उत्पादन लागतमा नाेक्सानी बेहाेरेका १६ वटा कृषि फार्मलाई न्यूनतम समर्थन मूल्य प्रदान

फागुन २४, २०८० बिहीबार १२:३७:१२ | रासस

पोखरा – पोखरा महानगरपालिकाले उत्पादन लागतमा नोक्सानी बेहाेरेका १६ वटा कृषि फार्मलाई न्यूनतम समर्थन मूल्य प्रदान गरेको छ । महानगरका मेयर धनराज आचार्यले किसानलाई रकम प्रदान गर्नुभएको हो ।

महानगरले ६० हजार चार सय ४१ किलो च्याउ, २५ हजार चार सय १७ किलो गोलभेँडा, नौ हजार पाँच सय २० किलो सिमी र दुई सय ९१ किलो कोदो गरी ९५ हजार छ सय ६९ किलो उपजको २६ लाख ७९ हजार सात सय ६१ रुपैयाँ समर्थन मूल्य प्रदान गरेको हो ।

महानगरपालिकाले विभिन्न ३५ प्रकारका कृषि उपजको समर्थन मूल्य तोकेको छ । महानगरभित्र उत्पादन भएका तर तोकिएको मूल्य नपाएका किसानलाई प्रोत्साहनका लागि समर्थन मूल्य प्रदान गरिएको आर्थिक विकास महाशाखाका प्रमुख मनहर कडरियाले बताउनुभयो ।

उहाँले बाहिरबाट आउने उत्पादनसँग प्रतिस्पर्धा गर्न नसक्दा किसान विस्थापित हुँदै गएकाले त्यसलाई रोक्न महानगरले कृषि उपजको समर्थन मूल्य तोकेको उल्लेख गर्नुभयो । यदि किसानले आफ्ना उत्पादन समर्थन मूल्यभन्दा कममा बेच्नुपरेमा महानगरले बाँकी रकम किसानलाई दिन्छ ।

न्यूनतम समर्थन मूल्य तोकिएका बालीको दाबी गर्नका लागि किसानले आफूले लगाएको बालीको नाम, जात र क्षेत्रफल अगाडि नै दर्ता गर्नुपर्छ । समर्थन मूल्य प्राप्त गरेपछि किसानले कृषि व्यवसायका क्रममा आफूले बेहाेर्नुपरेको नोक्सानीमा मलम लगाउन महानगरपालिका सारथी बनेको किसानहरूको भनाइ छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्