सुदूरपश्चिम प्रदेशबाट ४८ प्रतिनिधि छनोट हुँदै

मंसिर १, २०७९ बिहीबार १६:११:४३ | रासस

कैलाली – आउँदो आइतबार हुन लागेको प्रतिनिधिसभा र प्रदेशसभा सदस्यको चुनावमा सुदूरपश्चिम प्रदेशबाट ४८ प्रतिनिधि छनोट हुँदैछन् ।

प्रतिनिधिसभा सदस्यका लागि १६ र प्रदेशसभा सदस्यका लागि ३२ प्रतिनिधि छनौट हुन लागेका हुन् । नौ जिल्ला रहेको प्रदेशको तराईको जिल्ला कैलालीबाट सबैभन्दा बढी प्रतिनिधिसभाका लागि पाँच सदस्य चुनिन लागेका छन् ।

अर्को तराईकै जिल्ला कञ्चनपुरबाट प्रतिनिधिसभाका तीन, पहाडको अछामबाट दुई र अन्य पहाडी जिल्ला डोटी, डडेलधुरा, बैतडी, बझाङ, बाजुरा र दार्चुलाबाट एक–एक जना चुनिन लागेका हुन् । कानुनी व्यवस्थाअनुसार प्रतिनिधिसभा सदस्यको प्रत्येक निर्वाचन क्षेत्रबाट प्रदेशसभा सदस्यका लागि दुई–दुई जना निर्वाचित हुन लागेका हुन् ।

विसं २०७४ मा भएको प्रतिनिधिसभा र प्रदेशसभा सदस्यको चुनावमा नेकपा एमाले, नेकपा माओवादी केन्द्रसहितको तत्कालीन वाम गठबन्धन अधिकांश क्षेत्रमा विजयी भएको थियो । डडेलधुरा र कैलाली क्षेत्र नं १ बाहेक सबै क्षेत्रमा वाम गठबन्धनका प्रत्यासी प्रतिनिधिसभामा विजयी भएका थिए ।

डडेलधुरामा प्रधानमन्त्री देउवा र कैलाली–१ मा रेशमलाल चौधरी विजयी हुनुभएको थियो । प्रदेशसभा सदस्यका लागि ३२ क्षेत्रमध्ये प्रत्यक्षतर्फ पाँच निर्वाचन क्षेत्रबाहेक अन्यमा वाम गठबन्धनका प्रत्यासी विजयी भएका थिए ।

आउने चुनावमा प्रधानमन्त्री एवं नेपाली कांग्रेसका सभापति शेरबहादुर देउवा डडेलधुराबाट प्रतिनिधिसभा सदस्यका लागि प्रतिस्पर्धी हुनुहुन्छ । विसं २०४८ देखि २०७४ सम्म भएका सबै चुनावमा उहाँ नै विजयी हुनुभएको थियो ।

चुनावमा यो पटक उहाँ डडेलधुराबाट सातौँपटक प्रतिस्पर्धी हुनुभएको छ । यसअघिका चुनावमा पार्टीको तर्फबाट एक्लै प्रतिस्पर्धा गरेर विजयी हुनुभएका प्रधानमन्त्री देउवालाई आउने चुनावमा नेकपा माओवादी केन्द्रको साथ छ ।

विसं २०६४ यता भएका चुनावमा देउवाका मुख्य प्रतिस्पर्धी रहेका माओवादीका नेता खगराज भट्ट आउने चुनावमा डडेलधुराको प्रदेशसभा सदस्यमा वाम लोकतान्त्रिक गठबन्धनबाट प्रतिस्पर्धा गर्दै हुनुहुन्छ । भट्ट हाल माओवादीको सुदूरपश्चिम इन्चार्ज हुनुहुन्छ ।

कैलाली निर्वाचन क्षेत्र नं ४ बाट एमालेका प्रदेश इन्चार्ज एवं पूर्वमन्त्री लेखराज भट्ट प्रतिस्पर्धी हुनुहुन्छ । उहाँले वाम–लोकतान्त्रिक गठबन्धनका तर्फबाट कांग्रेसका सुदूरपश्चिम प्रदेश सभापति एवं पूर्वमन्त्री वीरबहादुर बलायरसँग प्रतिस्पर्धा गर्दै हुनुहुन्छ । उद्योग, वाणिज्य तथा आपूर्तिमन्त्री एवं कांग्रेसका प्रभावशाली नेता दिलेन्द्रप्रसाद बडू दार्चुलाबाट वाम लोकतान्त्रिक गठबन्धनका तर्फबाट प्रतिस्पर्धी हुनुभएको छ । उहाँ र एमालेका नेता एवं पूर्वमन्त्री गणेशसिंह ठगुन्नाबीच प्रतिस्पर्धा हुने आँकलन गरिएको छ ।

