नेपालकाे एक इन्च जमिन पनि अतिक्रमण हुन नदिन सरकार प्रतिबद्ध छ : परराष्ट्रमन्त्री

असार ११, २०८० सोमबार १७:२७:९ | उज्यालो सहकर्मी

काठमाण्डाै – परराष्ट्रमन्त्री नारायणप्रकाश (एनपी) साउद संसद् भवनमा नेपाली भूमि समेटिएको नक्सा राखिएको सम्बन्धमा भारतीय पक्षसँग कुरा गरी प्रतिवेदन पठाउन नेपाली राजदूतावासलाई निर्देशन दिएको बताउनुभएको छ ।

सोमवार प्रतिनिधि सभा बैठकमा मन्त्री साउदले त्याे नक्साकाे विषयमा भारतीय पक्षसँग कुरा गरी प्रतिवेदन पठाउन नयाँ दिल्लीमा रहेकाे नेपाली राजदूतलाई निर्देशन दिइसकेको बताउनुभएको हो । उहाँले यसप्रति नेपाल सरकारको ध्यानाकर्षण भएको भन्दै नक्साकाे विषय राजनीतिक विषय नभएको भनी भारतीय सरकारका विदेशमन्त्रीबाट आधिकारिक धारणासमेत आइसकेको बताउनुभयो । देशको सार्वभौमसत्ता, राष्ट्रिय अखण्डता, स्वतन्त्रता र अन्तर्राष्ट्रिय सीमामा कुनै आँच आउन नदिन र नेपालको एक इन्च जमिन पनि अतिक्रमण हुन नदिन सरकार प्रतिबद्ध रहेको उहाँले स्पष्ट पार्नुभयो ।

उहाँले भन्नुभयो, ‘भारतकाे नयाँ संसद् भवनमा राखिएको नक्साकाे सम्बन्धमा नेपाल सरकारको ध्यानाकर्षण भएको छ । त्याे नक्शाकाे क्याप्शनमा सम्राट अशोकको समयमा उनको साम्राज्यको फैलावट जनाइएको भनी लेखिएको र त्याे राजनीतिक विषय नभएको भनी भारतीय सरकारका विदेशमन्त्रीबाट आधिकारिक धारणा आइसकेको व्यहोरा सम्मानित सदनलाई अवगत नै छ । यस विषयमा भारतीय पक्षसँग कुरा गरी प्रतिवेदन पठाउन नयाँ दिल्लीमा रहेका नेपाली राजदूतलाई निर्देशन दिइसकिएको छ ।’

मन्त्री साउदले भारतीय चलचित्र 'आदिपुरुष' मा सीताको बारेमा प्रयोग भएको संवादमा 'फ्याक्चुअल इरर' देखिएको भन्दै यस्तो हुनु उचित नभएको बताउनुभयो । उहाँले सीता नेपालकी छोरी भएको तथ्य सर्वमान्य भएको र भारतमा समेत यो विषय निर्विवाद भएको उल्लेख गर्नुभयो ।

मन्त्री साउदले लिम्पियाधुरा, लिपुलेक र कालापानी नेपाली भूमि भएको कुरामा सरकार दृढ रहेको बताउनुभयो । उहाँले यस विषयमा देशमा राष्ट्रिय सहमति नै रहेको बताउँदै भारतसँग भएका सीमा समस्याकाे समाधान स्थापित कुटनीतिक संयन्त्रमार्फत गरिने बताउनुभयो ।

उहाँले नेपालले केही मित्रराष्ट्रहरूसँग विगतमा गरेका समझदारीअनुसार परम्परागतरूपमा त्यहाँको राष्ट्रिय सेनामा नेपाली नागरिक भर्ना हुँदै आएकोमाबाहेक विदेशी सेनामा नेपाली नागरिक भर्ना हुन अनुमति दिने सरकारको कुनै नीति नभएको स्पष्ट पार्नुभयो ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्