कामबाट निकालिएका १३ जना नेपाली मलेसियामा उद्धारको पर्खाइमा

पुष १२, २०७९ मंगलबार १९:५६:१० | राजु लामिछाने

रुकुम पश्चिम – वैदशिक रोजगारीको सिलसिलामा मलेसिया पुगेका १३ जना युवा अलपत्र परेका छन् । कम्पनीले कामबाट निकालेपछि आफूहरू एक महिनादेखि एउटा कोठामा थुनिएर बसेको उनीहरूले बताएका छन् । रुकुम पश्चिमका चार जना र सुनसरीका नौ जना युवा मलेसियाको निलाई ७ मा अलपत्र परेका हुन् । उनीहरू वैदेशिक रोजगारीका लागि गएको कात्तिकमा मलेसिया पुगेका थिए ।

रुकुम पश्चिमको चौरजहारी नगरपालिका ४ का इन्द्रबहादुर ओली र टीकाराम भण्डारी, वडा नम्बर ११ का टेकबहादुर केसी र सुनील शाहसँगै सुनसरीको बराहक्षेत्र नगरपालिकाका सन्देश राई, दीपकचन्द्र बंशी, देवनारायण यादव, भरतप्रसाद यादव, सन्तोष यादव कामविहीन अवस्थामा रहेका छन् । त्यसैगरी सुनसरीकै कोशी गाउँपालिकाका विवेक कुमार मण्डल, हरिनगरा गाउँपालिकाका सुधीरकुमार पाल, कुन्दनकुमार पाल र दीपेन्द्रकुमार पाल अलपत्र परेको हुन् ।

उनीहरू रुकुम पश्चिमका यज्ञबहादुर बटाला, सुनसरीका शम्भु मण्डल र विष्णु घिमिरे एजेन्टमार्फत ग्लोबल रिक्रुटमेन्ट प्रा.लि. नामक म्यानपावरको सम्पर्कमा गएका थिए । यही म्यानपावरले आफूहरूलाई एचआर त्रिवेणी म्यानपावरबाट भिसा लगाएर मलेसियामा क्लिनरको काम गर्ने भन्दै पठाएको पीडितले जनाएका छन् । ग्लोबल म्यानपावरका हरि क्षेत्रीले आफूहरूलाई कामको ब्रिफिङ गर्दा सजिलो काम र धेरै पैसा आउने भन्दै आश्वासन दिलाएको उनीहरूले बताएका छन् । तर उता जाँदा जङ्गलको अप्ठ्यारो काममा लगाएको पीडितले गुनासो गरेका छन् ।

मलेसियामा आफूहरु अलपत्र अवस्थामा रहेको बताउँदे इन्द्रबहादुर ओलीले उद्धारका लागि अपिल गर्नुभएको छ । असाध्यै अप्ठ्यारो अवस्थाको काममा लगाएपछि आफूहरू काम गर्न नसक्ने अवस्थामा पुगेको उहाँले बताउनुभयो । आफूलाई नेपालको कम्पनीले झुक्याएर सम्झौतापत्रमा हस्ताक्षर गर्न लगाएको कुरा मलेसिया पुगेर मात्र थाह भएको उहाँको भनाइ छ ।

सम्झौताअनुसारको काममा लगाइ पाउँ भन्दा कम्पनीले हामीलाई निकालिदियो, कसरी बाँच्ने हो ? हामीलाई समस्या भयो’, मलेसियाबाट सुनसरीका सन्देश राईले गुहार गर्दै भन्नुभयो, ‘हामीलाई कि काम गर्ने कि घर पुग्ने वातावरण मिलाइ दिनुपर्यो ।’

पीडितका अनुसार कम्पनीले विमानस्थल पुगेको बेला भिसा, टिकट र पासपोर्ट एकैसाथ दिएको थियो । अङ्ग्रेजीमा भएकोले आफूहरूले कामको बारेमा पढ्न नसकेको तर मलेसिया पुग्दा भनिएको काम भन्दा फरक रहेको थाहा भएको उनीहरूको भनाइ छ ।

ईलाईट ह्युमन रिसोर्स कम्पनीले ग्लोबल इन्टरनेशनल म्यानपावरमार्फत मलेसियाको नेगिरी सिम्बिलिन भन्ने ठाउँमा रहेको पिआरएस फरेस्ट म्यानेजमेन्ट कम्पनीमा उनीहरूलाई पठाएको बुझिएको छ ।

आफूहरू नेपालबाट आउँदा जनही दुई लाख ६० हजारदेखि दुई लाख ८० हजार रुपैयाँसम्म तिरेर आएको उनीहरूले बताएका छन् । अब नेपाल फर्काइदेउ भन्दा कम्पनीले उल्टै पैसा माग्ने गरेको उनीहरूको गुनासो छ ।

म्यानपावर कम्पनीका एजेन्ट सुनसरीका विष्णु घिमिरेले आफूहरूमार्फत मलेसिया पुगेर अलपत्र परेका भनिएका युवालाई कि काममा लगाउन कि नेपाल फर्काउन लगातार दबाब दिइरहेको बताउनुभयो । उहाँले कम्पनीलाई तुरुन्त भनेअनुसारको काममा लगाउन अल्टिमेटम दिएको उल्लेख गर्नुभयो । काममा नलगाएमा भोलिबाटै नेपाल फर्काउन थालिने उहाँले उल्लेख गर्नुभयो ।

रुकुमको चौरजहारी निवासी एजेन्ट यज्ञबहादुर बटालाले कम्पनीले भनेअनुसारको काममा नलगाएकोले कम्पनी परिवर्तन नै गर्ने प्रक्रियामा गएको बताउनुभयो । ‘कम्पनी बदल्नका लागि पासपोर्ट अर्को कम्पनीमा बुझाइसकेका छौँ’, बटालाले भन्नुभयो, ‘केही दिनमै काम बन्नेछ’, । उहाँले नआत्तिनसमेत अनुरोध गर्नुभयो ।

अन्तिम अपडेट: मंसिर २२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

राजु लामिछाने

राजु लामिछाने रुकुमका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

कामबाट निकालिएका १३ जना नेपाली मलेसियामा उद्धारको पर्खाइमा

मलेसियामा अलपत्र परेका नेपाली कामदार

तपाईको प्रतिक्रिया