बाँकेमा गरिएको कोदो खेतीको परीक्षण सफल : तराईमा पनि खेती गर्न सकिने विज्ञको भनाइ

कात्तिक २८, २०८१ बुधबार ९:३०:१६ | रासस

बाँके – बाँकेमा गरिएको कोदो खेतीको परीक्षण सफल भएको छ । सामुदायिक जिन बैंक सञ्जालले बैजनाथ गाउँपालिका–१ चिसापानीको गाभर भ्यालीमा कोदो खेतीको परीक्षण गरेको हो ।

गएको साउनमा रोपिएको कोदो अहिले लहलह झुलेको छ । दैलेखबाट बसाइ सरी बाँके झरेका रामबहादुर बुढाले यसअघि बितेको झण्डै दुई दशकमा कोदो खेती भएको नदेखेको तर अहिले गाभर भ्यालीमा कोदो फलेको देखेपछि खेती गर्न सकिने रहेछ भन्ने लागेको बताउनुभयो ।

विशेषगरी पहाड र हिमालको चिसो मौसममा उत्पादन हुने कोदो बाली गर्मी हुने तराई क्षेत्रमा पनि खेती विस्तार गर्न सकिने उच्च सम्भावना देखिएको विज्ञले बताएका छन् ।

सामुदायिक जिन बैंक सञ्जालका संयोजक पुरमल बस्नेतका अनुसार डेढ कट्ठाभन्दा धेरै जग्गा भाडामा लिएर कोदोका विभिन्न प्रजातिको बिउ परीक्षणका लागि रोपिएको थियो । त्यसमा एक/दुई प्रजातिबाहेक अरु प्रजातिको खेती सफल भएको छ ।

बस्नेतका अनुसार मङ्सिरको पहिलो हप्ता कोदो काट्ने तयारी छ । बाँकेमा कोदो खेतीको परीक्षण नतिजा सफल भएपछि उत्साहित बनाएको उहाँले बताउनुभयो । आउँदा दिनमा तराईमा पनि कोदो उत्पादन गर्न सकिने सम्भावना देखिएको बस्नेतको भनाइ छ ।

उहाँका अनुसार पाँचवटा प्रजाति जिन बैङ्कले परीक्षणमार्फत उत्कृष्ट देखिएका, दुईवटा नेपाल कृषि अनुसन्धान परिषद् (नार्क)ले विकास गरेका र अन्य दुई प्रजाति किसानले उत्पादन गरेका कोदोका जात छन् ।

नेपाल कृषि अनुसन्धान परिषद् (नार्क)का प्राविधिकसँगको समन्वयमा परीक्षण गरिएको हो । रैथाने बालीको संरक्षणका लागि सुक्खा ठाउँमा समेत कोदो जस्तो रैथाने बाली लगाउन मिल्ने गरी यसको परीक्षण उत्पादन गरिएको उहाँको भनाइ छ ।

२०७८ सालमा चिसापानीको गाभर भ्यालीमा नेपालमै पहिलो सामुदायिक जिन बैङ्क स्थापना गरिएको थियो । जिन बैङ्कका सचिव कृष्ण चौधरीले गाभर भ्यालीमा कोदो खेतीको सम्भावना देखिएकाले परीक्षण गरिएको र त्यो सफल भएको बताउनुभयो ।

जिन बैङ्कले तराईमा कोदोसँगै विभिन्न रैथाने अन्नबाली, वनस्पति, पशुपन्छी, मौरी, सूक्ष्म जीवाणु र जलीयकुण्ड क्षेत्रमा काम गर्दै आएको छ ।

अन्तिम अपडेट: मंसिर १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्