नारायणगढ–बुटबल सडक : पश्चिम खण्डको म्याद १ वर्ष थप

साउन २४, २०८० बुधबार १७:१३:५ | रासस

नवलपुर – सुस्त गतिमा विस्तारको काम भएको गुनासो आइरहेको पूर्व–पश्चिम राजमार्गअन्तर्गत नारायणगढ–बुटवल खण्डको म्याद एक वर्ष थप भएको छ । शुरुवाती ठेक्का सम्झौताअनुसार अघिल्लो वर्षको साउन २२ गते सडक निर्माणको काम सकिनुपर्नेमा अहिले दोस्रो पटक म्याद थप गरिएको छ ।

आयोजना निर्देशनालयका आयोजना निर्देशक चुडा ढकालले निर्माण कम्पनीको म्याद थप गरिएको जानकारी दिनुभयो । उहाँका अनुसार नारायणगढ बुटवल सडक आयोजना पश्चिम खण्डको म्याद तीन सय ५० दिन थप भएको र पूर्वी खण्डको म्याद तीन सय ३० दिन थप गर्ने गरी छलफल अघि बढेको छ । ‘अघिल्लो वर्ष निर्माण कम्पनीले काम नै गर्दैन कि भनेर हामीले कारबाही गर्ने चेतावनी पनि दिएका थियौँ’, उहाँले भन्नुभयो, ‘हाम्रो चेतावनीपछि कम्पनीले सन्तोषजनक तरिकाले प्रगति गरेकाले म्याद थप्ने निर्णय गरेका हौँ ।’

पश्चिम खण्डको म्याद अगस्ट ६ मा सकिएकाले म्याद थप भइसकेको र पूर्वी खण्डको म्याद अगस्ट २८ मा सकिने भएकाले प्रक्रियामै रहेको जनाउँदै म्याद थप हुने निर्देशक ढकालले बताउनुभयो । ‘निर्माण कम्पनीले सडक विस्तारको काम छिटो सम्पन्न गर्नका लागि ठूलो अक्स्पाल्ट प्लान्ट (कालोपत्र गर्ने उपकरण) भित्र्याउँदैछ, केही दिनमा भन्सार जाँच भएर नेपाल भित्रिन्छ’, उहाँले भन्नुभयो, ‘त्यसपछि काम छिटो हुन्छ भन्ने हामीले विश्वास लिएका छौँ ।’ अहिले काम गरिरहेको ठेकेदारलाई खेदेर अर्को ठेक्का लगाउँदा सडकको काम सकाउन अझै चार÷पाँच वर्ष पछाडि धकेलिने भएकाले यसैको ठेक्का थप गरेर अघि बढ्नुको विकल्प नभएको आयोजना निर्देशक ढकालले बताउनुभयो ।

‘अहिले सडक विस्तारको काम गरिरहेको चाइनिज ठेकेदारले काम गर्न नदिए जाने मनसाय बनाएका छन् । ठेक्का तोडेर धरौटी जफत गर्नुभन्दा अरू कारबाही हामी गर्न सक्दैनौँ’, उहाँले भन्नुभयो, ‘हामीले ठेक्का तोडेको अवस्थामा उनीहरूले विभिन्न कारण देखाएर मुद्दा हाल्ने तयारी गरेका थिए, जस कारण हामीले मुद्दा हार्दा ठूलो क्षति बेहोर्नुपर्ने थियो ।’ निर्माण सामग्री नपाएको, विद्युतका तार नसारेको, रुख कटानमा ढिला गरेको लगायतका कारण देखाउँदै उनीहरू अदालत जाने तयारी गरेका बेला ठेक्का थप गर्नुको विकल्प नदेखिएको उहाँको भनाइ छ ।

निर्माण व्यवसायीले दुई वर्ष म्याद थप गर्न निवेदन दिएकोमा आफूहरूको दुई महिनासम्मको छलफलपछि झन्डै एक वर्ष म्याद थपको निर्णय गरिएको उहाँको भनाइ छ । सडक विस्तारको काम गरिरहेको चाइना स्टेट इन्जिनियरिङ कर्पोरेशन लिमिटेडका ठेक्का सह–व्यवस्थापक राकेश झाका अनुसार अहिले दुवै खण्डमा गरी झन्डै ३८ प्रतिशत भौतिक प्रगति भएको छ । एसियाली विकास बैंकको ८५ प्रतिशत ऋण सहयोगमा विस्तारको काम भइरहेको एक सय १४ किलोमिटर सडकमध्ये पूर्वी खण्डमा ६५ किलोमिटर र पश्चिम खण्डमा ४९ किलोमिटर सडक पर्दछ । उहाँका अनुसार पूर्वी खण्डमा अहिले ४० प्रतिशत र पश्चिम खण्डमा ३६ प्रतिशत भौतिक प्रगति भएको छ ।

‘हामीले दुवै खण्डको म्याद दुई वर्ष थप गर्ने गरी कन्सल्टेन्टलाई निवेदन दिएका थियौँ’, उहाँले भन्नुभयो, ‘कन्सल्टेन्टबाट सिफारिस भएर गएको तीन सय ५० दिन पश्चिम खण्डमा थप भएको छ, पूर्वी खण्डमा तीन सय ३० दिन थप गर्ने सिफरिस भएको छ ।’ थपिएको म्यादअनुसार पश्चिम खण्ड (दाउन्ने–बुटवल) को म्याद २३ जुलाइमा सकिन्छ । थप गरिएको अवधिमा सडक विस्तारको ७५ प्रतिशत काम सम्पन्न हुने सहव्यवस्थापक झाले दाबी गर्नुभयो ।

‘तेस्रो भेरियन्टको कोभिड, समयमा कच्चा पदार्थ नपाउनु, विद्युतका तार सार्न ढिला हुनु, रुख कटान तथा जिम्माको काममा ढिला हुनु लगायतका कारणले काम ढिला भएपछि म्याद थपको माग गरेका हौँ’, उहाँले भन्नुभयो, ‘अहिले निर्माण सामग्री पर्याप्त रहेको छ, कुनै अवरोध नभएमा काम तीव्र गतिमा अगाडि बढाउन सक्छौँ ।’ अहिले नारायणगढ–बुटवल खण्डअन्तर्गत पूर्वी खण्डमा १५ किलोमिटर सडक कालोपत्र भएको उहाँले जानकारी दिनुभयो ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

नारायणगढ–बुटबल सडक : पश्चिम खण्डको म्याद १ वर्ष थप

फाइल तस्बिर

तपाईको प्रतिक्रिया