योगेश भट्टराई भन्छन् : हेलिकप्टर दुर्घटनामा विभिन्न आशंका उब्जिएका छन्

फागुन २३, २०७५ बिहीबार १९:३२:४२ | केशवप्रसाद भट्टराई

ताप्लेजुङ – प्रतिनिधिसभा सदस्य योगेश भट्टराईले पाथीभरा देवीको मन्दिरमा जाँदा कहिल्यै पनि सात जना एउटै हेलिकप्टरमा नचढेको बताउनुभयो ।

भट्टराईले पाथीभराबाट हेलिकप्टरमा सात जना चढाएर लैजानुले दुर्घटनाका बारेमा विभिन्न आशंका उब्जाएको बताउनुभयो । ‘ताप्लेजुङको घुन्सामा २०६३ सालमा पनि हेलिकप्टर दुर्घटना भएर ठूलो क्षति ब्यहोर्नुपरेको थियो, यसपटकको दुर्घटनाले पनि धेरै आशंका उब्जाएका छन्’, उहाँले भन्नुभयो । पाथीभरामा जाँदा हेलिकप्टरबाट फुङलिङमा रहेको आर्मीको ब्यारेक वा सुकेटारमा छोडेर ४ जना मात्र जाने गरेको उहाँले बताउनुभयो ।

सरकारले घटनाको अध्ययन गर्न छानबिन समिति गठन गरिसकेकाले सत्यतथ्य बाहिर आउनेमा आफू विश्वस्त रहेको भट्टराईले बताउनुभयो । हिमाली क्षेत्रको भूगोल विकट र मौसम पनि परिवर्तनशील हुने हुँदा त्यस क्षेत्रको हवाई उडानमा विशेष ध्यान दिनुपर्नेमा सांसद भट्टराईले जोड दिनुभयो । दुर्घटनाको जोखिम पहाड र तराई सबैतिर हुने भन्दै उहाँले सावधानी अपनाए क्षति न्यूनिकरण गर्न सकिने बताउनुभयो ।

पाथीभरा सुरक्षित छ भन्ने सन्देश प्रवाह गर्न अन्तरष्ट्रिय उच्च पदस्थ व्यक्तिहरुलाई भ्रमण गराउने प्रयास भइरहेको समेत भट्टराईको भनाइ थियो । ‘पर्यटन व्यवसाय ताप्लेजुङको समृद्धिको आधारस्तम्भ हो’, उहाँले भन्नुभयो, ‘त्यसैले यो जिल्ला सुरक्षित रहेको सन्देश दिनका लागि भारतको पश्चिम बङ्गाल र सिक्किमका मुख्यमन्त्रीलाई समेत छिट्टै ल्याउने प्रयास गरिरहेका छौँ ।’

ताप्लेजुङमा २०६३ सालमा पनि हेलिकप्टर दुर्घटना हुँदा तत्कालीन वन राज्यमन्त्री गोपाल राईसहित २४ जनाको मृत्यु भएको थियो । दुवै दुर्घटनामा निधन भएकाको स्मृतिमा पुङलिङमा एउटा स्मृति पार्क बनाउने पहल गरिने भट्टराई बताउनुभयो ।

श्रद्धाञ्जली सभामा बोल्दै उहाँले पछिल्लो पुस्तामा सम्भावना बोकेका नेता र अहिलेको सरकारका गतिशील मन्त्रीको रुपमा रवीन्द्र अधिकारीलाई सम्झिनुभयो ।

दुर्घटनाको अघिल्लो दिन पनि ताप्लेजुङको सुकेटार विमानस्थलको स्तरोन्नतिका विषयमा अधिकारीसँग भट्टराईले कुरा गरेको बताउनुभयो ।

नेकपाले मन्त्री अधिकारी र पूर्व अर्थमन्त्री भरतमोहन अधिकारीको सम्झनामा फुङलिङमा श्रद्धाञ्जली सभा गरेको थियो ।

अन्तिम अपडेट: मंसिर १६, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

केशवप्रसाद भट्टराई

केशवप्रसाद भट्टराई ताप्लेजुङका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्