पुलिसलाई हराउँदै गण्डकीले जित्याे राष्ट्रिय भलिबलको उपाधि

असोज २, २०८० मंगलबार १९:१७:५७ | सागर राज तिमिल्सिना

कास्की – गण्डकी प्रदेशले लामाचौर कप राष्ट्रिय भलिबल प्रतियोगितामा पुरुषतर्फको उपाधि जितेको छ ।

आज मङ्गलवार भएकाे फाइनल खेलमा विभागीय टाेली नेपाल पुलिस क्लबलाई ३–२ ले हराउँदै गण्डकीले उपाधिसहित एक लाख ५० हजार रुपैयाँ प्राप्त गर्‍याे । गएकाे वर्ष पनि यी दुवै टिम फाइनल पुगेकोमा लगातार वर्षाले खेल रोकिएपछि पुरस्कार बाँडेर लिएका थिए । 'लाइट प्रोटेस्ट' का कारण सोमवारको फाइनल १–१ सेटको बराबरीपछि आजका लागि सरेको थियो ।

लामाचौरकाे इन्द्रराज्यलक्ष्मी मावि परिसर भलिबल कोर्टमा भएको फाइनलमा पहिलो सेट २५–२३ ले जित्दै अग्रता लिएको पुलिसले दोस्रो सेट भने गुमायाे । दाेस्राे सेट गण्डकीले २५–१९ ले जित्याे । यस्तै तेस्रो सेट फेरि पुलिसले २५–२१ ले जिते पनि पछिल्ला दुई सेट गुमाउँदा उपाधिबाट वञ्चित बनेको हो । गण्डकीले चौथो सेट २८–२६ र अन्तिम सेट १५–११ ले जित्याे ।

उपविजेता बनेकाे पुलिसले पुरस्कार स्वरूप एक लाख रुपैयाँ प्राप्त गरेको छ । सशस्त्र प्रहरी बलको एपीएफ क्लब तेस्रो हुँदै ५० हजार रुपैयाँ पायाे ।

प्रतियोगितामा गण्डकीका रवि केसी सर्वोत्कृष्ट खेलाडी घोषित भए । यस्तै गण्डकीका हरि पाण्डे (बेस्ट ब्लकर), किरण गुरुङ (बेस्ट स्पाइकर) र रमेश केसी (बेस्ट कोच) बने । पुलिसका कुलबहादुर थापा (बेस्ट सर्भर), अभिषेक थापा (बेस्ट सेटर) र भीम गाहा (बेस्ट लिबेरो) घोषित भएको रेफ्री टहलसिंह थापाले बताए ।

पुरुषतर्फ उपविजेतामा सीमित भए पनि नेपाल पुलिस क्लबले सोमवार महिलातर्फको उपाधि जितेको थियो ।

नवआदर्श सामुदायिक विकास समाजको आयोजनामा २५ औँ संस्करणको लामाचौर तीज महोत्सवअन्तर्गत १० औँ संस्करणको लामाचौर कपमा महिलातर्फ चार र पुरुषतर्फ पाँच वटा टिमले भाग लिएका थिए ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

सागर राज तिमिल्सिना

कास्कीमा रहेर पत्रकारिता गर्ने सागर उज्यालाेका जिल्ला सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्