट मेयर पदमा नेपाली कांग्रेसका चिरीबाबु महर्जन र उपमेयरमा नेकपा माओवादी केन्द्रका बाबुराजा बज्राचार्यले मनोनयन दर्ता गराउनुभएको छ । ललितपुर महानगरपालिकामा एमालेका तर्फबाट मेयरमा हरिकृष्ण व्यञ्जनकार र उपमेयरमा मञ्जली शाक्यले मनोनयन दर्ता गराउनुभएको छ ।

पोखरा महानगरपालिकामा पाँच दलीय गठबन्धनका तर्फबाट मेयरमा नेकपा एकीकृत समाजवादीका धनराज आचार्य र उपमेयरमा नेपाली कांग्रेसकी कोपिला रानाभाटले मनोनयन दर्ता गर्नुभएको छ । पोखरामा कांग्रेस नेता ऋषिराम सापकोटाले पनि स्वतन्त्र रूपमा मनोनयन दर्ता गराउनुभएको छ । त्यस्तै नेकपा एमालेका तर्फबाट मेयरमा कृष्ण थापा र उपमेयरमा मञ्जुदेवी गुरुङले उम्मेदवारी दर्ता गर्नुभएको छ ।

भरतपुर महानगरपालिकामा पाँच दलीय गठबन्धनको तर्फबाट मेयरमा माओवादी केन्द्रकी नेतृ रेनु दाहाल र उपमेयरमा कांग्रेसका चित्रसेन अधिकारीले मनोनयन दर्ता गराउनुभएको छ । यस्तै नेपाली कांग्रेस चितवनका नेता एवम् पूर्वसांसद जगन्नाथ पौडेलले पनि भरतपुर महानगरपालिकाको मेयरमा स्वतन्त्र उम्मेदवारी दर्ता गराउनुभएको छ । भरतपुरमा एमाले र राप्रपाले तालमेल गरेका छन् । दुई दलको तर्फबाट मेयरमा एमालेका विजय सुवेदी र उपमेयरमा राप्रपाका हिमला गुरुङले मनोनयन दर्ता गराउनुभएको छ ।

विराटनगर महानगरपालिकमा पाँच दलीय गठबन्धनबाट मेयरमा कांग्रेसका नागेश कोइराला र उपमेयरमा जसपाका अमरेन्द्र यादवले मनोनयन दर्ता गराउनुभएको छ । यस्तै एमालेबाट मेयरमा सागर थापा र उपमेयरमा शिल्पा कार्कीले मनोनयन दर्ता गराउनुभएको छ ।

वीरगञ्ज महानरपालिकामा पाँच दलीय गठबन्धनको तर्फबाट मेयरमा जसपाका राजेशमान सिंह र उपमेयरमा कांग्रेसका इम्तियाज आलमले मनोनयन दर्ता गराउनुभएको छ । यस्तै वीरगञ्जमा नेकपा एमालेको तर्फबाट मेयरमा विजय सरावगीले मनोनयन दर्ता गर्नुभएको छ । वीरगञ्जमा एमाले र लोकतान्त्रिक समाजवादी पार्टीले तालमेल गरेका छन् । उपमयेरमा लोसपाका पुरुषोत्तम झाले उम्मेदवारी दर्ता गराउनुभएको छ ।

भोलि बिहान १० बजेदेखि बेलुकी ५ बजेसम्म उम्मेदवारको विरोधमा उजुरी दिने समय तोकिएको छ । वैशाख १४ गतेदेखि १५ गते बेलुकी ५ बजेसम्म मनोनयन पत्र जाँच गर्ने र उजुरीमाथि जाँच गरी निर्णय गरिनेछ । १५ गते बेलुकी ५ बजेदेखि ६ बजेसम्ममा मनोनयन भएका उम्मेदवारको नामावली प्रकाशन गर्नेछ । १६ गते बिहान १० बजेदेखि बेलुकी ५ बजेसम्म उम्मेदवारलाई नाम फिर्ता लिने समय तोकिएको छ । १६ गते नै बेलुकी ५ बजेदेखि ६ बजेसम्ममा उम्मेदवारको अन्तिम नामावली प्रकाशन गरिनेछ । १७ गते बिहान १० बजेदेखि ५ बजेसम्म उम्मेदवारलाई चुनाव चिह्न प्रदान गरिनेछ ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्