बाजुरामा कांग्रेसका सहमहामन्त्री बद्रिप्रसाद पाण्डेय र एमालेका स्थायी कमिटी सदस्य कर्ण थापाबीच टक्कर छ । अछाम–१ मा श्रम तथा रोजगारमन्त्री एवं नेकपा एकीकृत समाजवादीका नेता शेरबहादुर कुँवरलाई एमाले नेता एवं प्रदेश सरकारका पूर्वमन्त्री झपटबहादुर बोहराले टक्कर दिइरहनुभएको छ ।

कैलाली–१ मा नागरिक उन्मुक्ति पार्टीका केन्द्रीय अध्यक्ष रञ्जिता श्रेष्ठ चौधरी प्रत्यासी हुनुहुन्छ । टीकापुरको हिंसात्मक घटनामा दोषि ठहर रेशमलाल चौधरीकी पत्नी उहाँले कांग्रेसका प्रभावशाली नेता एवं पूर्वमन्त्री रामजनम चौधरी र एमाले नेता तपेन्द्र रावलसँग प्रतिस्पर्धा गर्दै हुुनुहुन्छ । यो क्षेत्रमा कांग्रेसका प्रत्यासीलाई सत्ता गठबन्धनको बलियो साथ छ । एमालेलाई जनता समाजवादीको साथ रहँदा नागरिक उन्मुक्ति पार्टी भने एक्लै चुनावी मैदानमा उत्रिएको छ ।

वाम–लोकतान्त्रिक गठबन्धनबाट कांग्रेसका केन्द्रीय सदस्य एनपी साउद कञ्चनपुर–२, अर्का केन्द्रीय सदस्य रमेश लेखक कञ्चनुर–३ बाट प्रतिस्पर्धा गर्दै हुनुहुन्छ । माओवादीका केन्द्रीय सदस्य बिना मगर कञ्चनपुर–१ बाट प्रत्यासी हुनुहुन्छ । क्षेत्र–३ मा एमालेका निरुदेवी पाल, क्षेत्र २ मा एमालेकै नरबहादुर धामी क्षेत्र–१ मा एमालेकै तारालामा तामाङलगायत प्रतिस्पर्धामा हुनुहुन्छ ।

सुदूरपश्चिम प्रदेशमा १६ लाख ५८ हजार चार मतदाता छन् । सबैभन्दा बढी कैलाली जिल्लामा पाँच लाख ३५ हजार पाँच सय १४ मतदाता छन् । कञ्चनपुरमा तीन लाख दुई हजार पाँच सय नौ र अछाममा एक लाख ५८ हजार छ सय ५७ मतदाता छन् ।

सबैभन्दा कम बाजुरामा ८३ हजार पाँच सय ६७ मतदाता छन् । बझाङमा एक लाख २२ हजार तीन सय ७६, दार्चुलामा ८९ हजार एक सय ५४, डडेलधुरामा ९१ हजार दुई सय एक, बैतडीमा एक लाख ५० हजार एक सय २९ र डोटीमा एक लाख २४ हजार आठ सय ७० मतदाता छन् । प्रदेशमा अन्य मतदाता (तेस्रोलिङ्गी) १८ छन् ।

प्रदेश निर्वाचन कार्यालयका अनुसार चुनावका लागि प्रदेशभर एक हजार एक सय ६१ मतदानस्थल र दुई हजार एक सय ४६ मतदान केन्द्र तोकिएको छ । तोकिएका मतदानस्थलमा कैलालीमा दुई सय ३७, डोटीमा एकसय १५, बाजुरामा ७०, बझाङमा एकसय ३५ र अछाममा एकसय ३० छन् । यसैगरी कञ्चनपुरमा एकसय ३२, डडेलधुरामा एकसय एक, बैतडीमा एकसय २९ र दार्चुलामा एकसय १३ मतदानस्थल तोकिएको छ ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्