अझै सञ्चालनमा आएन काेटबाडा विमानस्थल

भदौ १२, २०७९ आइतबार २०:१७:१२ | मनिराज पाण्डे

कालीकोट – २०४२ सालमा निर्माण कार्य सुरु गरिएको कालीकोटको कोटबाडा विमानस्थल अझै सञ्चालनमा आउन सकेको छैन । ‘म जन्मेकै साल विमानस्थलको काम सुरु गरेको भन्ने सुनेको हुँ । अहिले म ३६ वर्ष पुगेर ३७ लागेँ, अझै सञ्चालनमा आएको छैन’, नरहरिनाथ गाउँपालिका १ का गणेश विष्टले भन्नुभयो ।

बजेट अभाव र तत्कालीन सशस्त्र द्वन्द्वका कारण भनेअनुसार काम समयमै हुन सकेन । ढिलै भए पनि २०७३ माघ २८ गते परीक्षण उडान भयो । तर त्यसपछि यहाँ कुनै विमान चलेका छैनन् । अहिले विमानस्थलमा कालोपत्र गर्ने काम अन्तिम चरणमा छ ।

सदरमुकाम वल्लो डाँडामा र विमानस्थल पल्लो डाँडामा छ । हेर्दा नजिकै देखिए पनि हिँडेर जान झन्डै एक दिन लाग्छ । अहिले भने पालिकाले सदरमुकामबाट विमानस्थल जाने सडक बनाइरहेको छ । सदरमुकामबाट विमानस्थल जान सजिलो होस् भनेर सदरमुकाम मान्मदेखि कोटबाडासम्म केबुलकार जडानको पहल पनि थालिएको छ ।

कर्णाली प्रदेशका तत्कालीन मुख्यमन्त्री महेन्द्रबहादुर शाहीको पहलमा केबुलकार निर्माणका लागि डीपीआर समेत तयार भइसकेको छ । केबुलकार निर्माणका लागि स्रोतको खोजी भइरहेको नरहरिनाथ गाउँपालिका अध्यक्ष नगेन्द्र विष्टले बताउनुभयो । अहिले कर्णाली प्रदेशका जीवनबहादुर शाही सङ्घीय सरकारको पर्यटनमन्त्री भएका बेला झन्डै पाँच वर्षअघि विमानस्थलमा एक दिन परीक्षण उडान गरिएको थियो ।

२०४२ सालमा तत्कालीन राष्ट्रिय पञ्चायत सदस्य धर्मदत्त उपाध्यायले रास्कोटको सिप्टी पाटन र जिल्ला पञ्चायत सभापति दीपबहादुर शाहीले मान्मको ताडीमा विमानस्थल बनाउने योजना अघि सार्नुभएको थियो । तर फेरि दुवै जनाले कोटबाडामा विमानस्थल बनाउने सहमति गर्नुभयो । तत्कालीन जिल्ला पञ्चायतबाट विनियोजन गरेको एक लाख रुपैयाँबाट विमानस्थल निर्माणको काम सुरु गरिएको थियो ।

सशस्त्र द्वन्द्वको बेला विमानस्थलमा काम गर्ने क्रममा स्थानीय सात जनासहित धादिङ, काभ्रे, सिन्धुली र रामेछापबाट आएका ३५ जनाको ज्यान जाँदा काम प्रभावित भएको थियो ।

अन्तिम अपडेट: मंसिर ११, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

मनिराज पाण्डे

कालिकोटका पत्रकार मनिराज पाण्डे उज्यालोका जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्