नयाँ नागरिकता लिएपछि लामिछाने गृहमन्त्रीमा फर्कने तयारीमा, ओली र प्रचण्डबीच सहमति हुन बाँकी

माघ १६, २०७९ सोमबार ८:५:१२ | उज्यालो सहकर्मी

काठमाण्डाै - सर्वोच्च अदालतको आदेशअनुसार नयाँ नागरिकता लिएका राष्ट्रिय स्वतन्त्र पार्टीका सभापति रवि लामिछानेले फेरि उपप्रधानमन्त्री र गृहमन्त्रीको जिम्मेवारीमा फर्कने पहल थाल्नुभएको छ ।

हिजो नागरिकता लिएर पार्टी सभापतिको जिम्मेवारीमा फर्किएलगत्तै राष्ट्रिय स्वतन्त्र पार्टीले लामिछानेलाई फेरि सरकारको पुरानै जिम्मेवारीमा फर्काउनुपर्ने निर्णय गरेको छ । उहाँलाई तत्कालै सरकारको पुरानै जिम्मेवारीमा फर्काउने या नफर्काउने विषयमा प्रधानमन्त्री पुष्पकमल दाहाल प्रचण्ड र एमाले अध्यक्ष केपी शर्मा ओलीबीच हिजो कुराकानी भए पनि निर्णय भइसकेको छैन ।

शुक्रवार सर्वोच्च अदालतले पुरानो नागरिकतालाई मान्यता नदिएपछि लामिछानेले हिजो काठमाण्डौ जिल्ला प्रशासनबाट नागरिकता लिनुभएको छ । नयाँ नागरिकता लिएर पार्टी सभापतिको जिम्मेवारीमा फर्केलगत्तै हिजो बालुवाटार पुगेका लामिछानेले आफूलाई पुनर्बहाली गर्न प्रधानमन्त्रीसँग प्रस्ताव गर्नुभएको छ । तर नागरिकता मुद्दा सल्टिए पनि पुरानै नागरिकताका आधारमा राहदानी लिएकोबारे लामिछानेमाथि प्रहरी अनुसन्धान कायमै छ ।

लामिछानेले नयाँ नागरिकता लिएसँगै राहदानी विभाग पुगेर पुरानो नागरिकताका आधारमा लिएको राहदानी फिर्ता गरिसक्नुभएको छ । राहदानीको विवाद सुल्झिएपछि मात्रै पुरानो जिम्मेवारीमा फर्कन दबाब भए पनि लामिछाने तत्कालै उपप्रधान र गृहमन्त्रीको जिम्मेवारीमा फर्कने तयारीमा हुनुहुन्छ ।

लामिछानेले नागरिकताको मुद्दा मिलेको र केही दिनमै राहदानीको विषय पनि सल्टाउने विश्वास दिलाउन खोज्नुभएको छ । यसबारे ओली र प्रचण्डबीच थप छलफल भएपछि मात्रै निर्णय हुनेछ । अदालतको आदेशपछि नयाँ नागरिकता लिएका लामिछाने गैरसांसदको रुपमा ६ महिना मन्त्री बनेर फेरि चितवन क्षेत्र नम्बर २ बाट उपचुनाव जितेर आउने योजनामा हुनुहुन्छ । उपचुनाव कहिले हुन्छ भन्ने चाहिँ यकिन भइसकेको छैन ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्