लमजुङमा अलैँची उत्पादन बढ्दाे : मूल्य घट्दाे

पुष १७, २०७६ बिहीबार १४:३६:२२ | श्यामशितल परियार

लमजुङ - अलैँची खेती गर्ने किसानको संख्या बढ्नुका साथै अलैँची खेतीको क्षेत्र विस्तारसँगै लमजुङमा अलैँची उत्पादन बढ्दै गएको छ ।

‘अलैँची खेती गर्ने किसानको संख्या बढेको छ । अलैँची खेतीको क्षेत्र विस्तार पनि भएको छ । त्यसैले लमजुङमा अलैँची उत्पादन बढ्दो छ,’ नेपाल अलैँची व्यवसायी महासंघ, गण्डकी प्रदेशका अध्यक्ष अजय तामाङले भन्नुभयो ।

उहाँका अनुसार अघिल्लाे वर्ष जिल्लामा झण्डै ९ सय हेक्टर क्षेत्रफल जमिनबाट ६ सय ५० क्विन्टल अलैँची उत्पादन भएको थियो ।

लमजुङमा यस वर्ष २ हजार क्विन्टल अलैँची उत्पादन भएको छ । ‘यस वर्ष लमजुङमा अहिलेसम्मकै बढी २ हजार क्विन्टल अलैँची उत्पादन भएको छ । जिल्लामा यस वर्ष १ हजार ५० हेक्टर क्षेत्रफलमा अलैँची लगाइएको थियो,’ उहाँले भन्नुभयो ।

जिल्लामा उत्पादित अलैँची बिक्रीबाट यसवर्ष १२ करोड रुपैयाँ लमजुङ भित्रिएको उहाँले बताउनुभयो । गएकाे वर्ष लमजुङमा अलैँची बिक्रीबाट ५ करोड रुपैयाँ आम्दानी भएको थियो ।

उत्पादन बढ्दो, मूल्य घट्दो : किसान निराश

लमजुङका प्राय: सबै किसानले यस वर्ष उत्पादित अलैँची बिक्री गरिसकेका छन् । किसानले यस वर्ष प्रतिकेजी ५ सय ५० रुपैयाँदेखि ६ सय ४० रुपैयाँसम्म अलैँची बिक्री गरेका छन् । जिल्लामा अलैँची उत्पादन बढ्दै गए पनि अलैँचीको मूल्यमा गिरावाट आएसँगै किसान निराश बनेका छन् । गएकाे वर्ष किसानले प्रतिकेजी ६ सयदेखि ७ सय ५० रुपैयाँसम्ममा अलैँची बिक्री गरेका थिए ।

अलैँची बिक्रीका लागि भारतको भर

नेपालमा उत्पादित अलैँची सोझै तेश्रो मुलुक निर्यात हुन नसक्नु, अलैँची बिक्रिका लागि भारतको भर पर्नुपर्ने लगायतका कारणले पनि अलैँचीको मूल्य बर्सेनि घट्दै गएको छ ।

‘नेपालको अलैँची सिधै तेश्रो मुलुक जाँदैन, भारतको भर पर्नुपर्छ । भारतले अहिले आफ्नो उत्पादन बढाएको छ । आफ्नो अलैँची बिक्री गरेपछि मात्रै भारतले नेपालको अलैँची किन्छ,’ अजयले भन्नुभयो, ‘त्यसैले पनि नेपालमा उत्पादित अलैँचीको बजार मूल्य घट्दै गएको छ ।’

उहाँका अनुसार नेपालमा उत्पादित अलैँची भारत हुँदै बंगलादेश, साउदी, कतार लगायतका खाडी मुलुकमा पुग्छ ।

अन्तिम अपडेट: मंसिर १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

श्यामशितल परियार

श्यामशितल परियार उज्यालोकाे लमजुङ र मनाङ जिल्ला सम्वाददाता हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्