राष्ट्रियताकाे कुरा गर्दा कसैले चित्त नदुखाए हुन्छ : अध्यक्ष ओली

फागुन २१, २०७९ आइतबार १७:१५:१४ | उज्यालो सहकर्मी

काठमाण्डाै – नेकपा एमालेका अध्यक्ष केपी शर्मा ओलीले सरकार राष्ट्र र नागरिककाे हित विपरीत चल्न खोजे सह्य नहुने चेतावनी दिनुभएको छ । उहाँले राष्ट्र र नागरिककाे हित विपरीत चल्न खोज्ने सरकारका कुनै पनि गतिविधिलाई आफूहरूले सफल हुन नदिने बताउनुभयो ।

सुखानीका शहीदहरूको स्मृतिमा आइतवार पार्टी केन्द्रीय कार्यालयमा आयोजित एक कार्यक्रममा बोल्दै अध्यक्ष ओलीले आफूहरूले राष्ट्रियताको कुरा गर्दा कसैले चित्त नदुखाए हुनेसमेत बताउनुभयो । राष्ट्रको स्वाधीनता र स्वाभिमानमाथि अतिक्रमण गरिए वा होच्याउने काम गरिए आफूलाई स्वीकार्य नहुने उहाँको भनाइ थियो ।

सत्ता समर्थक दलहरूले सत्ता स्वार्थको राजनीति गरिरहेको उल्लेख गर्दै अध्यक्ष ओलीले आफूहरू भने राष्ट्र र नागरिककाे हितका लागि काम गरिरहने आश्वासन दिनुभयाे । उहाँले सत्ता स्वार्थको राजनीति गर्दा देश डुब्छ भने, यहाँको भूगोलमाथि अतिक्रमण हुन्छ भने त्यसमा टुलुटुलु हेरेर बस्ने नसकिने प्रतिक्रिया दिनुभयाे ।

ओलीले भन्नुभयो, ‘हामी हाम्रो राष्ट्रियता, राष्ट्रको सार्वभौमसत्ता, स्वाधीनता, स्वतन्त्रतालाई प्यारो गर्दछौँ । भौगोलिक अखण्डता, हाम्रो भूमिलाई हामी प्यारो गर्छाैँ । यसमा कसैले पनि अतिक्रमण गर्नु या यसलाई होच्याउनु उचित हुँदैन । हामी त्यस्तो भयो भने सहदैनौँ । राष्ट्रको हित, नेपाली नागरिककाे हितभन्दा विपरीत सरकार कुनै पनि कारणले, कुनै पनि हिसाबले चल्न चाहन्छ, खोज्छ भने त्यसको हामी विरोध गर्छाैँ ।त्यस्ता कुराहरूलाई सफल हुन दिँदैनौँ । यसो भन्दा कसैलाई चित्त दुख्छ भने दुखोस् । हामी कसैको चित्त होइन् राष्ट्रिय हितको रक्षा गर्छाैँ । हाम्रो राष्ट्रिय हितसँग अरूको अहित जोडिएको छैन ।’

अध्यक्ष ओलीले माओवादी जनयुद्धका कारण देशमा राजतन्त्रको अन्त्य नभएको दाबीसमेत गर्नुभयो । २०६५ सालमा राजतन्त्रको अन्त्य भएको तर माओवादीको हिंसात्मक गतिविधि २०६३ सालमै अन्त्य भएकाले उनीहरूकै कारण नेपालमा राजतन्त्र अन्त्य भएको भन्न नमिल्ने उहाँको तर्क थियो ।

कार्यक्रममा बाेल्दै अध्यक्ष ओलीले आफूहरूले वास्तविक शहीदहरूकाे मात्रै सम्मान गर्ने पनि बताउनुभयो ।

अन्तिम अपडेट: मंसिर १२, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्