नेकपाका युवा नेता व्यावसायिक केरा खेतीमा

असोज ८, २०७५ सोमबार १८:२१:३२ | श्यामशितल परियार

लमजुङ – पारिवारिक पृष्ठभूमि नै राजनीति । त्यसैले उहाँमा सानैदेखि राजनीतिमा रुची छ । नेकपा एमाले र नेकपा (माओवादी केन्द्र) बीच पार्टी एकता हुनुअघि उहाँ वाईसीएल नेपाल लमजुङका जिल्ला अध्यक्ष हुनुहुन्थ्यो । हाल उहाँ नेकपा जिल्ला कार्यालय लमजुङका सदस्य हुनुहुन्छ ।

युवा राजनीतिक व्यक्तिको रुपमा मात्र उहाँको परिचय सीमित छैन । अहिले उहाँ व्यावसायिक किसानको रुपमा समेत चिनिन थाल्नुभएको छ । अहिले राजनीतिसँगै व्यवसायिक कृषि कर्ममा हरदम जुट्नुभएको छ, लमजुङका सुनिल सुनार ‘अटल’ ।

बाँझो जमिन हरियाली

खाइलाग्दो शरीर । मनमा जोश, जाँगर । स्वदेशकै माटोमा केही गरौँ भन्ने चाहना । त्यसैले पनि सुनिलले खेर गएको जमिनमा व्यावसायिक केरा खेती सुरु गर्नुभएको छ । बाँझो जमिनलाई अहिले उहाँले हरियाली बनाउनुभएको छ ।

उहाँ परिवारसहित बेसीशहर नगरपालिका–८, शेरामा बस्दै आउनुभएको छ । उहाँको पुख्र्यौली गाउँ भने कुन्छा हो ।

सुन्दरबजार नगरपालिका–१, कुन्छामा रहेको आफ्नै जमिनमा उहाँले केरा खेती गर्नुभएको हो । १२ रोपनी जग्गामा उहाँले १ हजार ५ सय केराको बिरुवा रोपिसक्नुभएको छ ।

केरा खेतीमै फाइदा

धान खेतीमा भन्दा केराखेतीमा मनग्य आम्दानी हुने उहाँको भनाई छ ।

‘धान खेती गर्यो । उत्पादन कम हुने । खेतला पाउन झनै मुश्किल । त्यसैले गएको जेठदेखि म व्यावसायिक केराखेतीमा लागेको हूँ’, ३५ वर्षीय सुनिलले भन्नुभयो ।
उहाँका अनुसार केराखेतीमा लगानी उच्च रहे पनि प्रतिफल पनि राम्रो हुन्छ । ‘यसमा लगानी पनि उच्च हुन्छ । फाइदा पनि दोब्बर नै हुन्छ,’ उहाँले भन्नुभयो । सुनारले चितवनबाट ‘विलियम’ जातको केरा ल्याई खेती गर्नुभएको हो । सुनारले ‘सुन’ जातको कागती पनि लगाउनुभएको छ ।

चार लाखभन्दा धेरै लगानी

उहाँले झण्डै ३ रोपनी जग्गामा एकसय ५० भन्दा बढी कागतीको बिरुवा रोप्नुभएको छ । केरा र कागती खेतीमा गरी उहाँको ४ लाखभन्दा धेरै लगानी भइसकेको छ । ‘बिस्तारै अब कागती र केराखेतीलाई थप विस्तार गर्नेछु’, उहाँले आफ्नो भावी योजनाबारे जानकारी गराउनुभयो ।

कृषि कर्ममा रम्न पाउँदा खुशी

राजनीतिँंगै कृषि कर्ममा आफूलाई व्यस्त बनाउन पाउँदा उहाँलाई निकै खुशी मिल्ने गर्दछ । ‘हामी अझै कृषि उत्पादनमा अरुको भर पर्नुपर्ने अवस्था छ,’ उहाँले केही नरमाइलो मान्दै भन्नुभयो ।

‘कृषिमा आत्मनिर्भर हुनुपर्छ भन्ने उद्धेश्यका साथ म कृषि कर्ममा होमिएको छु’, उहाँले मुस्कुराउँदै भन्नुभयो । गर्न सके पैसाकै लागि सात समुद्रपारी हानिनु नपर्ने उहाँको भनाई छ ।

‘हामीजस्ता युवाहरु कृषिमा लागे अरुले पनि देखासिकी गरी यसमा लाग्न सक्छन् । देशमै बसी उद्यम गरी पैसा कमाउन सक्छन् । पैसाकै लागि विदेसिनु नपर्ने सन्देश दिने भएकाले पनि कृषि कर्ममा रमेको छु । यसैमा रम्न पाउँदा खुशी छु’, उहाँले भन्नुभयो ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्