पर्यटक बढे भनेर मख्ख के पर्नु ? आम्दानी नबढेपछि !

जेठ १३, २०७६ सोमबार २०:३३:२१ | अर्जुन पोख्रेल

काठमाण्डौ – हरेक वर्ष नेपाल आउने विदेशी पर्यटक बढे भनेर सरकारी र निजी क्षेत्र दङ्ग भैरहँदा आम्दानी भने घटेको पाइएको छ । अर्थ मन्त्रालयले सोमबार सार्वजनिक गरेको आर्थिक वर्ष २०७५/७६ को आर्थिक सर्वेक्षणले पर्यटक बढे पनि आम्दानी भने घटेको देखाएको छ ।

सन् २०१८ मा स्थलमार्ग हुँदै भारतबाट आउने पर्यटकबाहेक नेपालमा ११ लाख ७३ हजार ७२ जना पर्यटक आएका थिए । यो संख्या सन् २०१७ को तुलनामा २५ प्रतिशतले धेरै हो । तर पर्यटक बढे पनि उनीहरुले नेपालमा गर्ने खर्च र बसाइ अवधि भने घटेको छ ।

आर्थिक वर्ष २०७४/७५ मा पर्यटन क्षेत्रबाट ६७ अर्ब ९ करोड रुपैयाँ विदेशी मुद्रा आम्दानी भएकोमा यो आर्थिक वर्षको फागुनसम्म जम्मा ४७ अर्ब ६९ करोड रुपैयाँ विदेशी मुद्रा आम्दानी भएको छ । यो वर्ष ४७ अर्ब रुपैयाँबाट आम्दानी केही बढ्न सक्छ, तर पर्यटकीय सिजन सकिएकाले पोहोरको आम्दानीलाई भेटाउन भने मुश्किल देखिन्छ ।

पर्यटकको नेपाल बसाइ र दैनिक औसत खर्च पनि घटेको छ । सन् २०१७ मा नेपाल आउने पर्यटकले औसत दैनिक खर्च ५४ डलर रहेकोमा सन् २०१८ मा ४० डलरको हाराहारीमा झरेको छ । यस्तै सन् २०१७ मा पर्यटकको नेपाल बसाइ औसतमा १२ दशमलव ६ दिन रहेकोमा सन् २०१८ मा घटेर १२ दशमलव ४ दिनमा पुगेको छ ।

६० प्रतिशत पर्यटक मनोरञ्जनका लागि नेपाल आउँछन्, सबैभन्दा धेरै लुम्बिनीमा

सन् २०१८ मा ११ लाख नेपालमा ११ लाख ७३ हजार ७२ जना पर्यटक आएका थिए । नेपाल आउनेमध्ये दुई तिहाइ पर्यटक मनोरञ्जनका लागि आएको तथ्यांकले देखाएको छ । यस्तै पदयात्रा र आरोहणको लागि आउने पर्यटक १६ प्रतिशत रहेका छन्, यस्तै तीर्थयात्राको लागि आउने पर्यटक १४ दशमलव ४ प्रतिशत रहेका छन् भने अन्य प्रयोजनका लागि आउने पर्यटकको संख्या ९ दशमलव ६ प्रतिशत रहेको छ ।

सर्वेक्षणले सबैभन्दा धेरै पर्यटक लुम्बिनी पुग्ने गरेको देखाएको छ । सन् २०१७ मा १५ लाख ५२ हजार ५ सय ८६ जना आन्तरिक तथा बाह्य पर्यटकले लुम्बिनी भ्रमण गरेका थिए । तर सन् २०१८ मा यो संख्यामा २ प्रतिशतले कमी आएको छ ।

लुम्बिनी जानेमध्ये ११ लाख ५५ हजार ५ सय जना नेपाली छन भने १ लाख ९२ हजार भारतीय तथा १ लाख ६९ हजार एक सय ८० जना पर्यटक अन्य देशबाट आएका छन् ।

हिमालबाटै उठ्यो ५८ करोड १५ लाख

सन् २०१८ मा सरकारले हिमाल आरोहणमा जानेहरुबाटै ५८ करोड १५ लाख रुपैयाँ रोयल्टी संकलन गरेको छ । सरकारले ६ हजार ५ सय मिटरभन्दा माथिका हिमाल आरोहण गर्नेहरुबाट रोयल्टी लिँदै आएको छ ।

सगरमाथा आराेहणका लागि जानेहरुकाे भिड तस्बिर - एएफपी

सन् २०१८ मा ८ हजार ६ सय ४१ जनाबाट ५८ करोड १५ लाख रुपैयाँ रोयल्टी संकलन भएको आर्थिक सर्वेक्षणले देखाएको छ । यसमध्ये प्रदेश १ का हिमालबाट मात्रै कुल रोयल्टीको ९० प्रतिशत रकम उठ्ने गरेको छ ।

तारे होटल १ सय २९ पुगे, पर्यटकीय स्तरका बेड संख्या झण्डै ४१ हजार

गएको पुससम्म नेपालमा तारे होटलको संख्या १ सय २९ पुगेको आर्थिक सर्वेक्षणले देखाएको छ । पर्यटकीय स्तरीय होटल लजको संख्या पनि जोड्दा होटलको संख्या ११ सय २५ रहेको छ । नेपालमा ३ सय २४ वटा होम स्टे सञ्चालनमा रहेका छन् ।

सबै प्रकारका होटलका बेड संख्या हेर्दा ४० हजार ८ सय ५६ पुग्ने सर्वेक्षणमा उल्लेख छ । यसमध्ये ११ हजार १ सय ४६ बेड तारे होटलमा रहेका छन् ।

अन्तिम अपडेट: मंसिर १५, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

अर्जुन पोख्रेल

उज्यालोमा कार्यरत अर्जुन पोख्रेल आर्थिक विषयमा कलम चलाउनु हुन्छ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्

पर्यटक बढे भनेर मख्ख के पर्नु ? आम्दानी नबढेपछि !

फाइल फाेटाे

तपाईको प्रतिक्रिया