मैले पनि त शेयरमा आफ्नो लगानी गर्न पाउनु पर्‍याे नि ! : नेप्सेका सीईओ साउद

साउन ३२, २०७८ सोमबार १५:२:५० | उज्यालो सहकर्मी

काठमाण्डाै – शेयर बजारको नियामक निकाय नेपाल स्टक एक्सचेन्ज (नेप्से) का प्रमुख कार्यकारी अधिकृत (सीईओ) चन्द्रसिंह साउदले आफूलाई कुनै पनि कम्पनीको ओटीसी शेयर कारोबार गर्न विद्यमान ऐन, कानुनले नरोकेको स्पष्टीकरण दिनुभएको छ ।

आज सोमवार प्रतिनिधि सभा अन्तर्गतको अर्थ समितिको बैठकमा समितिका सदस्यहरूले नियामक निकाय नेप्सेका प्रमुख आफैँले किन गैरजिम्मेवार ढङ्गले सर्वोत्तम सिमेन्टको शेयर खरिद प्रकरणमा संलग्न भएको भनी प्रश्न गरेका थिए । त्यसको जवाफ दिने क्रममा प्रमुख कार्यकारी अधिकृत साउदले नेप्से प्रमुखको हैसियतमा कुनै पनि कम्पनीको ओटीसी शेयर कारोबार गर्न विद्यमान कानुनले आफूलाई नरोकेको जवाफ दिनुभयो ।

उहाँले भन्नुभयो, ‘हाम्रो सञ्चालक समितिको आचारसंहिताले रेगुलेटर सेकेन्डरी मार्केटबाहेक अन्य कुनै पनि संस्थाको संस्थागत शेयर किन्न कुनै बाधा पर्ने छैन भनेकाे छ । यही व्यवस्था हाम्रो ऐनमा पनि लेखिएको छ । त्यही प्रावधान अन्तर्गत यो शेयर कारोबार गरिएको हो । नियम मिचेर यो काम गरिएको होइन । म पनि त नागरिक हुँ नि । मैले पनि त आफ्नो लगानी गर्न पाउनु पर्‍याे नि !’

प्रमुख कार्यकारी अधिकृत साउदले विभिन्न सञ्चारमाध्यमले शेयर कारोबारसम्बन्धी विद्यमान ऐन, कानुनको व्यवस्था नबुझी सर्वोच्च सिमेन्टको ओटीसी शेयर नियामक निकाय आफैँले खरिद गरेको भनेर झुटा समाचार सम्प्रेषण गरेको दाबीसमेत गर्नुभयो ।

बैठकमा समितिका सदस्यहरूले शेयर बजारमा गैरकानुनी, अनैतिक गतिविधि बढाउने काम हुन नदिन सचेत गराउँदा गराउँदै नेप्से जस्ता नियामक निकाय आफैँले नैतिक प्रश्न खडा हुने गरी ओटीसी शेयर कारोबारमा संलग्न भएको भन्दै आपत्ति जनाएका थिए ।

समिति रामकुमारी झाँक्रीले शेयर बजारमा गैरकानुनी, अनैतिक गतिविधि बढाउन नदिन समितिले पटक–पटक दिएको सुझावप्रति जिम्मेवार हुन नसकेको भन्दै नेप्सेका पदाधिकारीमाथि आक्रोश व्यक्त गर्नुभयो । उहाँले आफैँमाथि प्रश्न उठ्ने गरी गैरजिम्मेवार काम नेप्सेले गरेको भन्दै त्यसको छानबिन गरेर दोषीमाथि कारबाही गर्ने चेतावनीसमेत दिनुभयो ।

समितिकी अर्का सदस्य निरादेवी जैरुले शेयर बजारका लगानीकर्ताप्रति जिम्मेवार बन्न नेप्से लगायतका नियामक निकायलाई सचेत गराउनुभयो । उहाँले नेप्सेजस्ता संस्थालाई नीति र विधि अनुसार चलेर शेयर बजारलाई स्वस्थ ढङ्गले अघि बढाउन आग्रह गर्नुभयो ।

अर्थ समितिका सभापति कृष्णप्रसाद दाहालले नेप्सेलगायतका नियामक निकाय आफैँले शेयर बजारमा खेल खेलेको भन्दै त्यसलाई रोक्नका लागि आवश्यक कानुनी व्यवस्था गर्ने चेतावनी दिनुभयो । उहाँले रेफ्री खेलमा सहभागी हुन नहुने व्यवस्था भए पनि शेयर बजारमा त्यो नियम उल्लङ्घन गर्ने काम गरिएको भन्दै आपत्ति जनाउनुभयो ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्