‘लकडाउन’मा प्रहरी र विपन्न परिवारलाई सहयोग गर्न मनकारी हातहरु बढे

चैत १८, २०७६ मंगलबार १६:१:२६ | भावुक योगी

बर्दिया– देश ‘लकडाउन’मा रहेको बेला दैनिक मजदुरी गरेर गुजारा गर्ने मानिसहरुको दैनिकी कसरी चलेको होला भन्ने धेरैलाई हेक्का छैन । यस्तै अहोरात्र खटिएका प्रहरीको अवस्था पनि कम कष्टपूर्ण छैन ।

यस्तो सङ्कटको बेलामा ठाकुरबाबा नगरपालिकाका प्रहरी र अति विपन्न वर्गलाई सहयोग गर्न मनकारी हातहरु अघि सरेका छन् । ‘लकडाउन’लाई प्रभावकारी बनाउन खटिएका ठाकुरबाबा नगरपालिकाका प्रहरीलाई हाम्रो मध्यवर्ती बचत तथा ऋण सहकारी संस्थाका कर्मचारीले करिब २५ हजार रुपैयाँ बराबरको ‘ड्राइ फुड’ वितरण गरेका छन् ।

नगरपालिकाका इलाका प्रहरी कार्यालय भुरिगाउँ, प्रहरी चौकी बगनाहा, प्रहरी चौकी ठाकुरद्वारा र प्रहरी चौकी बकुवाका लागि इप्रका भुरिगाउँका प्रहरी निरीक्षक वसन्त पाण्डेलाई चाउचाउ ५ सय ७० वटा, बिस्कुट ४ सय २० वटा, पानी २ सय ६४ बोतल र नुहाउने साबुन ३६ वटा हस्तान्तरण गरिएको छ ।

सहकारीको सामाजिक दायित्वअन्र्तगत संस्थाका कर्मचारीद्धारा सहयोग स्वरुप ‘लकडाउन’का बेला खटिएका प्रहरीलाई सहयोग सामाग्री वितरण गरिएको सहकारीका प्रबन्धक गणेश थापाले जानकारी दिनुभयो ।

दिगो ट्रेडर्सका प्रोप्राइटर गोविन्द आचार्यले पनि इलाका प्रहरी कार्यालय भुरिगाउँलाई ५६ किलो कपडा धुने सर्फ हस्तान्तरण गर्नुभएको छ ।

यसैगरी नगरपालिकाका दुई व्यवसायीले अति विपन्न परिवारलाई खाद्यान्न सहयोग गरेर मनकारी भावना देखाएका छन् । पेट्रोल पम्प व्यवसायी अनिलकुमार पौडेल र सुनचाँदी व्यवसायी नरेश सुनारले सोमबार ठाकुरबाबा वडा नम्बर १ का अति विपन्न १४ परिवारलाई खाद्य सामाग्री वितरण गर्नुभएको छ । प्रतिपरिवार १० किलो चामल, १ किलो दाल, १ प्याकेट तेल र १ प्याकेट नुन विपन्न परिवारलाई सहयोग गरिएको वडा अध्यक्ष श्यामलाल थारुले बताउनुभयो ।

दैनिक ज्याला मजदुरी गर्ने वर्गको समस्या भनेकै खाद्यान्नको अभाव भएकोले उनीहरुको दैनिकीमा केही सहज होस् भनेर खाद्यान्न सहयोग गरिएको व्यवसायी पौडेलले बताउनुभयो । वडाअध्यक्षले पहिचान गरेका परिवारलाई सहयोग प्रदान गरिएको उहाँको भनाइ छ । आउँदा दिनमा वडाले पहिचान गरेका थप विपन्न परिवारलाई पनि सहयोग गरिने अर्का दाता सुनारले बताउनुभयो ।

साँझबिहान हातमुख जोर्न पिरलो भइरहेको बेला यो सहयोगले आफूहरुलाई निकै राहत महसुस भएको सरस्वती बुढाले बताउनुभयो ।

त्यसैगरी ठाकुरबाबा नगरपालिका वडा नम्बर ६ का युवाहरुले बकुवामा रहेको अस्थायी प्रहरी कार्यालयलाई खाद्यान्न हस्तान्तरण गरेका छन् ।
सुरक्षा निकायलाई काम गर्न सहज होस् भन्ने उद्देश्यले युवाहरुले प्रहरीलाई ७२ बोतल पानी, १ सय ८० वटा चाउचाउ, १ दर्जन साबुन, २५ किलो चिउरा र १ बोरा चामल हस्तान्तरण गरेका हुन् ।

दिनभर सडकमा खटिने प्रहरीलाई ‘ड्युटी’ गर्न सजिलो होस् भन्ने उद्देश्यले खाद्यान्न सामाग्री हस्तान्तरण गरिएको समाजसेवी बब काजी भनेर चिनिने विकास केसीले जानकारी दिनुभयो ।

यस्तै सुखाड सुतैया मध्यवर्ती सामुदायिक वन समूहका अध्यक्ष लंक अधिकारीले घरघर गएर नुहाउने साबुन र ३ सय २५ वटा मास्क वितरण गर्नुभएको छ ।

अन्तिम अपडेट: मंसिर १३, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

भावुक योगी

बर्दियाका उज्यालो सहकर्मी भावुक योगी बर्दियाको रेडियो टाइगरमा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्