रवीन्द्र मिश्रकाे कविता : होसियार !

वैशाख ५, २०७६ बिहीबार १७:३९:४१ | रवीन्द्र मिश्र

लोकतन्त्रको नाममा
के बेचेनन् यिनले, सबै बेचे

लैनचौरको पर्खालभित्र
शरीर ढाक्ने वस्त्र बेचे
दिल्लीको दरबारभित्र
स्वाभिमानको अस्त्र बेचे
कोशी बेचे, गण्डकी बेचे
टनकपुर र पञ्चेश्वर बेचे
हुँदाहुँदा अब त
प्रधानमन्त्रीको वासै बेचे

होसियार !

यिनको छायाँ बन्नुअघि
गाउँ, शहरको भिडमा
पहिले आफूलाई चिन

होसियार !

जेलनेलको व्यथा कहेर
सर्वहाराको कथा बुनेर
खाडीका शेखलाई
युवाका सपना बेचे
युरोप, अमेरिकामा
सिङ्गो देशको विपना बेचे
मुम्बईका गल्लीमा
चेलीका चित्कार बेचे
कोलकाताका पसलमा
गरिबका पसिना बेचे

बेचे यिनले सबै बेचे
भोका पेटका गरिबलाई
भ्रमैभ्रमको खेती बेचे
हुनेखाने सबैलाई
पद–पैसाको लालसा बेचे

भरभराउँदो पहाड बेचे
फरफराउँदो फाँट बेचे
वन बेचे, जङ्गल बेचे
हाँस हाँस्ने पोखरी बेचे
चरा गाउने सिमसार बेचे
बुढेसकालको लौरो बेचे
मृत्युशैयाको मुस्कान बेचे
देशै नयाँ खोज्न बाध्य पार्दै
सन्ततिको पहिचान बेचे

होसियार !

यिनको छायाँ बन्नुअघि
गाउँ, शहरको भिडमा
पहिले आफूलाई चिन
होसियार !

-रवीन्द्र मिश्रकाे फेसबुकबाट

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।