वैदेशिक रोजगार : आर्थिक सहायताका लागि अब पालिकाबाटै यसरी दिनुहोस् निवेदन

असोज १६, २०७६ बिहीबार १०:१:१ | रासस

काठमाडौ – वैदेशिक रोजगारीका क्रममा मृत्यु भएका कामदारका परिवारले आर्थिक सहायताका लागि सम्बन्धित पालिकाबाटै निवेदन दिन सकिने भएको छ ।

आर्थिक सहायताका लागि काठमाण्डाै नै धाउनु पर्ने अवस्थाको अन्त्य गर्दै पालिकाबाटै निवेदन दिन सकिने व्यवस्था गरिएको वैदेशिक रोजगार बोर्डले जनाएको छ ।
वैदेशिक रोजगार नियमावली, २०६४ को पाँचौँ संशोधन गर्दै सरकारले पालिकाबाटै आर्थिक सहायताका लागि निवेदन दिन सकिने व्यवस्था गरेको हो ।

वैदेशिक रोजगार बोर्डका कार्यकारी निर्देशक राजनप्रसाद श्रेष्ठका अनुसार अबदेखि वैदेशिक रोजगारीका क्रममा विदेशमा वा स्वदेश फर्किएको एक वर्षभित्र मृत्यु भएका व्यक्तिका परिवारले पालिकाबाटै आर्थिक सहायताका लागि निवेदन दिन सक्नेछन् । उहाँका अनुसार पालिकाले निवेदन प्राप्त भएको सात दिनभित्र बोर्डमा सक्कलै फाइल बोर्डमा पठाइसक्नुपर्नेछ ।

पछिल्लो समय वैदेशिक रोजगारसँग सम्बन्धित सेवालाई विकेन्द्रित गराउँदै लगेको सरकारले यसअघि नै सातै प्रदेशबाट पुनःश्रम स्वीकृति प्रदान गर्न थालिसकेको छ । पछिल्लो व्यवस्थाले आर्थिक सहायताका लागि राजधानी नै धाउनुपर्ने अवस्थाको अन्त्य गरेको छ ।

श्रम, रोजगार तथा सामाजिक सुरक्षामन्त्री गोकर्ण विष्टले मन्त्रालयको जिम्मेवारी सम्हालेलगत्तै आर्थिक सहायता वितरणलगायत अन्य सेवालाई प्रभावकारी, पारदर्शी र विकेन्द्रित बनाउने घोषणा गर्नुभएको थियो ।

उहाँकै अध्यक्षतामा बसेको वैदेशिक रोजगार बोर्ड सचिवालयको बैठकले आर्थिक सहायता उपलब्ध गराउन प्रक्रियागत सरलताका लागि पालिकाबाटै निवेदन दिने र बैंक खातामार्फत सहायता उपलब्ध गराउने गरी नियमावली संशोधन गर्ने निर्णय गरेको थियो ।

सहजीकरणका नाममा हुने ठगी अन्त्य

पालिकाबाटै आर्थिक सहायता वितरण र निवेदन दिन सकिने व्यवस्थासँगै आर्थिक सहायताका लागि काठमाडौँ नै धाउनुपर्ने अवस्थाको अन्त्य भएको छ । यसबाट पीडित परिवारले ठूलो राहत पाउनेछन् । उनीहरुको आर्थिक तथा समयको पनि बचत हुनेछ ।

यसैगरी आर्थिक सहायता उपलब्ध गराउन सहजीकरण गरिदिने भन्दै पीडितबाट राहत रकम लिने अवस्थाको पनि अन्त्य हुने विश्वास गरिएको छ ।

यसअघि कतिपय ‘एजेन्ट’ले मृतकको कामदारका आफन्तलाई आर्थिक सहायताका लागि सहजीकरण गरिदिने प्रलोभन दिएर पीडितबाट रकम लिने गरेको अवस्था थियो । कतिपय पीडित परिवार आर्थिक सहायता पाउने क्रममा ठगीमा पर्दै आएका थिए ।

बोर्डले उपलब्ध गराउने आर्थिक सहायताको सम्पूर्ण हिस्सापीडितले प्राप्त गर्न नसक्ने अवस्था थियो पालिकाबाट तथा बैंक खातामार्फत भुक्तानी हुने व्यवस्था भएपछि पीडितले प्राप्त गर्ने आर्थिक सहायता सुनिश्चित भएको छ ।

मृतकको हकवाला पालिकाले प्रमाणित गरेपछि र बैंकले सोही हकवालाको खाता नं प्रमाणीकरण गरेपछि मात्र आर्थिक सहायता निकासा हुने कार्यकारी निर्देशन श्रेष्ठले जानकारी दिनुभयो ।

बोर्डले प्रतिमृतक परिवार सात लाख रुपैयाँ आर्थिक सहायता उपलब्ध गराउँदै आएको छ । सरकारले वैदेशिक रोजगार नियमावली, २०६४ को पाँचौँ संशोधन गरी वैदेशिक रोजगारीका क्रममा मृत्यु भएका कामदारका नजिकका हकवालाले बोर्डबाट पाउने आर्थिक सहायताका लागि पालिकाबाट निवेदन दिनसक्ने र बोर्डबाट हकवालाको बैंक खातामा सिधै रकम भुक्तानी गर्नसक्ने व्यवस्था गरेको हो ।

२०७६ भदौ १ गतेदेखि लागू हुने गरी सरकारले यो व्यवस्था गरे पनि प्रक्रियागत विषय मिलाउनुपर्दा केही समय लागेको बोर्डले जनाएको छ । यसबाट मृतक कामदारका परिवारलाई काठमाडौँसम्म आउनुपर्नेलगायत अन्य थुप्रै झण्झटबाट मुक्ति मिल्ने विश्वास गरिएको छ ।

आवश्यक कागजपत्र

करार अवधिभित्र वा करार अवधि समाप्त भएको एक वर्षभित्र कुनै कारणले मृत्यु भएमा कामदारको परिवारले आर्थिक सहायता प्राप्त गर्नेछ । आर्थिक सहायताका लागि एक वर्षभित्र बोर्ड सचिवालयमा निवेदन दिनुपर्नेछ ।

आर्थिक सहायताका लागि गन्तव्य देशमा पुगेको प्रमाणित हुने छाप भएको पृष्ठ र राहदानीवाहकको राहदानी नं, नाम र फोटो भएको पृष्ठको प्रतिलिपि, विदेशस्थित रोजगारदाता कम्पनी, नियोग/अस्पतालको मृत्युको प्रमाणपत्र र शव ल्याउँदाको प्रज्ञापन पत्रको प्रतिलिपि र नेपालमा मृत्यु भएकाको हकमा निज वैदेशिक रोजगारीबाट फर्केको आगमनको छाप लागेको पृष्ठको प्रतिलिपि पेश गर्नुपर्नेछ ।

यसैगरी पालिकाले प्रदान गरेको मृत्यु दर्ताको प्रमाणपत्रको प्रतिलिपि, हकवालाको नागरिकता÷नाता प्रमाणित वा अविवाहित भए पालिकाबाट अविवाहिताको सिफारिस पत्र, पालिकाबाट हकवाला खुलेको फोटो र बैंकको नाम÷शाखा र बैंकखातासहितको बैंकको पत्रसमेत निवदेनका साथ पेश गर्नुपर्नेछ ।

पेश भएको प्रमाणित कागजात संलग्न गरी सम्बन्धित पालिकाको प्रमुख प्रशासकीय अधिकृतबाट सिफारिस भएको हुनुपर्ने बोर्डले जनाएको छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)