मन्त्री बनाउन पार्टी नेतृत्वले पैसा लिएको भए प्रमाणित गरेर देखाउन मनिष झाकाे चुनाैती

चैत २७, २०७९ सोमबार १८:५:५५ | उज्यालो सहकर्मी

काठमाण्डाै – राष्ट्रिय स्वतन्त्र पार्टी (रास्वपा) का सांसद मनिष झाले मन्त्री बनाउनका लागि पार्टी नेतृत्वले रकम लिने गरेको भन्ने भनाइप्रति विश्वास गर्न नसकिने बताउनुभएको छ । पार्टीका सभापति रवि लामिछानेले करोडौँ रुपैयाँ लिएर मन्त्री बनाउने गरेको चर्चा भइरहेका बेला सांसद झाले त्याे भनाइलाई आफूले विश्वास गर्न नसक्ने बताउनुभएको हो ।

सोमवार सङ्घीय संसद् भवन परिसरमा सञ्चारकर्मीले राखेका जिज्ञासाको जवाफ दिने क्रममा उहाँले पार्टी सभापति लामिछानेले मन्त्री बनाउनका लागि रकम असुली गरेको पुष्टि गरेको देखाउन पनि चुनाैती दिनुभयो । नेपाली कांग्रेसमा आबद्धहरूले सामाजिक सञ्जाल ट्विटरमा पार्टी नेतृत्वले शिक्षामन्त्री बनाउनका लागि आठ करोड रुपैयाँ लिएको भनेर लेखेको आफूले पनि देखेको उल्लेख गर्दै सांसद झाले पुष्टि गरेको देखाउनुपर्ने बताउनुभयो । उहाँले पार्टी नेतृत्वले पार्टीका निलम्बित सांसद ढाकाकुमार श्रेष्ठसँग मन्त्री बनाउनका लागि साढे दुई करोड रुपैयाँ मागेको भन्ने कुरा पनि सत्य नभएको जिकिर गर्नुभयो ।

मन्त्री बनाउनका लागि पार्टी नेतृत्वलाई दुई करोड रुपैयाँ दिनुपर्ने भन्दै व्यवसायी दुर्गा प्रसाईंसँग पैसा मागेको अडियो आइतवार (हिजो) सार्वजनिक भएपछि पार्टीका सांसद श्रेष्ठ निलम्बित हुनुभएकाे छ । सांसद झाले भने पार्टी नेतृत्वबाट त्यस्तो काम नभएको बरु आरोप लगाउने कांग्रेस पार्टीभित्र भने त्यस्तो हुने गरेको प्रमाण आफूहरूसँग रहेको दाबी गर्दै दोषीलाई कारबाही गरेर देखाउन पनि कांग्रेस नेतृत्वलाई चुनौती दिनुभयो ।

उहाँले भन्नुभयो, ‘मन्त्री बनाउन पार्टी नेतृत्वले साढे दुई करोड रुपैयाँ मागेको थियो भन्ने कुरामा विश्वास गर्दिनँ । मैले पनि ट्विटरमा केही कांग्रेसीजनले शिक्षामन्त्री बन्नलाई आठ कराेड रुपैयाँ माग्याे भनेर लेखेकाे देखेँ । त्यसमा म विश्वास गर्दिनँ । पैसा मागेकाे प्रमाण पेस गर्न म चुनाैती दिन चाहन्छु ।’

सांसद झाले विवादमा परेपछि निलम्बनमा परेका सांसद श्रेष्ठसँग पार्टीले सम्बन्धविच्छेद गरेको पनि स्पष्ट पार्नुभयो । छानबिनका लागि पार्टीका सदस्यहरूलाई प्रभाव पार्न सक्ने भन्दै आफूहरूले निलम्बित सांसद श्रेष्ठसँग सम्बन्धविच्छेद गरेर छानबिनकाे प्रक्रियालाई अघि बढाउनुपरेको उहाँले बताउनुभयाे । आरोप पुष्टि भए निलम्बित सांसद श्रेष्ठमाथि कारबाही हुने पनि उहाँले स्पष्ट पार्नुभयो ।’

सांसद झाले निलम्बित सांसद श्रेष्ठलाई जोगाएर आफूहरूले मतदाताको मतमाथि विश्वासघात नगर्ने पनि पटक–पटक दोहोर्‍याउनुभयाे । व्यवसायी प्रसाईंसँगको अडियो प्रकरण सार्वजनिक भएलगत्तै आइतवार (हिजो) सांसद श्रेष्ठलाई निलम्बन गरी ७२ घण्टाभित्र छानबिन गरी आरोप पुष्टि भए कारबाही गर्ने राष्ट्रिय स्वतन्त्र पार्टीले जनाएको छ ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्