मनसुनमा प्रि-मनसुनको जस्तो गतिविधि, एक ठाउँमा ठूलो पानी पर्दा आसपासका ठाउँमा सुक्खा

असार २६, २०८० मंगलबार ७:२५:३९ | उज्यालो सहकर्मी

काठमाण्डाै - यसपालिको मनसुनमा प्रि-मनसुनको जस्तो गतिविधि देखिएको छ । प्रि-मनसुनमा एक ठाउँमा ठूलो पानी परे पनि नजिकैको ठाउँमा पानी नपर्ने हुन्छ । अहिले मनसुनमा पनि यस्तै गतिविधि देखिएको छ । एक ठाउँमा ठूलो वर्षा भएर बाढी आउँदा पनि नजिकैको आसपासका क्षेत्रमा पानी परेको छैन ।

हिजो काठमाण्डौको कपन क्षेत्रमा बाढी आउने गरी वर्षा भएको थियो तर अन्य क्षेत्रमा भने खासै पानी परेन । देशका अन्य ठाउँमा पनि यस्तै भइरहेको छ । सामान्यतया मनसुनमा एकै पटक लगातारजसो धेरै ठाउँमा पानी पर्ने हुन्छ । तर यसपालि अहिलेसम्म त्यस्तो नदेखिएको मौसमविद् गोविन्द झा बताउनुहुन्छ ।

मनसुन भित्रिए पछि केही ठाउँमा बाढी पहिरो आउने गरी पानी परेको छ भने केही ठाउँमा सुक्खा छ । तराई मधेसका धेरैजसो ठाउँमा असारको अन्तिम हुन लाग्दासमेत पानी परेको छैन ।

यस्तै, मध्य क्षेत्रमा मनसुन भित्रिएको शुरुवातमा वर्षा भए पनि अहिले पानी परेको छैन । पानी नपर्दा धान रोपाइँ नै प्रभावित भइरहेको छ । किसान पानीको पर्खाइमा छन् । जलवायु परिवर्तन लगायतका कारण मौसममा समेत असर परिरहेको तर, यस विषयमा अध्ययन हुन बाँकी नै रहेको मौसमविद् बताउँछन् ।

मनसुन सक्रिय हुने क्रममै रहेकाले अहिले नै पानी पर्ने अवस्थालाई तुलना गर्न नमिल्ने मौसमविद्को भनाइ छ । मौसमविद्का अनुसार गएराति कर्णाली, गण्डकी र बाग्मती प्रदेशका केही ठाउँमा ठूलो पानी परेको थियो ।

आज पनि केही ठाउँमा ठूलो पानी पर्ने सम्भावना रहेको मौसमविद् गोविन्द झाले बताउनुभयो । उहाँका अनुसार आजभन्दा भोलि धेरै ठाउँमा पानी पर्ने सम्भावना छ । पानी परेका ठाउँमा बाढी पहिरोको जोखिम हुने भएकाले सतर्कता अपनाउन मौसमविद्को आग्रह छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्