दशैँको सिजनमा आन्तरिक पर्यटकको रोजाइमा फुङफुङ्गे झरना

असोज १७, २०७९ सोमबार १९:१६:२५ | केशवप्रसाद भट्टराई

ताप्लेजुङ – नेपालीको जीवनशैली विस्तारै फेरिँदै गएको छ । घुमघाम गर्ने चलन बढ्न थालेको छ । विगतमा भ्रमणतर्फ चासो नदिने आन्तरिक पर्यटकले हाल बिदाको समयलाई उपयोग गर्न थालेका छन् । दशैँको बिदामा हिमाली जिल्ला ताप्लेजुङ मिक्वाखोला गाउँपालिकामा रहेको फुङफुङ्गे झरनालाई गन्तव्य बनाएर आन्तरिक पर्यटक आउने क्रम बढेको छ ।

बिदामा घुम्न फुङफुङ्गे सहज हुँदै गएको छ । ताप्लेजुङ जिल्लाको फुङफुङ्गेमा दशैँ बिदालाई उपयोग गर्दै पारिवारिक भ्रमणमा पुग्ने आन्तरिक पर्यटकको चहलपहल बढेको मिक्वाखोला गाउँपालिकाले जनाएको छ ।

‘कोभिड–१९ सङ्क्रमणपछि अहिले आन्तरिक पर्यटक बढेका छन् । विस्तारै भ्रमणमा निस्कने बढ्न थालेका छन्,’ मिक्वाखोला गाउँ पालिकाका सूचना अधिकारी गजेन्द्र थलङले बताउनुभयो ।

दशैँको बिदामा फुङफुङ्गे भित्रिने आन्तरिक पर्यटक बढेको उहाँले बताउनुभयो । कोही परिवारसँग आउने गरेका छन् भने कतिपय साथीभाइसँग यहाँ आउने गरेका छन । आन्तरिक पर्यटकको यकिन तथ्याङ्क नभए पनि विगतमा भन्दा उल्लेख्य सङ्ख्यामा पर्यटक घुम्न आउन थालेका सूचना अधिकारी थलङले बताउनुभयो ।

करिब ३ वर्ष कोभिड–१९ का कारण घरभित्र बसेका आन्तरिक पर्यटक योजना सहित भ्रमणमा आउन थालेका हुन् । विसं २०७६ चैतदेखि नेपालका सबै क्षेत्रमा आन्तरिक तथा बाह्य पर्यटक शून्य थियो ।

कोभिड–१९ का कारण असर नपरेको कुनै क्षेत्र वा पेसा व्यवसाय छैन । सबैभन्दा बढी पर्यटन क्षेत्रमा असर परेको देखिन्छ । अहिले आन्तरिक पर्यटकको रोजाइमा ताप्लेजुङको फुङफुङ्गे झर्ना पर्ने गरेको छ । अहिले पर्यटक फुङ्फुङ्गे आउने समय अनुकूल छ किनकि वर्षा पनि करिब सकिएको र झरना पनि ठूलो रहेकोले आन्तरिक पर्यटकलाई भ्रमणमा सहज हने बताइन्छ ।

यस फुङ्फुङ्गे झरनाको तथ्याङ्क संकलन गरी राखिएको छैन । तर पनि वर्षेनी ५० हजार आन्तरिक पर्यटक पुग्ने अनुमान गरिएको छ । अबका दिनमा वास्तविक तथ्याङ्क राख्न लागिएको गाउँपालिकाले बताएको छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

केशवप्रसाद भट्टराई

केशवप्रसाद भट्टराई ताप्लेजुङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्