गोरखाका २० मतदान केन्द्रमा फेरि मतदान गराउन ११ उम्मेदवारको माग

मंसिर ५, २०७९ सोमबार १५:३५:४६ | किरण लोहनी

काठमाण्डौ – गोरखाका २० मतदान केन्द्रमा पुनः मतदान गराउन प्रतिनिधिसभा र प्रदेशसभाका ११ जना उम्मेदवारले माग गरेका छन् ।

नेकपा एमाले, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, राप्रपा नेपाल, नेपाल परिवार दलसहित स्वतन्त्र उम्मेदवारहरुले मतदानको क्रममा धाँधली भएको भन्दै पुनः मतदान गराउन माग गरेका हुन् ।

सोमबार संयुक्त पत्रकार सम्मेलन आयोजना गर्दै निर्वाचन क्षेत्र नम्बर १ को ६ वटा र निर्वाचन क्षेत्र नम्बर २ को १४ वटा मतदान केन्द्रमा धाँधली भएको उम्मेदवारहरुले दाबी गरेका छन् ।

क्षेत्र नम्बर १ अन्तर्गतका भिमसेन थापा गाउँपालिका १ को बालकल्याण आधारभूत विद्यालय मतदान केन्द्र, यही वडाको बिन्द्रावती माध्यमिक विद्यालय मसेल मतदान स्थलको ३ वटा केन्द्र, पालिकाको वडा नम्बर ८ मा रहेको भिमसेन आधारभूत विद्यालय मतदान केन्द्र तथा धार्चे गाउँपालिका ३ को पार्वती आधारभूत विद्यालय मतदान केन्द्रमा पुनः मतदानको माग गरिएको छ ।

निर्वाचन क्षेत्र नम्बर २ अन्तर्गत पालुङटार नगरपालिका १ को स्थानीका आधारभूत विद्यालय मतदान केन्द्र, पालुङटार ७ को जीवनज्योती माध्यमिक विद्यालय अन्तर्गतका ३ वटा मतदान केन्द्र, बारपाक सुलिकोट गाउँपालिका ४ को हिमालय माविका ३ वटा केन्द्र, यही वडाको दुर्गा मावि रञ्चोकका २ वटा केन्द्र तथा वडा नम्बर ६ को सूर्यज्योती मावि मतदान केन्द्रमा पुनः मतदान गर्न माग गरिएको हो ।

यस्तै क्षेत्र नम्बर २ कै सिरानचोक गाउँपालिका ८ को परोपकार मावि जौवारी मतदान स्थलका २ वटा केन्द्र र अजिरकोट गाउँपालिका ३ को ज्ञानज्योती माविका २ वटा मतदान केन्द्रमा पनि पुनः मतदान हुनुपर्ने उम्मेदवारहरूको माग छ ।

पत्रकार सम्मेलनमा बोल्दै नेकपा एमालेबाट क्षेत्र नम्बर १ का उम्मेदवार रामशरण बस्नेतले सत्ता र शक्तिको आडमा धाँधली गरिएको बताउनुभयो । कतिपय केन्द्रमा मतदान गराउन खटिएका कर्मचारी र सुरक्षाकर्मी मुख दर्शक भएर बसेको पनि उहाँको भनाई छ ।

यस्तै राष्ट्रिय स्वतन्त्र पार्टीबाट क्षेत्र नम्बर २ का उम्मेदवार कवीन्द्र बुर्लाकोटीले अन्य दलका मतदान प्रतिनिधिहरूलाई बोल्न नदिने, मतदाताहरूको इच्छा विपरीत समातेर लगेर मतदान गर्ने, मतदान केन्द्रको ३ सय मिटर भित्रै आचारसंहिता विपरीत काउन्टर राखेर धम्क्याउने, मुचुल्कामा हस्ताक्षर गर्न बाध्य पार्ने जस्ता क्रियाकलाप गरिएको बताउनुभयो ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

किरण लोहनी

उज्यालोका गोरखा सम्वाददाता किरण लोहनी गोरखाको च्वाइस एफएममा पनि काम गर्नुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्