१३ वर्षपछि साँफेबगर विमानस्थलमा हवाई उडान हुने

असोज २७, २०७५ शनिबार ९:४४:७ | चन्द्र थापा

अछाम – हवाई उडान बन्द भएको १३ वर्षपछि साँफेबगर विमानस्थलमा नियमित उडान हुने भएको छ ।

नेपाल वायु सेवा निगमको विमानले असोज २८ गते बिहान साढे १० वजे नेपालगञ्जबाट साँफेबगरमा नियमित उडान भर्ने साँफेबगर नगरपालिकाका प्रमुख कुलबहादुर कुँवरले जानकारी दिनुभयो । जेठ ११ गते नेपालगञ्जबाट समिट एयरको लेट विमानले हवाई मैदान परीक्षण गरेको थियो । २०६२ सालदेखि पूर्ण रुपमा बन्द भएको साँफेबगर हवाई मैदानको कालेपत्रे गरिएपछि जेठमा हवाई उडान परीक्षण गरिएको थियो ।

हवाई उडान भरेको साढे ४ महिनापछि असोज २८ गते नियमित उडान भर्ने नगर प्रमुख कुँवरले जानकारी दिनुभयो । सुरुमा अहिले नेपाल वायु सेवाको विमानले हप्ताको दुई पटक नेपालगञ्जबाट हवाई उडान गर्नेछ । सुरुमा नेपालगञ्जबाट हवाई उडान भरे पनि पछि धनगढीबाट साँफेबगरमा पनि नियमित उडान भर्ने नगर प्रमुख कुँवरले जानकारी दिनुभयो ।

२०५८ फागुन ४ मा तत्कालीन नेकपा माओवादीले सदरमुकामसँगै साँफेबगरमा गरेको आक्रमणपछि विमानस्थलको टावर ध्वस्त हुँदा विमानस्थल बन्द भएको थियो । उहाँले शुक्रबार मात्रै हवाई उडान भर्नको लागि सहमति भएको बताउँदै टिकटको मूल्य कति हुने भन्नेमा छलफल भैरहेको जानकारी दिनुभयो । उहाँले निजी विमान अवतरण गर्दा महङ्गो हुने भएका कारण सरकारी विमान चलाउनको लागि समय बढी लागेको पनि जानकारी दिनुभयो ।

पूर्व उपप्रधानमन्त्री तथा प्रतिनिधि सभा क्षेत्र नं.१ का सांसद भीम रावल, राष्ट्रिय सभाका सदस्य शेरबहादुर कुँवरलको पहलमा हवाई उडान भर्नको लागि नेपाल वायु सेवा निगमसँग सहमति भएको उहाँले जानकारी दिनुभयो ।

नगरप्रमुख कुँवरले स्थानीय सरकारको तर्फबाट नियमित विमान सञ्चालनको लागि पहल गर्ने पनि बताउनुभयो । सुदूरपश्चिममा कैलालीको गेटा विमानस्थलपछि साँफेबगर विमानस्थललाई सहज मानिन्छ । साँफेबगरबाट हवाई जहाज चलेपछि अछाम, बाजुरा र डोटी जिल्लाका बासिन्दाहरु लाभान्वित हुनेछन् । हवाई उडान नियमित भएपछि यस क्षेत्रका खप्तड, रामारोशन, बडिमालिकालगायतका पर्यटकीय क्षेत्रमा पर्यटकको संख्यामा वृद्धि हुने अनुमान गरिएको छ ।

अमर कन्टस्ट्रक्सनले ११ करोड १७ लाख रुपैयाँको लागतमा विमानस्थल कालोपत्रे गर्ने काम सम्पन्न गरेको हो ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

चन्द्र थापा

अछामका उज्यालो सहकर्मी चन्द्र थापा रेडियो रामारोशनमा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्