चितवन–२ मा कहिले हुन्छ उपचुनाव ?

माघ १५, २०७९ आइतबार १५:५०:१५ | उज्यालो सहकर्मी

काठमाण्डाै – सर्वोच्च अदालतले रवि लामिछानेको नागरिकता अवैध ठहर गर्दै सांसद पद खारेज गरिदिएपछि चितवनको क्षेत्र नम्बर २ मा उपचुनाव हुने भएको छ । रवि लामिछाने निर्वाचित भएको चितवन–२ मा अदालतको फैसलापछि सांसद पद रिक्त रहेको छ । अब निर्वाचन आयोगले उपचुनाव गराउनेछ ।

चितवन–२ मा चुनाव कहिले हुन्छ भन्ने चौतर्फी चासो बढेको छ । निर्वाचन आयोगले भने उपचुनावको बारेमा कुनै प्रक्रिया थालेको छैन । किनकि आयोगलाई चितवन–२ मा सांसद पद रिक्त रहेको लिखित जानकारी प्राप्त भएको छैन ।

‘सङ्घीय संसद् सचिवालयबाट पद रिक्त रहेको पत्र प्राप्त हुनुपर्छ, त्यसपछि मात्रै हामीले आवश्यक प्रक्रिया अघि बढाउने हो । तर अहिलेसम्म सचिवालयबाट हामीलाई सांसद पद रिक्त भएको सूचना प्राप्त भइसकेको छैन’, निर्वाचन आयोगका सहायक प्रवक्ता सूर्यप्रसाद अर्यालले उज्यालो अनलाइनसँग भन्नुभयो ।

उहाँले अहिले मतदाता नामावलीमा नाम दर्ताको काम भइरहेको र उपचुनाव हुने भएमा निश्चित समय दिएर मतदाता नामावलीका सबै काम गर्नुपर्ने बताउनुभयो । ‘पद खाली भएको यति समयभित्र चुनाव गराउनुपर्छ भन्ने उल्लेख छैन तर हामीलाई संसद् सचिवालयबाट पत्र प्राप्त भएपछि प्रक्रिया थालिहाल्छौँ’, अर्यालले भन्नुभयो ।

संसद् सचिवालयले निर्वाचन आयोगलाई कहिले पठाउँछ त पत्र ? संसद् सचिवालयका सहायक प्रवक्ता दशरथ धमला भन्नुहुन्छ, ‘सर्वोच्च अदालतले गरेको फैसला लिखितरूपमा हामीलाई प्राप्त हुनुपर्छ, तबमात्रै हामीले निर्वाचन आयोगलाई पत्र पठाउँछौँ ।’

अहिले रवि लामिछानेको सांसद पद खारेज भएको विषय सचिवालयले सञ्चारमाध्यमबाट मात्रै थाहा पाएको र सर्वोच्चबाट लिखित जानकारी र फैसलाको पूर्ण पाठ प्राप्त भएपछि आयोगलाई पत्र पठाउने धमलाले बताउनुभयो ।

यसैबीच रवि लामिछानेले जिल्ला प्रशासन कार्यालय काठमाण्डौबाट आज आइतवार पुनः नेपाली नागरिकताको प्रमाणपत्र लिनुभएको छ ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्