सङ्घीय निजामती सेवा विधेयक प्रतिनिधि सभामा पेस

चैत १, २०८० बिहीबार १५:०:५९ | उज्यालो सहकर्मी

काठमाण्डौ — सङ्घीय निजामती सेवाको गठन, सञ्चालन र सेवाका सर्त सम्बन्धमा व्यवस्था गर्न बनेको विधेयक २०८० प्रतिनिधि सभामा पेस भएको छ ।

आज बसेको प्रतिनिधि सभा बैठकमा सङ्घीय मामिला तथा सामान्य प्रशासनमन्त्री भानुभक्त जोशीले सङ्घीय निजामती विधेयक पेस गर्नुभएको हो । यो विधेयक प्रतिनिधि सभामा गएको फागुन २१ गते दर्ता भएको थियो ।

प्रतिनिधि सभा नियमावलीको नियम १०७ अनुसार प्रतिनिधि सभाको अर्को बैठकमा विधेयकमाथिको सामान्य छलफल हुन सक्नेछ । विधेयकमाथि विचार गरियोस् भन्ने प्रस्तावमाथि सभामा छलफल भएर अगाडि बढेपछि सांसदहरूले संशोधन दर्ता गर्न सक्छन् । सांसदहरूको संशोधनसमेत राखेर विधेयकमाथि दफावार छलफल हुनेछ ।

यो विधेयकमा नेपाल मजदुर किसान पार्टीका सांसद प्रेम सुवालले विरोधको सूचना राख्नुभएको थियो, त्यस क्रममा सांसद सुवालले उठाएका प्रश्नहरूको जवाफ दिँदै सङ्घीय मामिला तथा सामान्य प्रशासनमन्त्री जोशीले सङ्घीयता कार्यान्वयनका लागि यो विधेयक आवश्यक रहेको बताउनुभयो ।

विधेयकले कर्मचारीलाई राजनीतिकरूपमा मुक्त बनाउने लगायतका उद्देश्य रहेको पनि उहाँले बताउनुभयो । प्रशासनिक सङ्घीयताको मूल कानुन निर्माणका लागि विधेयक तयार पारिएको हो ।

यसअघि एमाले अध्यक्ष केपी ओली नेतृत्वको सरकारले २०७५ सालको माघमा प्रतिनिधि सभामा दर्ता गरेको निजामती विधेयक फिर्ता भएपछि लामो समयको कसरतमा आज दोस्रो पटक दर्ता भएको हो । सङ्घीयता कार्यान्वयनमा आएपछि निजामतीसम्बन्धी ऐन बन्न नसक्दा प्रशासनीक सङ्घीयता कार्यान्वयन हुन नसकेको आवाज उठ्दै आएको छ ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

सङ्घीय निजामती सेवा विधेयक प्रतिनिधि सभामा पेस

फाइल फाेटाे

तपाईको प्रतिक्रिया