एमालेले ३ वटा समितिकाे सभापति पाउने गरी संसदीय समितिकाे भागबन्डा मिल्याे

वैशाख ११, २०८० सोमबार १८:१७:३३ | उज्यालो सहकर्मी

काठमाण्डाै – शीर्ष तीन दल नेपाली कांग्रेस, नेकपा एमाले र नेकपा (माओवादी केन्द्र) का शीर्ष नेताहरूको बैठकले संसदीय समितिहरूको टुङ्गो लगाएका छन् । सोमवार सिंहदरबारमा बसेको तीन दलका शीर्ष नेताहरूको बैठकले संयुक्त संसदीय समिति संसदका दुई ठूला राजनीतिक दल नेपाली कांग्रेस र नेकपा एमालेले नेतृत्व गर्ने गरी टुङ्ग्याएका हुन् ।

बैठकपछि सञ्चारकर्मीसँगको कुराकानीमा नेकपा एमालेका प्रमुख सचेतक पदम गिरीले संसदीय सुनुवाइ समितिमा सभापति नेपाली कांग्रेसले गर्ने र राज्यका निर्देशक सिद्धान्त, नीति र दायित्वको कार्यान्वयन, अनुगमन तथा मूल्याङ्कन समितिको सभापति नेकपा एमालेले गर्ने सहमति भएको बताउनुभयो । उहाँले प्रतिनिधि सभामा भएका १० विषयगत समितिमध्ये नेकपा एमालेले लेखा समिति र अर्को एक समितिको सभापति पाउने सहमति भएको पनि बताउनुभयो । उहाँले संवैधानिक परिषद्सम्बन्धी विधेयक संसदबाट नै टुङ्गो लगाउने र सङ्क्रमणकालीन न्यायसँग सम्बन्धित विधेयक भने १५ सदस्यीय विशेष समितिमा छलफल गरेरमात्रै टुङ्गो लगाउने सहमति भएको बताउनुभयो । उहाँले संसदीय सुनुवाइ समितिमा नेकपा एमालेले चार जना सदस्य नै पाउने सहमति भएको पनि बताउनुभयो । उहाँले चालु अधिवेशन यही वैशाख १५ गतेसम्म चल्ने पनि बताउनुभयो ।

त्यस्तै नेकपा (माओवादी केन्द्र) का प्रमुख सचेतक हितराज पाण्डेले सङ्क्रमणकालीन न्यायसँग सम्बन्धित विधेयकका लागि १५ सदस्यीय विशेष समिति बनाई छलफल गर्ने र अर्को अधिवेशनबाट पास गर्ने सहमति भएको बताउनुभयो । उहाँले चालु संसद् अधिवेशन अब एक/दुई दिनमात्रै चल्ने बताउनुभयो ।

त्यस्तै नेपाली कांग्रेसका प्रमुख सचेतक रमेश लेखकले संसदभित्र भएका सबै राजनीतिक दलहरूसँग आपसमा सहमतिका आधारमा नै संसद् सञ्चालन गरेर अघि बढ्ने सहमतिअनुसार शीर्ष दलका नेताहरूबीच सहमति भएको बताउनुभयो । उहाँले सबै दलहरूलाई समेटेर नै विषयगत समितिहरू पनि टुङ्ग्याइएको बताउनुभयो । उहाँले चालु अधिवेशन अब दुई/तीन दिनमात्रै सञ्चालन हुने बताउनुभयो ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्