झण्डै ३ सातापछि खुल्यो बेसीशहर–चामे सडक

असोज १५, २०७५ सोमबार २०:८:३२ | श्यामशितल परियार

लमजुङ – अवरुद्ध बेसीशहर–चामे सडक खुलेको छ ।

पहिरोको कारण गएको भदौ २७ गतेदेखि नै यस सडकखण्ड अवरुद्ध थियो । लामो प्रयासपछि पहिरो हटाइएसँगै सडक आइतबारबाट सञ्चालनमा आएको हो ।
पहिरोका कारण १९ दिनसम्म यस सडकखण्डमा आउजाउ बन्द भएको थियो ।

खरखरे भीर, खुदी, भुलभुले, सिउरुङबेसी, अर्खलेबेसी, घोप्टे भीर, काप्रे भीर, रामबजार, स्याँगे, श्रीचौर, जगत, च्याम्चेलगायतका ठाउँमा पहिरो खस्दा बेसीशहर–चामे सडकखण्ड अवरुद्ध भएको थियो । बेसीशहर–चामे सडकखण्ड झण्डै ६५ किलोमिटर छ । मनाङ पुग्ने यो एकमात्र सडकखण्ड हो ।

विष्फोटक पदार्थ प्रयोग गरी पहिरो हटाइयो

सडकखण्डको केही भागमा विष्फोटक पदार्थ प्रयोग गरी पहिरो हटाइएको हो ।

पहरो खोपेर पुनः सडक बनाइएको छ । अवरुद्ध सडक खुलाउन सडक डिभिजन कार्यालय, नेपाली सेनाको श्रीजंग गण, नेपाल प्रहरी, विपिसीद्धारा प्रवद्र्धित जलविद्युत आयोजनाका नेपाली र चाइनिज कर्मचारी, जनप्रतिनिधि र स्थानीयको सक्रियतामा अवरुद्ध सडक खुलाइएको लमजुङका प्रमुख जिल्ला अधिकारी झंकनाथ ढकालले जानकारी दिनुभयो ।

दोहोरो रुपमै सवारी सञ्चालन

पूर्णरुपमा सडक खुलसँगै अहिले दोहोरो रुपमै सवारी सञ्चालन भइरहेको मनाङमा बसी पत्रकारिता गरिरहनुभएका नेगम परियारले जानकारी दिनुभयो ।

उहाँका अनुसार सडक खुलेपछि यहाँसम्म आउने पर्यटकको संख्या बढ्दै गएको छ । चहलपहल बढ्दै गएको छ । गाडी चलेसँगै स्थानीयसँगै पर्यटकहरुलाई आउजाउमा सहज भएको छ । खाद्यान्न, तरकारी जस्ता दैनिक उपभोग्य वस्तु यहाँसम्म ल्याउन पनि सहज भएको छ ।

पर्यटकको आगमन बढ्दै

बाटो खुलसंगै तुलनात्मक रुपमा पर्यटक आगमन संख्या बढेको र व्यापारी– व्यावसायीहरु उत्साहित भएको उहाँले बताउनुभयो ।

‘लामा सयमसम्म बाटो बन्द भयो । व्यापारी–व्यावसायी निराश भएका थिए । आइतबारबाट बाटो खुल्यो । मानिसको चहलपहल पनि बढेको छ । व्यावसायीहरु उत्साहित देखिएका छन्,’ उहाँले थप्नुभयो ।

बाटो बन्द हुँदा सवारी आवतजावत हुँदा सामान ल्याउन समस्या भएको चामेमा किराना तथा कस्मेटिक पसल सञ्चालन गर्दै आउनुभएका जीवन श्रेष्ठले बताउनुभयो । बाटो खुलेसँगै सामान ल्याउन सजिलो भएकोमा उहाँ खुशी हुनुहन्छ ।

‘बाटो खुल्यो । सामान ल्याउन पनि केही सहज भयो । मानिसको चहलपहल पनि बढेको छ । व्यापार पनि राम्रो हुने आशा छ । हामी उत्साहित छौँ,’ उहाँले भन्नुभयो ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्