इजरायलमा सहायक कामदार पठाउन दोस्रो चरणको तयारी गर्दै सरकार

असोज ११, २०८० बिहीबार १२:३५:४७ | उज्यालो सहकर्मी

काठमाण्डौ – इजरायलमा सरकारी प्रक्रियामार्फत नै दोस्रो चरणमा सहायक कामदार नेपालबाट पठाउन सरकारले तयारी थालेको छ ।

पहिलो चरणमा छनौट भएकाहरूलाई इजरायल रोजगारीमा पठाउने क्रम सकिनै लाग्दा दोस्रो चरणको तयारी पनि भइरहेको श्रम, रोजगार तथा सामाजिक सुरक्षा मन्त्रालयका सहायक प्रवक्ता डम्बर बहादुर सुनुवारले जानकारी दिनुभयो ।

उहाँका अनुसार इजरायलले दोस्रो चरणमा उल्लेख्य सङ्ख्यामा सहायक कामदारको रूपमा नेपालीहरूलाई लैजाने इच्छा देखाएको छ ।

‘पहिलो चरणको तुलनामा बढी नै सङ्ख्यामा सहायक कामदारको रूपमा नेपालीहरू लैजाने इजरायलले रुचि देखाएको छ, हामीले त्यही अनुसारको तयारी पनि गरिरहेका छौँ’ सहायक प्रवक्ता सुनुवारले भन्नुभयो ‘पहिलो चरणमा गएकाहरूको अवस्थासँगै दोस्रो चरणको तयारीका लागि श्रम मन्त्रीस्तरीय इजरायल भ्रमणको तयारी भइरहेको छ ।’

इजरायल रोजगारीमा सन् २००९ सम्म म्यानपावर कम्पनीबाट नै श्रमिकहरू जाने गरेका थिए । तर म्यानपावर कम्पनीले श्रमिकबाट चर्को रकम असुलेको खुलेपछि इजरायलले नेपालबाट श्रमिक लैजान बन्द गरेको थियो ।

बन्द भएको झन्डै ११ वर्षपछि सरकारी संयन्त्रबाट नेपाली श्रमिक जाने प्रक्रिया थालिएको हो । यसका लागि नेपाल र इजरायलबीच २०७७ असोज १४ गते इजरायलको विशिष्ट श्रम बजारमा नेपाली कामदारको अस्थायी रोजगारी सम्बन्धी सम्झौतामा हस्ताक्षर भयो ।

त्यही सम्झौतालाई कार्यान्वयन गर्नका लागि २०७७ माघमा दुई देशबीच इम्प्लिमेन्टेसन प्रोटोकलमा हस्ताक्षर भयो ।

त्यसपछि २०७८ सालमा पहिलो चरणमा १६ सय जनाको नाम सिफारिस गरी नेपालले इजरायललाई पठाएको थियो । उनीहरूमध्येबाट ११ सय ७५ जना चिठ्ठा प्रणालीमार्फत इजरायल रोजगारीको लागि छनौट भएका थिए ।

जसमध्ये एक हजार एक सय तीन जना इजरायल गएको मन्त्रालयका सहायक प्रवक्ता डम्बरबहादुर सुनुवारले बताउनुभयो । छनौट भएका मध्ये ७२ जनाले भने इजरायल रोजगारीमा जान चाहेनन् ।

‘दुई देशबीच भएको सम्झौता अनुसार पहिलो चरण सफलतापूर्वक सम्पन्न भयो, सबैजसो इजरायल रोजगारीमा पुगिसक्नुभएको छ, एका दुई उड्न बाँकी हुनुहुन्छ तर उहाँहरूको पनि भिसा प्राप्त भइरहेको छ’ सहायक प्रवक्ता सुनुवार भन्नुहुन्छ ‘नेपाली श्रमिकको काम र मेहनतप्रति इजरायल सरकार खुसी छ, उसले दोस्रो चरणका लागि उल्लेख्य सङ्ख्यामा सहायक कामदारको माग गरेको छ ।’

इजरायल रोजगारीमा सरकारी प्रक्रियामार्फत नै श्रमिकहरू गइरहेका छन् । वैदेशिक रोजगार विभागमा छुट्टै शाखाको स्थापना गरेर श्रमिकको आवेदन माग्नेदेखि परीक्षा र अन्य सबै प्रक्रिया सरकारी तवरबाटै भएको हो ।

कमाइ र कार्यस्थलका हिसाबले इजरायल दक्षिण कोरियाभन्दा पनि आकर्षक गन्तव्य हो ।

सरकारी प्रक्रियामार्फत इजरायलको दीर्घकालीन स्याहार केन्द्रमा सहायक कामदारको रूपमा जाने नेपाली श्रमिकको न्यूनतम तलब एक हजार ५ सय ४३ डलर तोकिएको छ ।

सरकारी प्रक्रियामार्फत इजरायल गएकाहरूले मासिक रूपमा कम्तीमा दुई लाख रुपैयाँ कमाएको सहायक प्रवक्ता सुनुवार बताउनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

(अनिवार्य)