गोरखा दरबार पुनर्निर्माण : म्याद सकियो, काम सकिएन

पुष ४, २०७६ शुक्रबार १७:४३:६ | किरण लोहनी

गोरखा - गोरखा दरबार पुनर्निर्माणको ठेक्का अवधि सकिएको छ ।

ठेक्का सम्झौतामा उल्लेख भएअनुसार दरबार पुनर्निर्माणको काम मंसिर मसान्तमा सकिनु पर्थ्यो, तर काम भने ३५ प्रतिशत मात्रै भएको छ ।

आधा काम पनि पूरा नहुँदै ठेक्का अवधि सकिएपछि म्याद थपको तयारी सुरु भएको छ । निर्धारित साढे दुई वर्षको ठेक्का अवधि मंसिर मसान्तमा सकिएपछि म्याद थप्ने प्रक्रिया सुरु भएको पुरातत्व विभागले जनाएको छ ।

२०७२ सालको भूकम्पले क्षति पु¥याएको गोरखा दरबार पुनर्निर्माणका लागि २०७४ सालको कात्तिकमा पचली सिभाको जेभी नामको ठेकेदार कम्पनीसँग सम्झौता भएको थियो । पुनर्निर्माणका लागि कम्पनीसँग ४ करोड ३७ लाख रुपैयाँमा ठेक्का सम्झौता भएको थियो । तर ठेक्का अवधि सकिँदा ३५ प्रतिशत मात्रै काम भएको पुरातत्व विभागअन्तर्गतको गोरखा दरबार हेरचाह अड्डाका प्रमुख हरिप्रसाद भुुसालले बताउनुभयो ।

दरबारको पहिलो तल्लाको काम पनि पूरा भएको छैन । निर्माण व्यवसायीले एक वर्ष म्याद थपका लागि निवेदन दिएका गोरखा दरवार पुनर्निर्माण परियोजनाकी प्रमुख मञ्जुसिं भण्डारीले बताउनुभयो ।

ठेकेदारले एक वर्षको म्याद मागे पनि सार्वजनिक खरिद ऐनको आठौं संशोधनअनुसार कुल ठेक्का अवधिको २५ प्रतिशत समय मात्रै थप्न सकिने उहाँको भनाइ छ । त्यसैले अव बढीमा ६ महिना मात्रै म्याद थप हुन सक्ने उहाँले जानकारी दिनुभयो । थपिएको अवधिमा कामको प्रगति नदेखिए ठेक्का सम्झौतानै भंग गर्नेबारे छलफल भैरहेको भण्डारीले जानकारी दिनुभयो ।

‘म्याद थपिएपछि एक दुई महिना हामी उहाँहरुको काम हेर्छौं, अहिलेको जस्तै काममा ढिलाइ भयो भने हामी ठेक्का तोड्ने मनस्थितिमा छौं’ उहाँले भन्नुभयो, ‘निर्माण व्यवसायीमा पुरातात्विक महत्वको सम्पदासम्बन्धी कामको अनुभव पनि कम रहेको पाइयो, त्यस कारण पनि काममा अलमल भएको हो ।’

सुरुमा जगको काममा भएको अलमलका कारण पनि म्याद थप्नुपर्ने देखिएको पुरातत्व विभागले जनाएको छ । दरबार पुननिर्माण छिटो सक्न चौतर्फी दबाब बढिरहेका बेला काम भने फेरि सुस्ताएको छ । पुरातत्व विभागको ताकेतापछि तीव्र बनेको काम फेरि सुस्ताएको गोरखा दरबार हेरचाह अड्डाले जनाएको छ ।

दरबार पुनर्निर्माणमा ढिलाइ भएको चौतर्फी गुनासोपछि निर्माण व्यवसायीले जग र पहिलो तल्लाको निर्माण कार्य धमाधम अघि बढाएका थिए । तर पहिलो तल्लाको गाह्रो लगाउने काम बाँकी रहँदै निर्माणको काममा सुस्तता आएको हेरचाह अड्डाका प्रमुख हरिप्रसाद भुसालले बताउनुभयो ।

दशैंअघि जग र पहिलो तल्लाको काठको काम सकेको ठेकेदार कम्पनीले त्यसयता भने निर्माणको काममा गति दिन सकेको छैन । दरवार क्षेत्रमा चुना र सुर्कीलगायतका निर्माण सामग्री ढुवानी गरे पनि कामले गति लिन नसकेको हेरचाह अड्डाका प्रमुख भुसालको भनाइ छ ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्