यसरी मनाइयो पाल्पामा रणउजिरेश्वरी भगवतीको ‍विजय उत्सव

भदौ ७, २०७६ शनिबार १७:१५:३६ | देव पचभैया

पाल्पा - अंग्रेजसँगको युद्धमा नेपाली फौज विजयी भएको दिनको सम्झनामा शनिबार पाल्पाको तानसेनमा रणउजिरेश्वरी भगवतीको २०१ औँ विजयउत्सव मनाइएको छ ।

नेपाली सेनाका प्रधानसेनापति पूर्णचन्द्र थापाको उपस्थितिमा विजय उत्सव मनाइएको हो । नेपाल एकीकरणको समयमा तत्कालीन प्रशासक कर्णेल उजिर सिहं थापाले कृष्ण जन्माष्टमीको भोलिपल्ट मनाउन सुरु गरेको जात्रा हरेक वर्ष मनाइँदै आएको छ । अंग्रेज फौजसँग बुटवलको जितगढीमा भएको युद्धमा जानु अघि थापाले विजयी भएमा मन्दिर बनाएर प्रत्येक वर्ष सिन्दूर जात्रा गर्ने भाकल गरेको र विजयी भएपछि जात्रा मनाउन सुरु भएको इतिहासमा उल्लेख छ ।

पाँच ओटा नाकाबाट नेपालमाथि भएको आक्रमणमा चार ठाउँमा नेपालले हार ब्यहोर्नु परे पनि जितगढीको यु्द्धमा अंग्रेज फौजलाई नेपाली फौजले हराएको थियो । त्यसैको सम्झनामा विक्रम सम्वत् १८७६ देखि जात्रा मनाउन थालिएको भगवती मन्दिर गुठी व्यवस्थापन समितिले जनाएको छ ।

शनिबार दिउँसो पाैने एक बजे उठाइएको रथले बजार परिक्रमा गरेको छ ।

जात्राको अघिल्लो शुक्रबार आतिसबाजी, लाखेनाचसँगै भगवतीको रथ उचालेर बली दिइएको थियो । रातभर जाग्राम बसेर भगवतीको महिमा गाइएको र शनिबार बिहानैदेखि पूजा पाठ गरी रथलाई बजार परिक्रमा गराइएको मन्दिर व्यवस्थापन समितिका अध्यक्ष राजेश्वर उदयले जानकारी दिनुभयो ।

शुभसाइतमा सेनाको कर्णेलकाे पूजा र प्रमुख जिल्ला अधिकारीको सरकारी पूजा पछि पन्चे‍बाजासहितको र्‍यालीले भगवतीको रथलाई पाल्पा दरबार परिसर हुँदै बजार परिक्रमा गरेको थियो । भगवतीको मूर्ति राखेर बजार परिक्रमा गराइने रथ बाेक्न ४२ भन्दा बढी कुमाल समुदायका पुरुषहरु खटिँदै आएका छन् ।

साँस्कृतिक झाँकी‍सहितको र्‍यालीका साथमा बजार परिक्रमा गराइने रथको अघिपछि नेपाली सेना, प्रहरी, निजामति कर्मचारी, खेलाडी , विद्यार्थी, स्थानीय संघ संस्थाका प्रतिनिधि, भक्तजन लगायतको सहभागिता रहेको थियो ।

राष्ट्रिय गौरवको इतिहास जोडिएको भगवती जात्रामा सबै जाति, धर्म र समुदायको सक्रिय सहभागिता रहँदै आएको छ । स्थानीय बिदा दिएर मनाइने भगवतीजात्रा हेर्न छिमेकी जिल्लाबाट समेत भक्तजनहरु भेला भएका थिए ।

नेपालको राष्ट्रियता, स्वाभिमान र राष्ट्रिय गौरवको इतिहास बोकेको रणउजिरेश्वरी भगवतीको रथजात्रालाई राष्ट्रिय पर्वकाे मान्यता दिनुपर्ने स्थानीयहरुले माग गर्दै आएका छन् ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

देव पचभैया

पाल्पाका उज्यालो सहकर्मी देव पचभैया श्रीनगर एफएममा पनि कार्यरत हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्