लमजुङमा नाटककाे आकर्षण बढ्दै

मंसिर २२, २०७८ बुधबार १३:३१:१७ | श्यामशितल परियार

लमजुङ – लमजुङ आफैमा कला, साहित्य, गीत–संगीतको उर्वर भूमि हो । त्यही थलोमा पछिल्लो समय साहित्यको एक सशक्त विधा नाट्य क्षेत्र पनि मौलाउँदै गएको छ । नाट्य क्षेत्रमा नवपुस्ताको आकर्षण बढ्दो छ ।

पछिल्लो समय लमजुङमा नाट्य क्षेत्रमा आकर्षण बढ्दै गएको छ । जिल्लामा नाट्य क्षेत्रमा क्रियाशील मञ्जरी नाट्य समूहले विभिन्न मेला, पर्व, उत्सवमा नाटक प्रदर्शन गर्दै आएको छ । संस्थाले जिल्लाका विभिन्न विद्यालयसम्म पुगी नाटकको महत्व बुझाउनुका साथै विभिन्न समयमा प्रदर्शन हुने नाटकमा नवप्रतिभालाई स्थान दिएसँगै यसप्रति आकर्षण बढ्दै गएको हो ।

जिल्लामा रहेका नाट्यकर्मीका साथै नवप्रतिभाहरुको क्षमता विकासका लागि विभिन्न समयमा केन्द्र, प्रदेशबाट रंगकर्मी ल्याएर तालिम, प्रशिक्षण समेत दिने गरिएको छ ।

बिस्तारै नाट्य क्षेत्रको महत्व बुझ्नुका साथै मेहनत गरी नाट्य क्षेत्रमा रम्न, जम्न सके यसैबाट पहिचान बनाउनुका साथै यसैमा भविष्यको सम्भावना देखेर पनि जिल्लामा यस क्षेत्रमा लाग्न चाहनेको जमात बिस्तारै बढ्दै गएको मञ्जरी नाट्य समूह लमजुङका अध्यक्ष केदार बोहोराले बताउनुभयो ।

‘विभिन्न समयमा नाटकसम्बन्धी तालिम सञ्चालन गरिएको छ । नाटक प्रदर्शन गर्ने गरिएको छ,’ उहाँले भन्नुभयो, ‘नवप्रतिभाले अवसर पाएका छन् । नाट्य क्षेत्रमा अवसर देखेर बिस्तारै यस क्षेत्रमा तानिनेको संख्या बढ्दै गएको छ ।’

यसअघि मञ्जरी नाट्य समूहको सक्रियतामा प्रदर्शन गरिएको नाटक ‘पानीघट्ट’ र ‘फड्के’ले धेरैको मन जितेको थियो ।

नेपाली रंगमञ्चमा तुलनात्मक रुपमा महिलाको संख्या न्यून रहेको रंगकर्मी बताउँछन् । तर लमजुङमा भने नाट्य क्षेत्रमा महिलाको संख्या र आकर्षण निकै राम्रो छ । नाट्य गतिविधिमा महिलाको संख्या बढ्नु सकारात्मक पक्ष रहेको कतिपय रंगकर्मी बताउँछन् ।

‘यस क्षेत्रमा महिलाको संख्या तुलनात्मक रुपमा कम देखिन्छ । तर लमजुङमा भने महिलाको सहभागिता राम्रो देखिन्छ,’ मण्डला थिएटरका विद्यार्थी एवं नाटक सहजकर्ता शिव परियारले भन्नुभयो, ‘यो राम्रो पक्ष हो । यहाँ नाटकको फस्टाउँदै गएको छ ।’

विगतमा केन्द्रमै सीमित रहेकाे नाट्य क्षेत्र अहिले भने जिल्ला/जिल्लामा विस्तार भएको छ ।

लमजुङमा मात्र नभई पछिल्लो समय गण्डकी प्रदेशमै नाट्य क्षेत्र सुनौलो भएर अघि बढेको पोखरा थिएटरका क्रिएटिभ डाइरेक्टर परिवर्तनको भनाइ छ ।

‘विगतमा पोखरा आसपासका क्षेत्रमा रंगमञ्चका गतिविधि हुन्थे । अहिले प्रदेशका विभिन्न जिल्लानमा नाट्य संघसंस्था खुलेका छन् । नाटकको काम सुरुवात भइरहेको छ,’ रंगकर्मी परिवर्तनले भन्नुभयो ।

अबको केही वर्षमै हरेक जिल्लामा नाटक घर र नाट्य संस्था खुल्ने र नाट्य गतिविधि संचालन हुनेमा उहाँ आशावादी हुनुहुन्छ ।

‘गण्डकी प्रदेशमै अहिले नाट्य क्षेत्र सुनौलो भएर गएको छ,’ उहाँले भन्नुभयो ।

नाट्य क्षेत्रबाटै मौलिक कला, परम्परा, भाषा, साहित्य संस्कृतिको जगेर्ना गर्न सकिने भएकाले पनि समुदायसम्म यसको महत्व बुझाउन जरुरी रहेको र नाट्य क्षेत्रको श्रीवृद्धिका लागि सबै पक्ष जुट्नु आवश्यक रहेको सरोकारवालाहरु बताउँछन् ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्